Щынэгъончъэнхэм пае
АР-м и ЛIышъхьэу КъумпIыл Мурат тхьамэтагъор зыщызэрихьэгъэ зэхэсыгъо терроризмэм пэшIуекIогъэнымкIэ Комиссиеу АР-м щызэхащагъэм тыгъуасэ иIагъ.
ИлъэсыкIэ мэфэкIхэр щынэгъончъэнхэм, дин организациехэр терроризмэм щыухъумэгъэнхэм фэгъэхьыгъэ унашъоу УФ-м и Правительствэ къышIыгъэм игъэцэкIэн, нэмыкIхэм ащ щатегущыIагъэх.
АР-м хэгъэгу кIоцI IофхэмкIэ иминистрэ иIэнатIэ зыгъэцакIэгорэ Александр Евсеевым къызэриIуагъэмкIэ, коронавирусым зимыушъомбгъуным фэшI цIыфыбэ зыхэлэжьэрэ Iофтхьабзэхэр зэхамыщэнхэу АР-м и ЛIышъхьэ унашъо къышIыгъ. Терроризмэм, экстремизмэм япхыгъэ бзэджэшIагъэхэр зэрамыхьанхэм пае щынэгъончъэнымкIэ Федеральнэ къулыкъум и ГъэIорышIапIэу АР-м щыIэм, Росгвардием и ГъэIорышIапIэ Iоф адашIэ, народнэ дружинэхэм ыкIи къэгъэгъунэнымкIэ унэе организациехэм ялIыкIохэри ащ къыхагъэлажьэх.
ИлъэсыкIэ ыкIи рождество мэфэкIхэм хэгъэгу кIоцI IофхэмкIэ Министерствэм иподразделениехэм гъэлъэшыгъэу Iоф ашIэщт.
— Илъэсэу икIырэм бзэджэшIагъэу республикэм щызэрахьагъэр процент 14-кIэ нахь макIэ хъугъэ. Ар МВД-м ишIушIагъ. ТапэкIи ар лъыжъугъэкIотэн, къэкIощт илъэсым джыри нахь макIэ зэрэхъущтым шъупылъын фае, — къыIуагъ КъумпIыл Мурат.
Республикэм ипащэ мэфэкIэу къэблагъэхэрэм ГИБДД-м ыкIи УФ-м и МЧС и ГъэIорышIапIэу АР-м щыIэм яIофшIэн нахь агъэлъэшынэу, къушъхьэхэр зэпызычырэ гъогухэм анахьэу алъыплъэнхэу къафигъэпытагъ.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэррэ Росгвардием и ГъэIорышIапIэу АР-м щыIэм ипащэу Иван Гричановымрэ къызэраIуагъэмкIэ, дин организациехэм яобъект 50 республикэм ит. Мы учреждениехэр зэрэщынэгъончъэхэр къэзыушыхьатырэ тхылъхэм ягъэпсын 2021-рэ илъэсым ыкIэм нэс аухынэу АР-м и ЛIышъхьэ къафигъэпытагъ.
— Экстремизмагъэ зыхэлъ хэбзэукъуагъэхэр зэкIэ зэхэфыгъэн фае. ТапэкIэ ащ фэдэ бзэджэшIагъэр зэхащэнэу ыуж зыщихьэгъэхэ апэрэ уахътэхэм къычIэгъэщыгъэнымкIэ ащ ишIуагъэ къэкIощт. Ащ пае хэбзэ органхэми, дин ыкIи общественнэ организациехэми, СМИ-ми Iоф зэдашIэн фае, — къыIуагъ КъумпIыл Мурат.