ШэкIогъум и 17 – 22-м Адыгэ Республикэм испорт Унэшхоу «Ошъутенэм» волейболымкIэ ешIэгъухэр щыкIощтых.

Урысыем волейболымкIэ изэнэкъокъоу апшъэрэ купэу «Б-м» хэлэжьэрэ командэхэр Мыекъуапэ щызэIукIэщтых.

— Апшъэрэ купым команди 10 хэт, — къытиIуагъ Мыекъопэ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэм. — 2020 — 2021-рэ илъэс ешIэгъум хэхьэрэ апэрэ къекIокIыгъор Воронеж щытиIагъ. ЯтIонэрэ едзы­гъор Мыекъуапэ щыкIощт.

ПэшIорыгъэшъ ешIэгъухэм ауж апэрэ чIыпIи 4-р къыдэзыхыгъэ­хэр медальхэм афэбэнэщтых. Я 5 – 8-рэ чIыпIэхэр зыхьыгъэхэр куп шъхьафым щызэIукIэщтых.

Мыекъопэ «Динамо-МГТУ-р» хагъэунэфыкIырэ чIыпIэхэм якъы­дэхын хэлэжьэн имурад. Воронеж, Къыблэ Сахалин, Грознэм, нэмыкIхэм якомандэхэр зэнэкъо­къущтых. Москва хэкум икомандэ анахь лъэшхэм ащыщ.

Псауныгъэр агъэпытэ

— Волейболыр спорт лъэпкъ гъэшIэгъон. КIэлэцIыкIухэм къащегъэжьагъэу зыныбжь хэкIотагъэхэри волейбол ешIэх, япсауныгъэ агъэпытэ. Физкультурэм пылъхэм япчъагъэ хэдгъэхъоным тыпылъэу Мыекъопэ къэралыгъо технологическэ университетым ныбджэгъу ешIэгъухэр, зэIукIэгъу­хэр щызэхэтэщэх. Студентхэр тикомандэ хэтых, — къеIуатэ Павел Зборовскэм.

«Ошъутенэм» щешIэщтых

ЯтIонэрэ едзыгъом хэлэжьэщт къалэхэм якомандэхэр мафэу зешIэщтхэр. 17.11 Мыекъуапэ — Краснодар 19.11 Мыекъуапэ — Грозный 20.11 Мыекъуапэ — Грозный 22.11 Мыекъуапэ — Махачкала. ЗэIукIэгъухэм ИнтернетымкIэ шъуяплъын шъулъэкIыщт. Я 3-рэ къекIокIыгъор тыгъэгъазэм и 9 — 14-м Кострома щыкIощт.