Экстремизмэм пэшIуекIогъэным фэшI

Адыгэ къэралыгъо университетым епхыгъэ Мыекъопэ къэралыгъо гу­манитар-техническэ колледжым джы­рэблагъэ экстремизмэ нэша­нэ зиIэ шIыкIэхэм ныбжьыкIэхэр ащыухъумэгъэнхэм зыщатегущыIэгъэхэ зэхэсыгъо щыIагъ. Ащ хэлэжьагъ АР-м хэгъэгу кIоцI IофхэмкIэ и Министерствэ иIофышIэу, полицием имайорэу Денис Соф-Оглы.

Мыщ фэдэ Iофтхьабзэхэм пшъэрылъэу яIэр лъэпкъ ыкIи дин зэфыщытыкIэхэр гъэпытэгъэныр, джащ фэдэу студент ныбжьыкIэхэм азыфагу зэгурымыIоныгъэ къимытэджэным фэIорышIэныр ары. АР-м хэ­гъэгу кIоцI IофхэмкIэ и Министерствэ илIыкIо студентхэм къафиIотагъ социальнэ хъытыухэм мыхъущт тхыгъэхэр къарызыгъахьэхэрэм ыкIи хабзэм пэуцужьыхэзэ цIыфыбэ зыщызэрэугъоирэ Iофтхьабзэхэм ахэлажьэхэрэм пшъэдэкIыжьэу ахьын алъэкIыщтыр.

Джащ фэдэу ныбжьыкIэхэр емыгупшысэхэу гъогу пхэндж зытехьэхэкIэ уголовнэ Iоф къапагъэтэджэн зэралъэкIыщтым епхыгъэ Iофыгъом майорэу Соф- Оглы нахь игъэкIотыгъэу къытегущыIагъ. БзэджэшIагъэ зезыхьагъэхэм пшъэдэкIыжь ягъэхьыгъэнымкIэ хэбзэгъэуцугъэу щыIэм зэхъокIыныгъэу фэхъугъэхэм кIэлэцIыкIухэр щигъэгъозагъэх.

Зэхэсыгъом хахьэу экстремизмэм ыкIи терроризмэм апэуцужьыгъэным епхыгъэ пэшIорыгъэшъ Iофтхьабзэу зэрахьэхэрэр къизыIотыкIырэ видеокъэгъэлъэгъоным студентхэр рагъэплъыгъэх. Нэужым кIэлэцIыкIухэм яупчIэхэм полицием икъулыкъушIэ игъэкIотыгъэ джэуап­хэр къаритыжьыгъэх.

Зэнэкъокъум икIэуххэр къэнэфагъэх

УФ-м ихэгъэгу кIоцI къулыкъу иIофышIэхэм я Мафэ ипэгъокIэу Урысые кIэлэцIыкIу творческэ зэнэкъокъум ишъолъыр едзыгъоу «Сянэ-сятэхэр полицием иIофышIэх» зыфиIорэм икIэуххэр республикэм щызэфахьысыжьыгъэх.

Полицием имэхьанэ къэIэтыгъэным имызакъоу, мы сэнэхьатым пшъэдэкIыжьэу пылъыр кIэлэцIыкIухэм къагурыгъэIогъэным, язэхашIэ къэгъэущыгъэным Iофтхьабзэр фэIорышIагъ.

Хэгъэгу кIоцI къулыкъум иIофышIэхэм якIэлэцIыкIухэм ежьхэм къазэрэгурыIорэм фэдэу къулыкъум иIофшIэн зыфэдэр, ащ шIуагъэу ыкIи къинэу пылъхэр сурэтшIыгъэхэмкIэ къыраIотыкIыгъэх.

2020-рэ илъэсым зэкIэмкIи IофшIэгъэ 40 фэдиз къырахьылIагъ, кIэлэцIыкIухэр аныбжьыкIэ илъэси 6-м къыщегъэжьагъэу илъэс 14-м нэсэу зэтеутыгъагъэх. Жюрим хэтыгъэх АР-м хэгъэгу кIоцI IофхэмкIэ и Министерствэ ипащэхэр, ведомствэм епхыгъэу Iоф зышIэрэ Общественнэ советым хэтхэр. ТекIоныгъэр къыдахыгъ Иван Прилуцкэм, Артур Тополян ыкIи Арина Бутенкэм. Мыхэр зэнэкъокъум икIэух едзыгъо хэлэжьэнхэ алъэкIыщт.

Мэзи 9-м къыкIоцI нэбгырэ 30

Адыгэ Республикэм хэгъэгу кIоцI IофхэмкIэ и Министерствэ лъэсрыкIохэр зыхэфэгъэ хъугъэ-шIагъэхэм япчъагъэ зэрэхахъорэм епхыгъэ къэбархэр мымакIэу къетых. Къэралыгъо автоинспекцием иIофышIэхэр анахьэу зыгъэгумэкIыхэрэр мыщ фэдэ гъогу хъугъэ-шIагъэхэм кIэлэцIыкIухэр бэу зарахафэхэрэр ары.

ГущыIэм пае, шэкIогъум и 2-м, пчыхьэм сыхьатыр 8-м такъикъипшIыкIэ ежьагъэу, урамхэу Димитровымрэ Чкаловымрэ ацIэ зыхьыхэрэр зыщызэхэкIыхэрэм дэжь Мыекъуапэ щыпсэурэ бзылъфыгъэу илъэс 30 зыныбжьыр автомобилэу ГАЗ-м исэу илъэс 16 зыныбжь Iэтахъор гъогум тыриутыгъ. Ащ лъапсэ фэхъугъэр зыныбжь имыкъугъэм шапхъэхэр зэриукъуагъэхэр ары. Iэтахъом шъобжхэр тещагъэхэу сымэджэщым нагъэсыгъ.

Статистикэм къызэритырэмкIэ, мы илъэсым имэзи 9-у пыкIыгъэм зыныбжь имыкъугъэхэр зыхэфэгъэ гъогу хъугъэ-шIэгъэ 30 Адыгеим игъогухэм къатехъу­хьагъ. Ахэм нэбгыритIу ахэкIодагъ, нэбгырэ 32-мэ шъобжхэр атещагъэхэ хъугъэ. Хъугъэ-шIэгъэ 30-м щыщэу 9-р кIэлэцIыкIухэм гъогум сакъыныгъэ къызэрэщызхамыгъэфагъэм епхыгъ.

Зэфэхьысыжьхэм къызэрагъэлъагъорэмкIэ, гъогу хъугъэ-шIагъэхэр нахьыбэу зыщагъэунэфыгъэхэр къалэу Мыекъуапэ ары.

Адыгеим и МВД икъулыкъушIэхэм водительхэм зафагъазэ гъогурыкIоным ишапхъэхэр амыукъонхэу, лъэсрыкIо зэпырыкIыпIэхэм сакъыныгъэ къащызхагъэ­фэнэу.

Ны-тыхэм якIэлэцIыкIухэм ренэу агу къагъэкIыжьын фае гъогум щынэгъончъэу щызекIонхэмкIэ шапхъэу щыIэхэр зыфэдэхэр.

Шыбзыхъу Арсен финалым хэлажьэ

Зэнэкъокъоу «Народный участковый 2020» зыфиIорэм икIэух хэлэжьэщт Адыгэ РеспубликэмкIэ полицием истаршэ лейтенантэу Шыбзыхъу Арсен.

ШэкIогъум и 1-м юбилейнэ я X-рэ Урысые зэнэкъо­къоу «Народный участковый 2020» зыфиIорэм иящэнэрэ кIэух едзыгъо рагъэжьагъ. Зэнэкъокъум изэхэщакIохэм ягъусэу тхылътедзэпIэ унэу «Комсомольская правда» зыфиIорэм ихэушъхьафыкIыгъэ портал онлайн шIыкIэм тетэу мэкъэтыныр щэкIо.

Республикэм ыцIэкIэ шъолъыр зэнэкъокъум хэлажьэ МыекъуапэкIэ полицием иучастковэ уполномоченнэу Шыбзыхъу Арсен.

АР-м хэгъэгу кIоцI IофхэмкIэ и Министерствэ Адыгеим щыпсэухэрэм закъыфегъазэ Шыбзыхъум амакъэ­хэр фатынхэу.

Нэжъ-Iужъхэр агъапцIэх

Бысымхэр яунэхэм зэримысхэр ашIэзэ, тыгъуакIохэр ыкIи хъункIа­кIохэр унэхэм арэхьэх, мылъкум епхыгъэ бзэджэшIагъэхэр зэрахьэх. Автомобильхэр Iуафыхэуи макIэп къызэрэхэкIырэр.

ГущыIэм пае, шэкIогъум 2-м Мыекъуапэ идежурнэ часть илъэс 75-рэ зыныбжь хъулъфыгъэм зыкъыфигъэзагъ. Хъулъфыгъэм къызэриIуагъэмкIэ, республикэ гупчэм иурам горэм тетыгъэ икушъхьэфачъэ бзэджа­шIэм Iуифын гухэлъ иIэу къытырихыжьыгъ.

Патрульнэ-постовой къулыкъум иIофышIэхэм пэшIорыгъэшъ Iофтхьабзэу зэрахьагъэхэм яшIуагъэкIэ илъэс 51-рэ зыныбжь бзэджашIэу Мыекъуапэ щыщыр къаубытыгъ, ыпэкIэ ащ хьапс телъыгъ. БзэджашIэр ышIагъэм еуцолIэжьыгъ, уголовнэ Iоф къыфызэIуа­хыгъ.

Джащ фэдэу чэщ-зымафэм къыкIоцI нэжъ-Iужъхэм ямылъку ашIуатыгъугъэу хъугъэ-шIэгъитIу агъэунэ­фыгъ. Уголовнэ лъыхъуным икъулыкъушIэхэм Мыекъопэ районым тыгъуакIор къыщаубытыгъ. БзэджашIэм илъэс 37-рэ ыныбжь, ыпэкIэ хьапсым дэсыгъ. ЗэрагъэунэфыгъэмкIэ, илъэс 72-рэ зыныбжь пенсионерым иунэ итыгъэ телевизорыр шIуитыгъугъ.

Мыщ фэдэ щысабэ джыри къэпхьын плъэкIыщт.

Къэзыгъэхьазырыгъэр КIАРЭ Фатим.