Сурэти 100-м нахьыбэ къагъэлъэгъуагъ
Республикэм икIэлэегъаджэхэм живописымкIэ, бгъэфедэн плъэкIырэ искусствэмкIэ язэнэкъокъу Мыекъуапэ щыкIуагъ.
Адыгэ Республикэм и Къэралыгъо программэу “Культурэм ихэхъоныгъэ» хэхьэрэ Iофтхьабзэр я XI-у зэхащагъ. Адыгэ къэралыгъо университетым кIэлэегъаджэхэм ашIыгъэ сурэти 100-м нахьыбэ къыщагъэлъэгъуагъ. Республикэм культурэмкIэ и Министерствэрэ искусствэхэмкIэ кIэлэцIыкIу еджапIэу N 1-м методикэмкIэ игупчэрэ зэхащэгъэ зэнэкъокъур кIэлэегъаджэхэм яIофшIэн нахьышIоу зыфагъэсэным, опытэу яIэр гъэфедэгъэным, искусствэр цIыфхэм нахь куоу алъыгъэIэсыгъэным афэгъэхьыгъ.
Живописым, графикэм, бгъэфедэн плъэкIырэ искусствэм, лъэпкъ IэпэIасэхэм яIофшIагъэхэм уяплъынкIэ гъэшIэгъоныгъэх. Шъом, мыжъом, пхъэм ахашIыкIыгъэ пкъыгъохэр, дышъэ идыкIыгъэхэр, тхъукIэ ашIыгъэхэр, фэшъхьафхэр лъэгъупхъэх. Бгъэфедэн плъэкIырэ искусствэр анахь узыIэпызыщэрэмэ ащыщ.
ОсэшI купым ипащэу, Адыгэ кIэлэегъэджэ колледжэу Андырхъое Хъусенэ ыцIэ зыхьырэм икIэлэегъаджэу, Адыгэ Республикэм изаслуженнэ сурэтышIэу Хъуажъ Рэмэзан къызэрэтиIуагъэу, сурэтышIхэм яшIэныгъэ зэрэхагъахъорэр къэгъэлъэгъоным къеушыхьаты. КIэлэегъаджэхэм щыIэныгъэм диштэу Iоф зыдашIэжьы. Сурэтхэр щыIэныгъэм къыхэхыгъэх. Рагъэджэ- рэ кIэлэеджакIохэм сурэтышI цIэрыIохэр къахэкIыщтхэу уагъэгугъэ.
ОсэшI купым хэтыгъэх зэлъашIэрэ сурэтышIэу, архитекторэу Урысыем культурэмкIэ изаслуженнэ IофышIэу Адыгеим и Къэралыгъо премие къызыфагъэшъошагъэу Бырсыр Абдулахь, Адыгеим изаслуженнэ сурэтышIэу Ольга Бреславцевар.
Зэнэкъокъум изэфэхьысыжьхэр купищэу гощыгъэх. Яблоновскэ кIэлэцIыкIу еджапIэм икIэлэегъаджэу Артем Артищук шъофым ит къэгъагъэхэр сурэт зэришIыгъэхэм фэшI апэрэ чIыпIэр къыдихыгъ. Живописым ятIонэрэ чIыпIэр Ирина Рожковам къыщихьыгъ.
Графикэм Светлана Яшенковам апэрэ чIыпIэр къыщыдихыгъ. Адыгеим икъушъхьэхэр сурэтым къыщегъэлъагъох. С. Яшенковам АР-м искусствэхэмкIэ иколледжэу Тхьабысымэ Умарэ ыцIэ зыхьырэм кIэлэегъаджэу Iоф щешIэ.
Бгъэфедэн плъэкIыщт искусствэм фэгъэхьыгъэ зэнэкъокъум ятIонэрэ чIыпIэр нэбгыри 3-мэ къыщыдахыгъ. Елена Абакумовар, Павел Мартыненкэр, Галина Овчинниковар зэхэщакIохэм къыхагъэщыгъэх.
ХагъэунэфыкIырэ чIыпIэхэр къыдэзыхыгъэхэм ащыщых Мария Кулатаевар, Иван Извековыр, Тутарыщэ Еленэ, Ольга Амаловар, Светлана Иваненкэр, нэмыкIхэри.
КIэлэегъаджэхэр нахьышIоу зэрэшIагъэх, ятворчествэ хагъэхъуагъэу алъытэ, зэхэщакIохэм афэразэх.