Спортымрэ еджэнымрэ зэгъусэх
Урысыем спортымкIэ изаслуженнэ мастерэу ыкIи изаслуженнэ тренерэу Григорий Веричевым фэгъэхьыгъэ шIэжь-зэнэкъокъур Челябинскэ джырэблагъэ щыкIуагъ.
Санкт-Петербург, Москва, Алтай, Красноярскэ крайхэм, Самарэ, Челябинскэ, Адыгеим, нэмыкIхэм къарыкIыгъэ бэнакIохэр зэIукIэгъум хэлэжьагъэх.
Адыгэ Республикэм изаслуженнэ тренерэу Адзынэ Алый япащэу Анна Лодневамрэ Ульяна Ткаченкэмрэ алырэгъум щянэкъокъугъэх. Апэрэ чIыпIэхэр къыдэзыхыхэрэр Урысыем спортымкIэ имастер зэрэхъущтхэм фэшI зэIукIэгъу пэпчъ мэхьэнэ ин иIагъ. А. Лодневамрэ У. Ткаченкэмрэ Урысыем спортымкIэ имастер хъунхэмкIэ кандида- тых. Типшъашъэхэм я 5-рэ чIыпIэхэр къыдахыгъэх.
— Адыгэ къэралыгъо университетым физкультурэмрэ дзюдомрэкIэ и Институт Ульяна Ткаченкэр щеджэ. Мыекъопэ къэралыгъо гуманитар-техническэ колледжым Анна Лодневам ишIэныгъэ щыхегъахъо, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлымэ. — Типшъашъэхэм ухьазырыныгъэ дэгъу Челябинскэ къыщагъэлъэгъуагъ. ЯIэпэIэсэныгъэ зэрэлъагъэкIуатэрэм тегъэгушIо.
— Къыблэм дзюдомкIэ изэнэкъокъу апэрэ чIыпIэр къыщыдэзыхыгъэ Ткаченкэр спорт унагъом щапIугъ. Ащ ышыпхъу нахьыжъэу Еленэ дзюдомкIэ хэгъэгу зэнэкъокъухэм ахэлажьэщтыгъ, — къеIуатэ Адзынэ Алый. — Челябинскэ тызэрэщыIагъэм ишIуагъэкIэ хэгъэгум ишъолъырхэм бзылъфыгъэ дзюдом зэращыпылъхэм нахьышIоу зыщыдгъэгъозагъ.
Анна Лодневар самбэмкIи мэбанэ. Исэнаущыгъэ спортым къыщызэIуихызэ, имурадхэм афэкIо. Спортымрэ еджэнымрэ зэрэзэгъусэхэм ишIуагъэкIэ пшъашъэхэм яхэхъоныгъэхэр нахьыбэ мэхъух.