Нэгъуцу зэшхэм ямедалитIу
Европэм иныбжьыкIэхэм дзюдомкIэ язэнэкъокъу Хорватием щыкIуагъ. ТIуапсэ щыщхэу Нэгъуцу зэшхэм медали 2 зэIукIэгъухэм къащыдахыгъ.
Урысыем ихэшыпыкIыгъэ ныбжьыкIэ командэ хэтхэу Нэгъуцу зэшхэу Казбекрэ Абрекрэ кг 66-рэ къэзыщэчыхэрэм якуп щыбэнагъэх. Пхъэдзыр зырадзэм, зэшитIури зы купым щыбэнэнхэ фаеу зэхэщакIохэм къаIуагъ.
Нахьыжъыр Казбек. Израиль, Кипр, Венгрием ябэнакIохэм атекIуи, финалныкъом ышнахьыкIэ щыIукIагъ. ТекIоныгъэр Казбек къыдихи, дышъэм фэбэнагъ. Грузием къикIыгъэ бэнакIоу Капанадзе гугъэ римытэу зэнэкъокъур къышIуихьыгъ.
Нэгъуцу Казбек зэIукIэгъуи 5-ми текIоныгъэр «къабзэу» къащыдихыгъ. Пкъыузхэр къышIыхэзэ, дзюдом ишъэфхэр къыгъэлъэгъуагъэх. Казбек ышнахьы- кIэу Абрек джэрзыр къыдихыгъ.
— Урысыем изаслуженнэ тренерэу Нэгъуцу Джамболэт ыкъохэр дзюдом фегъасэх, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлымэ. — ТиеджапIэ ыцIэкIэ Нэгъуцухэм тафэгушIуагъ.
Нэгъуцу зэшхэр илъэс 18-м нэс зыныбжьхэм язэнэкъокъухэм ахэлажьэхэзэ, дунаим, Европэм, Урысыем медальхэр къащахьыгъэх. Илъэс 21-м нэс зыныбжьхэр Хорватием зыщызэIокIэхэм, зэшхэм медалитIу къызэрэдахыгъэм тигъэгушIуагъ. Тренер цIэрыIо хъугъэ Нэгъуцу Джамболэт Адыгэ къэралыгъо университетым физкультурэмрэ дзюдомрэкIэ и Институт къыухыгъ, тиреспубликэ ныбджэгъубэ щыриI.
Нэгъуцухэм яспорт унагъо игъэхъагъэхэм ахигъэхъонэу фэтэIо.