Ныбджэгъухэм тырягъусэу тыфэгушIо
Урысые Федерацием дзюдомкIэ ихэшыпыкIыгъэ командэ итренер шъхьаIэу Тао Хьасанбый имэфэкI мы мафэхэм хигъэунэфыкIыгъ.
Тао Хьасанбый Къэбэртэе-Бэлъкъарым къыщыхъугъ. Адыгэ къэралыгъо университетым физкультурэмрэ дзюдомрэкIэ и Институт къыухыгъ. Кобл Якъубэ лъапсэ зыфишIыгъэ Мыекъопэ бэнэпIэ еджапIэм зызэрэщигъэсагъэм рэгушхо.
Олимпиадэ джэгунхэу Афины щыкIуагъэхэм ящэнэрэ чIыпIэр къащыдихыгъ. Дунаим, Европэм, Урысыем язэнэкъокъухэм медальхэр къащихьыгъ. Урысыем, Адыгеим язаслуженнэ тренер.
Олимпиадэ джэгунхэу 2016-рэ илъэсым Рио-де-Жанейро щыкIуагъэхэм дышъэр къащызыхьыгъэ Мудрэнэ Бислъани Мыекъуапэ щеджагъ, самбэмкIи, дзюдомкIи банэзэ, иIэпэIэсэныгъэ хигъэхъуагъ. Олимпиадэ джэгунхэм зафигъэхьазыры зэхъум, Тао Хьасанбый тренерэу иIагъ.
Мудрэнэ Бислъан дзюдомкIэ дышъэр Олимпиадэм къызыщыдехым, Адыгэ Республикэм фэгъэхьыгъэ гущыIэ фабэу къыIуагъэхэр дунаим щызэхахыгъэх. Жъогъо 12-р къызыхэлыдыкIырэ адыгэ быракъыр ашъхьагъ щыбыбатэзэ, нэпэеплъ сурэтхэу Тао Хьасанбыйрэ Мудрэнэ Бислъанрэ атырахыгъэхэр спортышхом итарихъ къыхэнагъэх.
— Адыгеим сыгу щыI, сиреспубликэу сэлъытэ, ныбджэгъубэ щызгъотыгъ. Я ХХ-рэ лIэшIэгъум Урысыем дзюдомкIэ итренер анахь дэгъоу Кобл Якъубэ гуфэбэныгъэ къытфыриIэу спортышхом тызэрэфигъасэщтыгъэр гъашIэм хэкIокIэщтэп. Якъубэ ыгу къытемыожьырэми, непи къытхэтэу тэлъытэ. ИзекIокIэ-шIыкIэхэр щысэ тфэхъух, — къытиIуагъ Тао Хьасанбый.
2016-рэ илъэсым, чъэпыогъу мазэм къыщегъэжьагъэу Тао Хьасанбый Урысыем дзюдомкIэ ихэшыпыкIыгъэ командэ итренер шъхьаI. Адыгеим спорт Унэшхохэр, стадионхэр зэрэщашIыхэрэм, сэнаущыгъэ зыхэлъ спортсменхэр зэрэщагъасэхэрэм ащыгъуаз.
Адыгеим щыщхэу Ордэн Андзаур, Мерэм Дамир, нэмыкIхэри Урысыем дзюдомкIэ ихэшыпыкIыгъэ командэ хэтых, егъэджэн-зэIукIэгъухэм ахэлажьэх.
Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэр, Олимпиадэ джэгунхэм дышъэр къащыдэзыхыгъэ Мудрэнэ Бислъан, спортым Iоф щызышIэхэрэр, ныбджэгъухэр Тао Хьасанбый зэрэфэгушIуагъэхэр тигуапэ.
Опсэу, Хьасанбый! Тхьэм нарт бэгъашIэ уешI, насыпышIо охъу!
Сурэтым итхэр: Тао Хьасанбыйрэ Мудрэнэ Бислъанрэ.