Дышъэр Адыгеим щэшIэты
Европэм кушъхьэфэчъэ спортымкIэ изэнэкъокъу Болгарием икъалэу Пловдив щыкIуагъ.
Адыгэ Республикэм кушъхьэфэчъэ спортымкIэ иеджапIэ зыщызыгъэсэрэ Александр Евтушенкэр Урысыем ихэшыпыкIыгъэ командэ хэтэу зэIукIэгъухэм ахэлажьи, игъэхъагъэхэмкIэ тигъэгушIуагъ.
Хэгъэгухэм яхэшыпыкIыгъэ командэхэм трекым яIэпэIэсэныгъэ къыщагъэлъэгъуагъ. Урысыем испортсменхэм пэшIорыгъэшъ зэнэкъокъухэм текIоныгъэр къащыдахыгъ. Дышъэм фэгъэхьыгъэ кIэух зэIукIэгъум Урысыемрэ Италиемрэ яухьазырыныгъэ щауплъэкIугъ, километри 4 трекым къыщакIугъ.
Апэ ишъыщтыр язэрэмыгъашIэу командэхэр яшъыпкъэу текIоныгъэм фэбэнагъэх. Тиспортсменхэр язэгурыIоныгъэкIи, яIэпэIэсэныгъэкIи къахэщыгъэх, апэрэ чIыпIэр къыдахыгъ. Италием тыжьыныр ыхьыгъ. Швейцариемрэ Белоруссиемрэ джэрзым фэбэнагъэх, Швейцариер нахь лъэшэу къычIэкIыгъ.
Урысыем ихэшыпыкIыгъэ командэ хэтхэу Александр Дубченкэм, Лев Гоновым, Никита Берсеневым, Александр Евтушенкэм дышъэ медальхэр къафагъэшъошагъэх.
Александр Евтушенкэр Мыекъуапэ щапIугъ, спортымкIэ дунэе класс зиIэ мастер. Адыгэ къэралыгъо университетым физкультурэмрэ дзюдомрэкIэ и Институт ихэшыпыкIыгъэ командэ хэт, Олимпиадэ джэгунхэм ахэлэжьэнэу зегъэхьазыры. Дунаим изэнэкъокъу джэрзыр къыщыдихыгъ, Европэм иныбжьыкIэхэм язэIукIэгъухэм тыжьыныр къащихьыгъ, Урысые Федерацием изэнэкъокъу дышъэр къыщыдихыгъ.
Европэм кушъхьэфэчъэ спортымкIэ изэнэкъокъоу Болгарием щыкIуагъэм Александр Евтушенкэм дэгъоу зыфигъэхьазырыгъ. Зэхэщэн IофхэмкIэ IэпыIэгъу къыфэхъугъэх Адыгэ Республикэм физкультурэмкIэ ыкIи спортымкIэ икомитет итхьаматэу Дэгужъые Мурат, республикэм кушъхьэфэчъэ спортымкIэ и Федерацие ипащэу Анатолий Лелюк.
Александр Евтушенкэм къыфэгумэкIыгъэхэм, спортыр зыгу рихьыхэу къылъыплъагъэхэм «тхьашъуегъэпсэу» ареIожьы. Урысыем ихэшыпыкIыгъэ командэ ипащэхэм, спортсменэу хэтхэм хэушъхьафыкIыгъэу гъэзетымкIи «шъопсэу» ариIожьы шIоигъу.
Тигъэзетеджэхэм ацIэкIэ Александр Евтушенкэм тыфэгушIо, спортышхом илъэгапIэхэм атетэу ищытхъу бэрэ фаIонэу, Адыгэ Республикэм ыцIэ дунаим изэнэкъокъухэм ащиIэтынэу тыфэлъаIо. Опсэу, Александр! Дышъэу къэпхьыгъэр Адыгеим щэшIэты.