Шъолъырхэм якъэгъэлъэгъонхэр
Адыгэ Республикэм культурэмкIэ и Министерствэ, Адыгеим и Къэралыгъо филармоние шъолъырхэм яя IV-рэ фестивалэу «Театральное Зазеркалье» зыфиIорэр зэхащагъ.
Хэгъэгум и Къыблэ шъолъыр, Темыр Кавказым ятеатрэхэр Iофтхьабзэм чанэу хэлэжьагъэх.— Фестивалыр кIэлэцIыкIухэм афэгъэхьыгъ, — къытиIуагъ Адыгэ Республикэм культурэмкIэ и Министерствэ испециалист шъхьаIэу Теуцожь Нурыет. — Адыгеир къэралыгъо гъэпсыкIэ иIэу зыпсэурэр илъэси 100 зэрэхъурэм ипэгъокIэу Iофтхьабзэр шэкIогъум и 24-м къыщегъэжьагъэу тыгъэгъазэм и 1-м нэс онлайн шIыкIэм тетэу тиреспубликэ щыкIощт.
Ясэнэхьат рылэжьэрэ театральнэ IофышIэхэр арых яIэпэIэсэныгъэ фестивалым къыщызыгъэлъагъохэрэр. КIэлэцIыкIухэмрэ ныбжьыкIэхэмрэ афэгъэхьыгъэ къэшIыгъохэр фестивалым гъэшIэгъонэу щэкIох.
Бэлъкъар къэралыгъо драматическэ театрэр, Краснодар нысхъэпэ театракIэу щызэхащагъэр, Адыгэ Республикэм и Лъэпкъ театрэу И. Цэим ыцIэ зыхьырэр, Адыгэ Республикэм и Камернэ музыкальнэ театрэу А. Хьанэхъум ыцIэ зыхьырэр, Адыгеим и Къэралыгъо филармоние инысхъэпэ театрэу «Дышъэ къошыныр», Къэрэщэе-Щэрджэсым, Ингушетием, Чэчэным ятеатрэхэр, Адыгеим и Урыс къэралыгъо драматическэ театрэу А. С. Пушкиным ыцIэ зыхьырэр, нэмыкIхэри фестивалым хэлажьэх.
Апэрэ къэгъэлъэгъонхэр зэхэщакIохэм ашIогъэшIэгъонэу кIуагъэх. Театрэм кIэлэцIыкIухэмрэ ныбжьыкIэхэмрэ зэрипIухэрэр фестивалым къыщыхагъэщых. ОсэшIхэм язэфэхьысыжьхэм гъэзетеджэхэр ащыдгъэгъозэщтых.