Апэрэу Астрахань щыIагъэх
Адыгэ Республикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэм икъэгъэлъэгъонхэр апэрэу Астрахань щыкIуагъэх.
Адыгеим икъэралыгъо гъэпсыкIэ илъэси 100 зэрэхъурэм фэгъэхьыгъэ Iофтхьабзэхэр Камернэ музыкальнэ театрэу А. Хьанэхъум ыцIэ зыхьырэм зэхещэх. Къуекъо Налбый ытхыгъэм техыгъэу «Волшебная овечка» зыфиIорэ мюзиклэр Астрахань иныбжьыкIэ театрэ тиартистхэм къыщагъэлъэгъуагъ. Орэдышъор композиторэу Тхьабысымэ Умарэ ыусыгъ. Режиссерэу Виктор Серебрянскэм къэгъэлъэгъоныр ыгъэуцугъ.
— Адыгэ лъэпкъ драматургиер Урысыем ишъолъырхэм нахьышIоу ашIэным фэшI Къуекъо Налбый ытхыгъэхэм ащыщхэр къыхэтхыгъэх, — къытиIуагъ Адыгэ Республикэм и Къэралыгъо Камернэ музыкальнэ театрэ ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — Адыгэхэм якультурэ, ятарихъ, яшэн-хабзэхэр театрэм икъэгъэлъэгъонхэмкIэ лъэпкъ зэфэшъхьафхэм алъытэгъэIэсых.
Спектаклэр гъогогъуищэ Астрахань къыщагъэлъэгъуагъ. Режиссерэу Виктор Серебрянскэм ныбджэгъуныгъэм имэхьанэ едзыгъохэм IупкIэу къащызэIуехы. Цыхьэ зэфэпшIыным, зэгурыIоныгъэм щыIэныгъэм мэхьанэу щыряIэм, IэпыIэгъу узэфэхъужьыным, нэмыкIхэм яхьылIэгъэ къэшIыныр кIэлэцIыкIухэм, ны-тыхэм ашIогъэшIэгъон. Мэлымрэ дышъэмрэ уахадэмэ къыхэпхыщтым урегъэгупшысэ.
Артистхэм къашIырэ рольхэм псэ къапагъакIэ. Образхэм куоу ахэхьэх, пшысэм техыгъэ къэгъэлъэгъоныр тилъэхъан щыхъугъэм фэдэу мюзиклэм уеплъы.
Ольга Шадринам нэнэжъ ироль къешIы. Светлана Корнеевам шъэожъыеу Къэплъан къегъэлъагъо. Нэнэжъымрэ кIалэмрэ язэдэгущыIакIэ, нэнэжъ игумэкIхэр Къэплъан зэхыригъэшIыкIыхэ шIоигъоу зэреушъыирэр артистхэм гъэшIэгъонэу къагъэлъагъо.
НэгъучIыцэр нэнэжъ фэдэп. ИеплъыкIэхэр гурыIогъуае къытщэхъу. Ролыр ЛIый Бэллэ къышIызэ, нэгъучIыцэр зыфэдэ шъыпкъэр гукIэ къыуегъашIэ. «Артисткэм ролыр шIогъэшIэгъона?» зыфэпIощт упчIэр шъхьэм къехьэ. НэгъучIыцэу ущытыныр Iоф къызэрыкIоп. Артисткэм ар къыдилъытэзэ, ролыр къызэIуехы.
Мэлым, тыгъужъым, тхьакIумкIыхьэм, иныжъым, нэмыкIхэм ярольхэр Наталья Амельченкэм, Ирина Минкарскаям, Наталья Авдеевам, Сергей Тарусиным, Анастасия Шопинам, Елена Сороковскаям, Елизавета Савинцевам къашIых.
ЗекIо зежьэхэм, ошIэ-дэмышIэу зэныбджэгъухэр къиныгъохэм ахэфагъэх. ЗэгурыIоныгъэу ахэлъым, лъытэныгъэу зэфашIырэм ишIуагъэкIэ зэкъоуцохи, къиным щыщынагъэхэп, хэкIыпIэ къагъотыгъ. Ныбджэгъуныгъэм имэхьанэ артистхэм мюзиклэм дэгъоу къыщагъэлъагъо. Спектаклэр непэрэ хъугъэ-шIагъэхэм гукIэ къяощалIэ…
Дэгъоу къапэгъокIыгъэх
Адыгэ Республикэм иартистхэм бысымхэр къафэразэхэу бэрэ Iэгу къафытеуагъэх. Ащ дакIоу, Астрахань иныбжьыкIэ театрэ ихудожественнэ пащэу Сергей Тараскиным, театрэм ипащэу Инна Москвинам, театрэм иартистхэм зэхэщэн Iофыгъохэр, культурэм фэгъэхьыгъэ Iофтхьабзэхэр гъэшIэгъонэу зэхащагъэх. Адыгеим икIыгъэхэр консерваторием, оперэм ыкIи къашъом ятеатрэ, Астрахань ичIыпIэ дахэхэм ащыIагъэх. Я ХVI-рэ лIэшIэгъум ашIыгъэ Кремлэу Астрахань дэтым, фэшъхьафхэм яхьылIэгъэ къэбархэр къафаIотагъэх.
Камернэ музыкальнэ театрэм иартистхэм къызэраIуагъэу, Астрахань къыщалъэгъугъэр, къыщызэхахыгъэр бэрэ агу къэкIыжьыщт.
Адыгэ Республикэм культурэмкIэ и Министерствэ кIэщакIо фэхъуи, Камернэ музыкальнэ театрэр Астрахань зэрэщыIагъэм ишIуагъэкIэ республикэмрэ хэкумрэ ятворческэ IофышIэхэр нахьышIоу зэрэшIагъэх.
Театрэм ихудожественнэ пащэу Сулейманов Юныс къызэрэтиIуагъэу, Адыгеим икъэралыгъо гъэпсыкIэ илъэси 100 зэрэхъурэм фэгъэхьыгъэ Iофхэм театрэр тапэкIи ахэлэжьэщт, Урысыем ишъолъырхэм къэгъэлъэгъонхэр ащызэхищэщтых.