Щынэгъончъэныр зэкIэмэ анахь шъхьаI
УФ-м и Лъэпкъ гвардие и Федеральнэ къулыкъу и ГъэIорышIапIэу АР-м щыIэм 2020-рэ илъэсым Iоф зэришIагъэм изэфэхьысыжьхэм афэгъэхьыгъэ зэIукIэгъоу зэхищэгъагъэм хэлэжьагъэх ГъэIорышIапIэм ипащэу И. Гричановыр, ащ игуадзэу А. Сорокиныр, отделым ипащэу А. Власовыр, журналистхэр.
И. Гричановым пэублэм къызэриIуагъэмкIэ, 2020-рэ илъэсым Лъэпкъ гвардием икъулыкъушIэхэм анахьэу анаIэ зытырагъэтыгъэр къэралыгъо ыкIи общественнэ щынэгъончъэныр, цIыфхэм яфитыныгъэ ыкIи яшъхьафитыныгъэ къэухъумэгъэнхэр ары. АР-м хэгъэгу кIоцI IофхэмкIэ и Министерствэрэ ГъэIорышIапIэмрэ зэгъусэхэу общественнэ-политическэ ыкIи мэхьанэшхо зиIэ Iофтхьабзэхэр зэхащэх.
Мы илъэсым Росгвардием иподразделениехэу ОМОН-м ыкIи СОБР-м якъулыкъушIэхэм хэушъхьафыкIыгъэ Iофтхьабзэу рагъэкIокIыгъэхэм къакIэлъыкIоу бзэджэшIагъэ зэрахьагъэу зэгуцэфэхэрэ нэбгырэ 58-рэ къаубытыгъэх, административнэ хэбзэукъоныгъэ 1095-рэ къыхагъэщыгъ. Iашэр гъогогъу 228-рэ, щэ зэфэшъхьафи 6-рэ, наркотик зыхэлъ пкъыгъо грамм 30-рэ къапкъырахыгъэх.
А. Власовым пэублэм къызэриIуагъэмкIэ, республикэм ивневедомственнэ къулыкъу шъолъырым ит псэолъэ 1209-рэ къегъэгъунэ.
2020-рэ илъэсыр къызихьагъэм къыщегъэжьагъэу общественнэ рэхьатныгъэр къэухъумэгъэным, щынэгъончъэныр гъэлъэшыгъэным фэшI ГъэIорышIапIэм иподразделение дэкIыгъуи 110-рэ иIагъ, хэбзэукъоныгъэ 91-рэ къызэтырагъэуцуагъ, ахэм ахахьэ физическэ ыкIи юридическэ лицэхэм алъэныкъокIэ къагъэгъунэрэ мылъку 23-рэ.
Iофтхьабзэу зэхащагъэхэм яшIуагъэкIэ бзэджэшIагъэ зезыхьагъэу зэгуцэфэхэрэ нэбгырэ 290-рэ, бэшIагъэу зылъыхъущтыгъэхэ нэбгыри 4 къаубытыгъэх. Административнэ хэбзэгъэуцугъэр зыукъогъэ нэбгырэ 260-рэ агъэунэфыгъ.
И. Гричановым кIэухым къызэриIуагъэмкIэ, 2020-рэ илъэсым УФ-м и Лъэпкъ гвардие и Федеральнэ къулыкъу Къыблэ федеральнэ шъолъырымкIэ ичIыпIэ къулыкъухэм Iоф зэрашIагъэм зэфэхьысыжьэу фашIыгъэмкIэ, Адыгеим щыIэ ГъэIорышIапIэм ящэнэрэ чIыпIэр къыфагъэшъошагъ.
Республикэм ищыIэкIэ-псэукIэ нахьышIоу гъэпсыгъэнымкIэ Лъэпкъ гвардием мэхьанэшхо зэриIэм щэч хэлъэп. Арышъ, къулыкъум шIуагъэ къытэу иIофшIэн зэхищэным, цIыфхэм IэпыIэгъу афэхъуным, ахэр къыухъумэнхэм тапэкIи анаIэ зэрэтырагъэтыщтыр ГъэIорышIапIэм ипащэ къыIуагъ. КIАРЭ Фатим.
Сурэтыр Iэшъынэ Аслъан тырихыгъ.