Кушъхьэфэчъэ спортыр
Болгарием щыкIощт
Адыгэ Республикэм кушъхьэфэчъэ спортымкIэ иеджапIэ зыщызыгъасэхэрэр кIалэхэри, пшъашъэхэри зэнэкъокъухэм чанэу ахэлажьэх.
Урысыем изэнэкъокъоу трекым щыкIуагъэр Санкт-Петербург щызэхащагъ. Адыгеим щапIугъэ Александр Евтушенкэм джэрзыр къыдихи, хэгъэгум ихэшыпыкIыгъэ командэ рагъэблэгъагъ.
ШэкIогъум и 11 — 15-м Европэм изэнэкъокъоу Болгарием щыкIощтым Александр Евтушенкэр хэлэжьэщт. Тренерэу, республикэм кушъхьэфэчъэ спортымкIэ и Федерацие и Тхьаматэу Анатолий Лелюк тызэрэщигъэгъозагъэу, Александр Евтушенкэр иIэпэIэсэныгъэкIэ Урысыем испортсменхэм къахэщы, Олимпиадэ джэгунхэм ахэлэжьэнэу зегъэхьазыры.
НыбжьыкIэхэм яуплъэкIунхэр
Урысыем иныбжьыкIэхэм язэнэкъокъу шэкIогъум и 19 — 26-м Санкт-Петербург щыкIощт.
Илъэс 22-м нэс зыныбжьхэм яухьазырыныгъэ трекым щауплъэкIущт. Адыгеим ихэшыпыкIыгъэ командэ хэтхэу Валерий Исламовым, Алена Рыцевам, Елизавета Арчибасовам, Марк Дикий зэнэкъокъум зыфагъэхьазыры.
Тренерхэу Алексей Войновыр, Юрий Курочкиныр, Александр Дикий ныбжьыкIэхэм япащэх. Александр Войновым зэрилъытэрэмкIэ, Адыгеим иныбжьыкIэхэр хагъэунэфыкIырэ чIыпIэхэм афэбэнэнхэм фэхьазырых. Валерий Исламовым хэгъэгум изэнэкъокъоу джырэблагъэ Омскэ щыкIуагъэм зыхэлажьэм, тыжьыныр къыфагъэшъошагъ.
СтIашъу Мамыр, Елизавета Ошурковар Урысыем ихэшыпыкIыгъэ командэхэм ахэтхэу хэгъэгу, дунэе зэIукIэгъухэм зафагъэхьазыры.