«Жъуагъохэм якъежьапIэ» зерэIэт
Адыгэ Республикэм культурэмкIэ и Къэралыгъо IофшIапIэу, лъэпкъ къашъохэмкIэ кIэлэцIыкIу зыгъэсапIэу «Майкопчанкэм» еджапIэр къыщызэIухыгъэным фэгъэхьыгъэ зэхахьэм зэгъэпшэнхэр тигъэшIыгъэх.Урысыем культурэмкIэ изаслуженнэ IофышIэу, Урысые Федерацием и Правительствэ и Къэралыгъо шIухьафтын къызыфагъэшъошэгъэ Къулэ Амэрбый ипэублэ гущыIэ къыщыхигъэщыгъ кIэлэцIыкIухэмрэ ныбжьыкIэхэмрэ лъэпкъ къашъохэм афэгъэсэгъэнхэмкIэ егъэжьапIэу ашIыгъэр зэрэлъагъэкIотэщтыр.
Лъэпкъ пэпчъ къэшъо хэхыгъэ иI. КъашъомкIэ лъэпкъым итарихъ, шэн-хабзэхэр къэпIотэнхэ плъэкIыщт. ЩыIэныгъэм диштэрэ зекIокIэ тэрэзхэм кIэлэцIыкIухэр ащыгъуазэхэу дэгъоу пIугъэнхэм, яшIэныгъэ хагъэхъоным афэшI еджапIэу къызэIуахыгъэм мэхьэнэ ин иIэу Къулэ Амэрбый елъытэ.
Республикэм иобщественнэ движениеу «Адыгэ Хасэм» итхьаматэу ЛIымыщэкъо Рэмэзан еджэпIэ чIэхьапIэм щагъэпсыгъэ сурэтым ипэIухъо къыIуихыгъ, зэхахьэм хэлажьэхэрэм къафэгушIуагъ.
ЧIэхьапIэм узыIэпещэ
«Майкопчанкэм» ичIэхьапIэ дахэу зэгъэфагъэ. Нэрылъэгъу IэпыIэгъухэм узыфащэ. Илъэси 4 зыныбжьхэм къащегъэжьагъэу 12-м итхэм анэс еджапIэм зэраштэхэрэр лъэгъупхъэу тетхагъ. Ансамблэм икъэшъуакIохэм ясурэтхэри олъэгъух.
ЗыгъэсапIэу «Жъуагъохэм якъежьапIэ» сурэт зэгъэкIугъэм къегъэкIэракIэ. КъэшъуакIор ищыгъ. ЛъапэхэмкIэ уцугъэу лъэпкъ искусствэм идэхагъэ гукIэ ухещэ. Лъэоянэхэр бэ мэхъух.
Жъогъо 12-р, тыгъэм инэбзыйхэр, мазэу огум къыщылъагъорэр, искусствэм итамыгъэхэр, нэмыкIхэри еджэпIэ-зыгъэсапIэм ичIэхьапIэ къекIух.
Уахътэм иджэрпэджэжь
— Къулэ Амэрбый Адыгэ Республикэм инароднэ артист, — къыщиIуагъ зэхахьэм ЛIымыщэкъо Рэмэзан. — Республикэм и Къэралыгъо академическэ лъэпкъ къэшъокIо ансамблэу «Налмэсым» ихудожественнэ пащэу илъэсыбэрэ Iоф ышIагъ. Къашъоу ыгъэуцугъэхэр ансамблэхэм дунаим къыщашIых. Артистэу ыгъэсагъэхэм искусствэр лъагэу щыIэныгъэм щаIэтыгъ. Тыфэраз, зыгъэсапIэу къызэIуихырэм «жъогъуакIэхэр» щигъэсэнхэу фэтэIо. Адыгэ Хасэм зыгъэсапIэу къызэIуахыгъэм Iоф дишIэщт.
Зэхахьэм хэлэжьэгъэ хъулъфыгъэхэм ащыщ гущыIэ хадзэу къыIуагъэр тшIогъэшIэгъоныгъ.
— Тэри къэшъуакIэ Амэрбый тигъэшIагъ, тикIалэхэри искусствэм фегъасэх, — къыIуагъ хъулъфыгъэ нэгушIом.
Къулэ Амэрбый ыгъэсэгъэ къэшъуакIохэм япчъагъэ къэлъытэгъуае. Ащ къызэрэтиIуагъэу, пчъагъэм зэрэхигъэхъощт закъор арэп пшъэрылъ шъхьаIэу иIагъэр. Лъэпкъ къашъом икупкI артистхэм, искусствэр зышIогъэшIэгъонхэм гукIэ алъигъэIэсы шIоигъуагъ.
Лъэпкъ къашъохэмкIэ лIэужхэр зэрипхыгъэх, къашъор джэрпэджэжь афэхъугъэу искусствэм хищагъэхэр зэлъэкIох, лъэпкъ культурэм фэлажьэх.
— Къулэ Амэрбый сикIэлэегъэджэ къодыеп. Къашъом сыфигъасэзэ, щыIэныгъэм сыфипIугъ, ишIушIагъэ гъашIэм щысэгъэлъапIэ, — къытиIуагъ Адыгэ Республикэм инароднэ артистэу НэмытIэкъо Аслъан. — Амэрбый къашъом псэ къыпызыгъэкIэрэ цIыф лъэшмэ ащыщ.
«Майкопчанкэм» илъагъохэр
КIэлэцIыкIу зыгъэсапIэм иансамблэ Молдавием, Урысыем икъалэхэм ащыIагъ. Дунэе ыкIи хэгъэгу фестиваль-зэнэкъокъухэм щытхъуцIэхэр къащыдихыгъ. Амэрбый ыкъоу Алый Адыгэ Республикэм изаслуженнэ артист, ансамблэ цIэрыIоу «Налмэсым» къыщэшъо. Ыпхъухэри, ыкъо нахьыкIэу Альберти искусствэм хэтыхэу еджэх, Iоф ашIэ.
Лъэпкъ къашъоу А. Къулэм ыгъэуцугъэхэу «Майкопчанкэм» къышIыхэрэр тарихъым, искусствэм япхыгъэх. НыбжьыкIэу ыгъэсагъэхэм ащыщхэр непэ кIэлэегъаджэх, къэшъуакIох, Мыекъопэ къэлэ администрацием, республикэм и Правительствэ якъулыкъушIэх, хэгъэгум ищыкIэгъэ цIыфых.
«ЖъогъуакIэм икъежьапIэ щагъэсэщтхэм искусствэм гъэхъагъэ щашIынэу, сэнэхьатэу къыхахырэм дэгъоу рылэжьэнхэу тафэлъаIо. Искусствэр лъэгъохэщ зыфэхъугъэхэм щыIэныгъэм нахь псынкIэу зыкъыщагъотэу зылъытэхэрэм адетэгъаштэ. «ЖъогъуакIэм икъежьапIэ» зиушъомбгъунэу имурадышъ, ари къыдэхъущтэу тэлъытэ. КъашъохэмкIэ училищэ къалэм къыщызэIухыгъэныр игъоу зылъытэхэрэм узэгупшысэн хэлъ.
ЕмтIылъ Нурбый. Сурэтхэр зэхахьэм къыщытетхыгъэх.