«АГУ-Адыиф» Мыекъуапэ – «Уфа-Алиса» Уфа – 25:17 (12:10). Тыгъэгъазэм и 13-м Адыгэ Республикэм испорт Унэшхоу «Кобл Якъуб» зыфиIорэм щызэдешIагъэх.

«АГУ-Адыиф»: С. Кожубекова, Баскакова, ешIакIохэр: Клименко — 1, Краснокутская — 1, Никулина, Кириллова, Серадская — 3, Морозова — 6, Богданова — 1, Измайлова — 5, А. Куцевалова — 1, Казиханова — 1, Дмитриева — 1, Кобл — 1, Ю. Кожубекова — 2, Стрельцова — 2.

«Адыифым» текIоныгъэр къызэрэдихыщтыр къыхэщэу зэIукIэгъур Мыекъуапэ щыкIуагъ. КъэлэпчъэIутэу Светлана Кожубековар цыхьэшIэгъоу ешIагъ. УхъумакIохэу Дарья Богдановар, Ирина Клименкэр «Уфа-Алисэм» иешIакIохэм кIуапIэ арамытэу, къэлапчъэм гуфит-шъхьафитэу дэмыонхэмкIэ пэрыохъу афэхъун­хэ алъэкIэу зэIукIэгъум хэлэжьагъэх.

Анастасия Серадскаям ухъу­мэн Iофыгъохэр дэгъоу зэригъэ­цэкIагъэхэм имызакъоу, гъогогъуи 3 «Уфам» икъэлапчъэ Iэгуаор дидзагъ, ешIэкIо анахь дэгъоу зэхэщакIохэм къыхахыгъ.

Алина Морозовам гъогъогуи 6 къэлапчъэм Iэгуаор дидзагъ. «Адыифыр» «Университетым» зыдешIэм, А. Морозовам гъогогъуи 7 хъагъэм Iэгуаор ридзагъ. Урысыем ихэшыпыкIыгъэ ныбжьыкIэ командэ Мыекъуапэ щыщ пшъашъэр хэт, иIэпэIэсэныгъэ хэпшIыкIэу хегъахъо.

Ангелина Куцеваловар, Юлия Кожубековар, Елизавета Краснокутскаяр, Дарина Казихановар «Адыифым» инеущрэ мафэ лъы­зыгъэкIотэщтхэм ащыщых. Пшъа­шъэхэр гуетыныгъэ ахэлъэу зэ­IукIэгъухэм ахэлажьэх.

— Кобл Зурет, Галина Измайловар, Анастасия Серадскаяр, Алина Морозовар «Уфам» дешIагъэхэм къахэзгъэщыхэ сшIоигъу, — къытиIуагъ клубэу «Адыифым» итренер шъхьаIэу Никита Голуб. — Зэхэщэн Iофхэр ешIапIэм щагъэцакIэзэ, хъагъэм Iэгуаор радзэ. НэмыкI пшъашъэхэри дэгъоу ешIагъэхэу сэлъытэ. Опыт зиIэхэм зэIукIэгъум текIоныгъэр къыщыдахыным зыфагъэхьа­зырзэ, нахь ныбжьыкIаIохэр зылъа­щэх.

Тыгъэгъазэм и 19-м «Адыифыр» Краснодар щыIукIэщт клуб цIэрыIоу «Кубань» зыфиIорэм. Тыгъэгъазэм и 26-м командэхэр Мыекъуапэ щызэдешIэщтых. «Адыифыр» ауж къинэхэрэм ахэтыжьэп, игъэхъагъэхэм ахигъэхъонэу фэтэIо.

ЧIыпIэхэм тызэпяплъы

1. «Ростов» — 20 2. «Астраханочка» — 18 3. «Звезда» — 18 4. ЦСКА – 18 5. «Лада» — 14 6. «Кубань» — 10 7. «Ставрополье» — 8 8. «АГУ-Адыиф» — 6 9. «Университет» — 6 10. «Динамо» — 4 11. «Луч» — 4 12. «Уфа-Алиса» — 0.