Адыгэ Республикэм и Урыс драматическэ театрэу А. С. Пушкиным ыцIэ зыхьырэр я ХVII-рэ Дунэе лъэпкъ фестивалым лауреат щыхъугъ.

Урысые Федерацием иурыс театрэхэр, IэкIыб къэралхэм ятеатрэхэр «Зэкъошныгъэм илъэмыдж» зыфиIорэ фестивалым хэлэжьагъэх.

Урысыем бэшIагъэу щызэхащэрэ фестивальхэм «Зэкъошныгъэм илъэмыдж» ащыщ. Мэфи 9-м къыкIоцI спектаклэ 12 театрэхэм къагъэлъэгъуагъ. Онлайн шIыкIэм имызакъоу, занкIэу эфирым къихьэхэзэ, театрэхэм якъэгъэ­лъэгъонхэм искусствэр зышIогъэшIэгъон­хэр яплъыгъэх.

Волгэ Iупэ, Темыр Кавказым, Къыблэм ятеатри 10 фестивалым щызэIу­кIагъ. Темыр Осетием — Аланием и Урыс театрэу Е. Вахтанговым ыцIэ зыхьырэр, Чувашием идраматическэ театрэ, Абхъазым и Къэралыгъо Урыс драматическэ театрэу Ф. А. Искандер ыцIэ зыхьырэр, Казань иакадемическэ Урыс театрэу В. И. Качаловым ыцIэ зыхьырэр, Мордовием и Къэралыгъо Урыс театрэ, нэмыкIхэри Дунэе фестивалым зэфищагъэх.

Дзэм ижурналистхэм афэгъэхьыгъэ къэгъэлъэгъонэу Адыгэ Республикэм и Урыс театрэ ыгъэхьазырыгъэр Зоя Чернышовам ипьесэ техыгъ. «Мэкъи­тIумэ яхьылIэгъэ романс» зыфиIорэ къэгъэлъэгъоныр шIулъэгъум къытегущыIэ. Заом машIор зыщыкIагъэстырэ лъэхъаным шIулъэгъум чIыпIэу щыриIэм пьесэм ухещэ. Ары шъхьае, шIулъэгъум­рэ цIыфхэмрэ заом зэпэчыжьэ ешIых. ЩыIэныгъэм къырыкIощтыр сыдигъуи къэшIэгъуае. Заом ыуж апэрэ мамыр мафэм шIу зэрэлъэгъугъэхэр къэзэрэгъотыжьыгъэх…

Театрэм икъэгъэлъэгъон зэхьылIа­гъэр щыIэныгъэм имэфэ къызэрыкIохэм афэдэп шъхьае, ащ фэдэ къэгъэлъэгъон­хэр бэрэ театрэхэм къащагъэлъагъох. Гуфэбэныгъэу цIыфхэм зэфыряIэр, шIулъэгъу къабзэр щыIэныгъэм щыпхыращын зэралъэкIырэр, нэплъэгъукIэ зэраIон алъэкIырэр, цIыфыр цIыфым фэзыщэрэр артистхэм едзыгъохэм къа­щагъэлъэгъуагъ.

«Современная драматургия» зыфиIорэ журналым исовет хэтэу, гъэзетэу «Вахтановец» зыфиIорэм иредактор шъхьаIэу, Башкортостан культурэкIэ изаслуженнэ IофышIэу, театроведэу Валентина Федоровам осэшI купым ыцIэкIэ Адыгеим итеатрэ къыщытхъугъ.

Артистхэу Оксана Светловамрэ Олег Ковалевымрэ роль шъхьаIэхэр къашIыхэзэ, щыIэныгъэм куоу узэрэхащэрэм осэшIхэм мэхьэнэ ин ратыгъ.

КъэшъуакIохэу Оксана Нуреевамрэ Максим Сапичрэ пчэгум зэрэщыуджыхэрэм гупшысэу уагъэшIырэр искусствэ лъагэм къыпкъырэкIы. Артистхэм пкъыр ищыгъэу, едзыгъом щыщ пычыгъом гукIэ хэхьанхэ зэралъэкIырэр фэIэпэIасэхэу къагъэлъагъо.

Пьесэм хэлъ гупшысэу цIыфым ыгу ихъыкIырэмрэ къашъомрэ зэдештэх. Артистхэр къэгъагъ Iэрамым фэбгъадэхэ пшIоигъоу къэгъэлъэгъоным узыIэпещэ.

Республикэм и Урыс театрэ фестивалым лауреат щыхъугъ, республикэу Марий Эл и Правительствэ ирэзэныгъэ тхылъ къыфагъэшъошагъ. Режиссерыр Шъхьэтум Андзаур.

— Фестивалым лауреат тызэрэщы­хъугъэм тигъэгушIуагъ, — къытиIуагъ республикэ Урыс театрэу А. С. Пушкиным ыцIэ зыхьырэм ипащэу, Адыгэ Республикэм изаслуженнэ артистэу Роман Корчагэ. — Тиартистхэм, зэхэщакIохэм тафэраз. Адыгеим культурэмкIэ и Министерствэ хэушъхьафыкIыгъэу «Тхьашъуегъэпсэу» есIожьы сшIоигъу.

Урыс театрэу А. С. Пушкиным ыцIэ зыхьырэм 2021-рэ илъэсыкIэм фэгъэ­хьыгъэ къэгъэлъэгъонхэр егъэхьазырых. Адыгеим икъэралыгъо гъэпсыкIэ илъэси 100 зэрэхъурэм ехьылIагъэр театрэм щагъэуцущт, юбилеим фэгъэхьыгъэ Iоф­тхьабзэхэр зэхащэщтых.

Роман Корчагэ зэрилъытэрэмкIэ, лъэпкъхэр зэфэзыщэрэ фестивальхэр гъэшIэгъоных. Пащэхэр, артистхэр нэIуа­сэ зэфэхъух, искусствэм ехьылIэгъэ къэбархэр къызэфаIуатэхэзэ яшIэныгъэ хагъахъо, язэкъошныгъэ мэпытэ, театрэм цIыфхэр зэфещэх.

Опсэу, Дунэе фестивалыр! Лъэпкъхэр зэфэзыщэрэ лъэмыджыр щыIэныгъэм лъэгъохэщ щытфэхъу.

ЕмтIылъ Нурбый. Сурэтхэр фестивалым къыщытырахыгъэх.