Зыми фэмыдэу мэлъыхъо
Адыгэ Республикэм культурэмкIэ изаслуженнэ IофышIэу Ирина Бредихинам сурэтэу ышIыгъэхэм якъэгъэлъэгъон Мыекъуапэ къыщызэIуахыгъ.
Республикэм культурэмкIэ и Министерствэ, Мыекъуапэ сурэт къэгъэлъэгъуапIэу дэтым якъулыкъушIэхэм язэхахьэ искусствэр зышIогъэшIэгъонхэр, шIэныгъэлэжьхэр, журналистхэр хэлэжьагъэх.
Сурэт къэгъэлъэгъуапIэм ипащэу, зэлъашIэрэ сурэтышIэу, архитекторэу Бырсыр Абдулахь Iофтхьабзэр зэрищагъ. Ащ изэфэхьысыжьхэм къащыхигъэщыгъ Ирина Бредихинам иIэпэIэсэныгъэ живописым, графикэм къащигъэлъагъозэ, цIыфхэм гукIэ алъыIэсын зэрилъэкIырэр.
Сурэтым икъежьакI
Пшызэ къэралыгъо университетым художественнэ графикэмкIэ ифакультет Ирина Бредихинам къыухыгъ, сурэтышIхэм я Союз хэт, Мыекъопэ художественнэ еджапIэм ипащ. Исэнэхьат гум щыщ зэрэхъугъэр къытфиIуатэзэ, пшъашъэхэм ащыщ иеплъыкIэхэм къащыхигъэщыгъэр тшIогъэшIэгъоныгъ.
— Ирина Бредихинам шъо зэфэшъхьафхэр ыгъэфедэхэзэ, сурэт пэпчъ екIолIэкIэ хэхыгъэ къыфегъоты, — къыIуагъ республикэм искусствэхэмкIэ иколледж щеджэрэ пшъашъэм.
Урысыем исурэтышIхэм я Союз хэтэу, искусствоведэу Людмила Гунинам иеплъыкIэхэр тшIогъэшIэгъоных. Къэгъагъ Iэрамхэр ащ зэрегъапшэх. Шъофым къыщыкIырэ къэгъагъым къошыныр сыдэущтэу къыгъэдэхэщта? Къэгъагъ шхъуантIэр, плъыжьыр, гъожьыр сыдэущтэу къаугъоихэра? Зы Iэрам зыпшIыхэкIэ зэдештэха, дахэ мэхъуха?
Ядэхагъэ узыIэпещэ
…ЗэлъашIэрэ артисткэу Лариса Долинам къэгъагъым фэгъэхьыгъэ орэдыр къыIо зыхъукIэ, хъулъфыгъэхэр нахь куоу регъэгупшысэх. Сыд фэдэ къэгъагъа бзылъфыгъэм ритыщтыр?
Адыгэ Республикэм инароднэ артисткэу Нэгъой Маринэ «Къэгъагъ Iэрам» зыфиIорэ орэдыр мэкъэ дахэкIэ къызыхидзэкIэ, ухэщэтыкIы. Къэгъагъыр, орэдыр, шIулъэгъур — ахэр зэзыпхырэ кIуачIэм икъежьапIэ улъэхъу.
Гум зэрэрихьырэм тетэу къошыным къэгъагъыр ебгъэкIу пшIоигъоми, Ирина Бредихинам игупшысэхэр къыдэплъытэнхэр нахьышIу.
Сурэт 59-рэ иIофшIагъэхэм къахихыгъэу И. Бредихинам къегъэлъагъо. Къэгъагъ Iэрамыр сурэтыбэмэ ащыолъэгъуми, зэрэзэфэмыдэхэр къыхэбгъэщы- зэ, узыIэпащэ, уяплъы.
СурэтышIыр гуфит-шъхьафитэу мэгупшысэ. Унэшъо хэхыгъэ къыфашIызэ сурэтхэр ышIыгъэхэу тлъытэрэп. Философие хэлъэу цIыфым ыгу ихъыкIырэр къэгъагъымкIэ къыгъэлъагъо шIоигъу.
Тыкъэзыуцухьэрэ дунаир сурэтхэмкIэ къегъэлъагъох. Ар зытыришIыкIыгъэ шъоф зэикIыр, псэупIэр, зыгъэпсэфыпIэр къэошIэжьых. Гупшысэу иIэр сурэтым рипхызэ, къэгъагъэхэм ашъохэр хегъэунэфыкIых.
МыIэрысэр, Iанэм тет шхыныгъохэр, фэшъхьафхэри исурэтхэм ахэтэлъагъох. Сэнашъхьэм итеплъи сурэтым къыщыхэогъэщы. Чъыгхатэхэр нэплъэгъум итых. Унагъом шхыныгъоу щагъэхьазырырэм нэсыжьэу сурэтхэм къаIуатэрэр макIэп.
Дунаим идэхагъэ зыфегъазэ, сурэтым къыщиIотэщтыр къыхехы. Пчэдыжьыр, мэфэ оялэр, гъатхэм идэхэгъу, нэмыкIхэри сурэтышIым гукIэ къыреIотыкIых. Узыфэщагъэр сурэт пшIыныр нахь IэшIэхэу зэрэщытыр И. Бредихинам иIофшIагъэхэм ахэолъагъо.
ЕплъыкIэхэм уагъэгупшысэ
Студентхэм, кIэлэеджакIохэм къаIуатэрэм тедэIузэ, искусствэм ящыIэныгъэ езыпхыгъэхэм гущыIэгъу тафэхъугъ.
— ЩыIэныгъэм къыхэхыгъэ сурэтхэр дахэх, шъо зэфэшъхьафхэмкIэ гъэкIэрэкIагъэх, — къытиIуагъ КъокIыпIэм щыпсэурэ лъэпкъхэм искусствэхэмкIэ я Къэралыгъо музей икъутамэ ипащэ игуадзэу Сулейман Фатимэ. — Ирина Бредихинар иIофшIэн ишъыпкъэу пылъ.
— ЗэкIэ сурэтхэм сяплъыгъ. Искусствэр дэгъоу къызэрэгурыIорэр Ирина Бредихинам исурэтхэм къагъэлъагъо. ТищыIэкIэ-псэукIэ къызэриIотэрэ шIыкIэм бэмэ саригъэгупшысагъ. Ылъэгъурэр зытетым тетэу цIыфхэм алъигъэIэсын елъэкIы, — къытиIуагъ сурэтышI цIэрыIоу Хъуажъ Рэмэзан.
КIэлэегъаджэу Ирина Швачкэ къызэриIуагъэу, Ирина Бредихинам иIофшIагъэрэ ищыIэныгъэрэ зэпхыгъэх.
Искусствэм щыцIэрыIохэу Бырсыр Абдулахь, Къуекъо Маринэ, ХъокIо Ларисэ ягуапэу къэгъэлъэгъоным еплъыгъэх. Сурэтхэм якупкI гурыIогъошIу къафэхъугъ.
И. Бредихинам иIофшIагъэ ехьылIэгъэ буклетэу къыфыдагъэкIыгъэр дахэу зэгъэкIугъэ. Сурэтхэр «къыбдэгущыIэщтхэм» фэдэу къэлъагъох.
— Адыгэ Республикэм культурэмкIэ и Министерствэ, республикэм исурэт къэгъэлъэгъуапIэ лъэшэу сафэраз. Министрэу Аулъэ Юрэ, къэгъэлъэгъуапIэм ипащэу Бырсыр Абдулахь шъхьафэу «тхьашъуегъэпсэу» ясIожьы сшIоигъу. Буклетыр дэхэ дэд. Сурэтхэм якъэгъэлъэгъон гур зыфищэу зэхащагъ. Зэхахьэм хэлэжьагъэхэм лъэшэу сафэраз, — къыIуагъ Ирина Бредихинам.
КIэлэцIыкIу художественнэ еджапIэм ипащэу И. Бредихинам Iоф ышIэзэ, исурэтхэмкIэ республикэм иискусствэ хэхъоныгъэ ышIыным пылъ.
Адыгэ Республикэм икIэлэцIыкIу еджэпIэ анахь дэгъухэм ащыщым ипащ. Рагъэджэрэ кIэлэцIыкIухэр Адыгеим имызакъоу, Къыблэм, Урысыем язэнэкъокъу-къэгъэлъэгъонхэм ахэлажьэх, хагъэунэфыкIырэ чIыпIэхэр къыдахых.
ШIу зышIэрэр шIум IокIэжьы. И. Бредихинар ишIушIагъэкIэ къытхэт, цIыфхэм агъэлъапIэ. Ригъэджэрэ кIэлэцIыкIухэр, ны-тыхэр, кIэлэегъаджэхэр къыфэразэх.
Къыгоуцуи, сурэт зытырахыгъэ пшъашъэм ыцIэ зэдгъэшIэнэу мыхъугъэми, гуфэбэныгъэу къыфыриIэр инэплъэгъукIэ къызэрэтиIуагъэр гуапэ къытщыхъугъ.
Къэгъэлъэгъоныр Мыекъуапэ щэкIо, еплъы зышIоигъохэр зэхэщакIохэм рагъэблагъэх.
ЕмтIылъ Нурбый.