Мыекъуапэ къызэрэхахыгъэм тегъэгушIо
ИлъэсыкIэу тызыхэхьагъэм Урысыем, IэкIыб хэгъэгухэм дзюдомкIэ зэнэкъокъу гъэшIэгъонхэр ащызэхащэщтых.
Урысые Федерацием дзюдомкIэ изэнэкъокъу Iоныгъом и 23 — 26-м Мыекъуапэ щыкIощт. КIалэхэри, пшъашъэхэри хэгъэгум изэIукIэгъухэм ахэлэжьэщтых.
Адыгэ Республикэм икъэлэ шъхьаIэу Мыекъуапэ Урысые къэралыгъошхом къызэрэщыхахыгъэм мэхьэнэ ин иIэу тэлъытэ.
Мыекъуапэ ыцIэ къыраIоным ыпэкIэ зэхэщакIохэм къыдалъытагъэр бэ. СССР-м изаслуженнэ тренерэу, Москва хэкум дзюдомкIэ ипрезидент иапэрэ гуадзэу, Адыгеим иныбджэгъушIоу Авель Казаченковым къызэрэтиIуагъэу, Адыгэ Республикэм испорт псэуалъэхэм хэхъоныгъэ инхэр зэрафэхъухэрэр, зэнэкъокъу гъэшIэгъонхэр зэрэщызэхащэхэрэр, хьакIэщхэм, зыгъэпсэфыпIэхэм язытет, нэмыкI Iофыгъохэр хэгъэгум дзюдомкIэ ипащэхэм ашIэх. Республикэм и ЛIышъхьэу КъумпIыл Мурат, Правительствэм икъулыкъушIэхэм лъэшэу афэразэх.
— 2010-рэ илъэсым Урысыем дзюдомкIэ и Кубок къыдэхыгъэным фэгъэхьыгъэ зэнэкъокъур Мыекъуапэ щыкIуагъ, — къеIуатэ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлымэ. — Спорт зэIукIэгъу инхэр Адыгеим дэгъоу зэрэщызэхащэрэр хэгъэгум дзюдомкIэ и Федерацие ипащэхэм къыхагъэщыгъ.
Спортым пIуныгъэ мэхьанэу иIэм зыкъызэриIэтырэм, Адыгеим спортсмен цIэрыIохэр зэрэщагъасэхэрэм хэгъэгум ифедерацие алъэплъэ.
Мыекъопэ бэнэпIэ еджапIэм щагъэсэгъэ Тао Хьасанбый Урысыем дзюдомкIэ ихэшыпыкIыгъэ командэ итренер шъхьаI. Ащ иеплъыкIэхэри тшIогъэшIэгъоных.
— Адыгеим щыщхэу Ордэн Андзаур, Мерэм Дамир, Датхъужъ Алый Урысыем дзюдомкIэ ихэшыпыкIыгъэ командэ хэтых, — игупшысэхэм тащегъэгъуазэ Тао Хьасанбый. — БэнакIохэм яIэпэIэсэныгъэ хагъахъо, зэнэкъокъухэм зафагъэхьазыры.
Тао Хьасанбый Урысыем, Адыгеим язаслуженнэ тренер. Олимпиадэ джэгунхэм джэрзыр къащыдихыгъ. 2016-рэ илъэсым Олимпиадэ джэгунхэу Рио-де-Жанейро щыкIуагъэхэм тренерэу ахэлэжьагъ. Адыгэ республикэ гимназием щеджэгъэ Мудрэнэ Бислъан дышъэр къызыдехым, апэу фэгушIуагъэр Тао Хьасанбый ары. Хьасанбыйрэ Бислъанрэ зэгъусэхэу Адыгэ Республикэм ибыракъ лъагэу аIэти, Олимпиадэм щагъэбыбэтагъ.
Нарт батырхэу дунэе щытхъур къытфэзыхьыхэрэм тагъэгушхо, ягъэхъагъэхэм ахагъэхъонэу афэтэIо.
Iоныгъом и 23 — 26-м Урысыем дзюдомкIэ изэнэкъокъоу Мыекъуапэ щыкIощтым хэлэжьэщтхэм Олимпиадэ джэгунхэм дышъэр къащызыхьыщтхэр къахэкIыщтхэу тэгугъэ.