Ижъырэ адыгэ лъэпкъ къашъоу «Ислъамыем» иорэдышъо тедэIузэ, зэнэкъокъум хэлэжьэщт КIэрэф Азэмат рэхьатэу, ынэхэм гушIуагъо акIэплъагъоу пчэгум къихьагъ.

Къэбэртэе-Бэлъкъарым ща­пIугъэ нарт шъаом адыгэ шъуа­шэр щымыгъыми, ыгу лъэпкъым къызэрэфытеорэр къыхэщэу къа­шъо шIоигъоу къытщыхъугъ. Орэдышъор дахэшъ, тхьакIумэр егъашIо, нэбгырабэ тилъэпкъэгъу батырым Iэгу къыфытео.

МэфэкI зэхахьэм фэдэу рагъэ­жьэгъэ Iофтхьабзэр зэхэпхъэгъэ шъхьэзэкъо зэнэкъокъухэм афэгъэхьыгъ.

Бгырыпхым фэбанэ

АСА-м ибгырыпх къыдэхы­гъэным ехьылIэгъэ зэнэкъокъур Москва щыкIуагъ. Зэхэпхъэгъэ шъхьэзэкъо зэIукIэгъухэм ахэла­жьэх Урысыем ибэнакIохэу КIэ­рэф Азэматрэ Курбан Гаджиевымрэ.

НахьыпэкIэ спортсменхэр зэ­нэкъокъухэу, Азэмат текIоныгъэр Курбан Гаджиевым къышIуихьэу уахътэ къызэрэхэкIыгъэр спортыр зышIогъэшIэгъонхэм ащы­гъупшагъэп.

Пчэгушхом адыгэ орэдышъор щыжъынчызэ, лъэпкъ къашъоу «Ислъамыер» нэгум къыкIэуцо. Адыгеим иартист цIэрыIохэм къашъор концертхэм, пчыхьэзэхахьэхэм къащашIызэ, гур аIэты.

Къашъоу «Ислъамыер»

— Къэралыгъо академическэ къэшъокIо ансамблэу «Налмэсым» сыхэтэу къашъоу «Ис­лъамыер» къызэрэсшIыщтыгъэр не­пэм фэдэу сыгу къэкIыжьы, — къеIуатэ Урысыем изаслу­женнэ артистэу, Адыгеим, Темыр Осетием — Аланием янароднэ артистэу Къулэ Мыхьамэт. — Къашъом купкIэу иIэр, дэхагъэу хэлъыр къыдэслъытэхи, «Нал­мэсым» пае къэшъо шъхьаф згъэуцугъэ.

Адыгеим инароднэ артистхэу НэмытIэкъо Римэрэ Алыбэрд Адамрэ илъэсыбэрэ къашъоу «Ислъамыер» къашIыгъ. Джырэ уахътэ Адыгеим изаслуженнэ артистхэу Бэрзэдж Дианэрэ Едыдж Гушъаорэ «Ислъамыем» къыдэшъох.

Республилкэм и Къэралыгъо орэдыIо-къэшъокIо ансамблэу «Ислъамыем» ихудожественнэ пащэу, Урысыем, Адыгеим янароднэ артистэу, композиторэу Нэхэе Аслъан зэригъэфэгъэ мэ­къамэу «Ислъамыер» концерт пэпчъ щэIу. Артистхэу къашъом хэлажьэхэрэм пчэгур къагъэдахэ.

— «Ислъамыем» илъэсыбэ хъугъэу лъэпкъ къашъор къыщы­сэшIы, — къытиIуагъ Адыгэ Рес­публикэм изаслуженнэ ­ар­тисткэу Лъэустэнджэл Рузанэ. — Къашъор гум иорэдэу сэлъытэ. ШIулъэгъум икъашъоу «Ислъа­мыер» дахэ, иорэдышъор дунаи­шхом щызэхахы, тыдэ щыIугъэ- ми уегъэгушхо.

Азэмат мэуджы

КIэрэф Азэмат зэхэпхъэгъэ зэнэкъокъоу (ММА-м) хэлажьэзэ, АСА 113-м иIэпэIэсэныгъэ къыщигъэлъэгъуагъ. Пчэгум къызе­хьэм, гур зэрэуджырэр, лъэпкъ мэкъамэм гушхоныгъэ къызэ­рэхилъхьэрэр къыхэщыщтыгъ. АдыгабзэкIэ къызэреджэхэрэр, залым гушIогъо зэдэгущыIэгъоу щыIухэрэр спортсменым зэхи­хыщтыгъэх. Тимылъэпкъэгъухэри Iэгу къыфытеощтыгъэх.

Яонтэгъугъэхэм ялъытыгъэу кг 57 — 61-рэ къэзыщэчыхэрэ КIэ­рэф Азэматрэ Курбан Гаджиевымрэ пчэгум щызэнэкъокъугъэх.

Шапхъэхэм къызэрэдалъытэу, зэнэкъокъур едзыгъуи 5 мэхъу. Апэрэ такъикъым къыщегъэжьагъэу А. КIэрэфыр нахь псынкIэу гупшысэщтыгъ. Утын рихэу зыфежьэкIэ, ухъумэн Iофыгъохэр ыгъэцэкIэнхэ зэрэфаер зыIэкIигъэкIыщтыгъэп.

Ящэнэрэ едзыгъор А. КIэрэфым нахь къехьылъэкIыгъэ фэдэу къэлъагъощтыгъэми, зэнэкъокъум къэгъэзапIэ фишIыгъ, текIоны-гъэм екIурэ шIыкIэхэр нахьышIоу къызфигъэфедэнхэ ылъэкIыгъ.

ШIыкIэшIур бгъэфедэныр дэгъу, ау ащ узэрэфэхьазырыр сыдэущтэу къэпшIэщта?

Курбан Гаджиевыр бэнэкIо лъэш, къышIопхьыныр IэшIэхэп. ЫпэкIэ къызилъыкIэ, кIуачIэр дэ­­гъоу егъэфедэ. КIэрэф Азэмат кIуачIэмрэ къулаимрэ зэгъусэхэу шIыкIэхэр къызэригъотыхэрэр зэнэкъокъум къыщигъэлъэгъуагъ.

ОсэшIхэм яеплъыкI

Едзыгъуитфыми КIэрэф Азэмат текIоныгъэр къащыдихыгъ, судьяхэм зыкIыныгъэ ахэлъэу унашъо ашIи, икIэрыкIэу бгырыпхыр къыфагъэшъошагъ.

ЗэхэщакIохэм, тренерхэм, зэ­кIэ къыфэгумэкIыгъэхэм Азэмат зэрафэразэр къыIуагъ. Бгырыпхыр къызыратыжьым, щытхъоу фаIуагъэр макIэп. Ащ ыпэкIи те­кIоныгъэр бэрэ къызэрэдихыгъэр къыIуагъ.

ФэгушIуагъэх

Спортым щыцIэрыIохэр, ныб­джэгъухэр КIэрэф Азэмат фэгу­шIуагъэх.

— Зэнэкъокъум хэлажьи, лъэпкъ­хэм язэфыщытыкIэхэр зэрэбгъэпытэнхэ фаер къыгъэлъэгъуагъ. Азэмат цIыф шъы- рыт, Iушы. Тыгу къыддеIэу тыфэгушIо, — къыIуагъ Мызэ Мурат.

— КIэрэф Азэмат Краснодар щыкIорэ зэнэкъокъум зыхэла­жьэм, иунэкъощхэр, ныбджэгъу­хэр къалэм щеплъыгъагъэх, — къеIуатэ Тхьаркъохъо (КIэрэф) Рузанэ. — Москва щызэхащэгъэ зэнэкъокъуми лъыплъагъэх. Спортым зэунэкъощхэр, зэлъэпкъэгъухэр зэфещэх. НэIуасэ зэ­фишIыгъэхэм язэфыщытыкIэхэр щыIэныгъэм зэрэщылъа­гъэкIуатэрэр лъэшэу сигуапэ. Азэмат игъэхъагъэ тигъэгу­шхуагъ, игушIуагъо зэрэдэдгощырэр гъэзетымкIи етIо тшIоигъу…

Дунэе Адыгэ Хасэм хэтэу Мэщ­фэшIу Нэдждэт, республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан, Хэсашъхьэм хэтхэр КIэрэф Азэмат фэгушIуагъэх, игъэхъагъэхэм ахигъэхъо­нэу фаIуагъ.

Лъэпкъ шIэжьыр, шэн-хабзэхэр щыIэныгъэм щыпхырищыхэзэ, спортышхом щысэшIу къыщызыгъэлъэгъорэ КIэрэф Азэмат ныбжьыкIэхэр кIырэплъых. Искусствэр, пIуныгъэр, спортыр зэзыпхыхэрэм нарт шъаор ащыщ. Спорт шапхъэхэм атетэу зэнэ­къокъухэм ахэлажьэзэ, адыгэ гур лъэпкъым къызэрэфытеорэр зэхэтэхы.

Гъэзетым къыщыхэтыутынэу тхыгъэр дгъэхьазырзэ, зэлъа­шIэ­рэ сурэтышI-модельерэу СтIа­шъу Юрэ тизэдэгущыIэгъу къызэрэщыхигъэщыгъэу, КIэрэф Азэмат ишIуагъэкIэ къэшъо орэ­дэу «Ислъамыер» дунаим щызэха­хыгъ, икъулайкIэ зэунэкъощхэр, лъэпкъхэр зэфищагъэх. Опсэу, Азэмат! Тхьэм бэгъашIэ уешI.

ЕмтIылъ Нурбый.