ЧIыр къекIокIыфэ ымакъэ зэхэтхыщт
ЗэлъашIэрэ цIыфым ехьылIагъэу утхэ зыхъукIэ зэгъэпшэнхэр ошIых. Щытхъоу фаIуагъэм къыщебгъажьэмэ, апэу къыхэбгъэщырэр ишIушIагъэ уасэ зэрэфашIыгъэр ары.
Анзорыкъо Чеслав РСФСР-м культурэмкIэ изаслуженнэ IофышI, Урысыем изаслуженнэ артист, Адыгэ Республикэм инароднэ артист, Пшызэ искусствэхэмкIэ изаслуженнэ IофышIэшху.
Дунэе шIухьафтынэу Къандур Мухьадин ыцIэкIэ агъэнэфагъэр къыфагъэшъошагъ, Адыгэ Республикэм и Къэралыгъо премие илауреат.
Ч. Анзорыкъом нэмыкI щытхъуцIэхэри иIэх. Къызыщытхъужьырэп, игупшысэхэм къахигъэщырэр сэнэхьатэу къыхихыгъэм фэшъыпкъэу зэрэпсэурэм изакъоп.
Кощхьаблэ щыригъэжьагъ
Адыгэ къуаджэу къызыщыхъугъэр Кощхьабл. Искусствэр зыщагъэлъэпIэрэ унагъом щапIугъ. Янэжъэу Гулэ чылэм щыцIэрыIо пщынаоу щытыгъ. Чеслав къызэриIотэжьырэмкIэ, янэжъ пчыхьэзэхахьэхэм, нысащэхэм ахэлажьэщтыгъ. Пщынэо IэпэIасэу Хьагъэудж Мыхьамэт игъусэу лъэпкъ мэкъамэхэр къыригъаIощтыгъэх.
Лъым хэлъыр щыIэныгъэм къыщыотэжьы. Чеслав ылъэ зытеуцом, музыкальнэ училищэу Налщык дэтым чIэхьагъ. Пщынэр шIогъэшIэгъоныгъ, ау орэд къыIоныр къыхихыгъэу щытыгъ. КIэлэ ныбжьыкIэм мэкъэ дахэу иIэм кIэлэегъаджэхэм псынкIэу гу лъатагъ. Орэдхэр ыусыхэу зырегъажьэм, сэнаущыгъэ зэрэхэлъыр икIэлэегъаджэхэм къыхагъэщыгъ. Ленинград къэралыгъо консерваториер 1969-рэ илъэсым Ч. Анзорыкъом къызеухым, опернэ орэдхэр къыIонхэмкIэ шIэныгъэ гъэнэфагъэ иIагъ. Композитор Iофыгъохэм зафигъэсэнэу игъо ифагъ.
Е. Ольховскэр, Б. Араповыр, нэмыкI кIэлэегъэджэ дэгъухэр иIагъэх. Ленинград щеджэзэ, концертхэм ахэлажьэщтыгъ.
Иосиф Кобзон къыхигъэщыгъэр
ОрэдыIо цIэрыIоу Иосиф Кобзон Мыекъуапэ къэкIуагъэу гущыIэгъу тызыфэхъум, мэкъэ чанкIэ, мэкъэ къабзэкIэ орэд къэзыIорэ артистхэм ягугъу къышIызэ, апэу къыхигъэщыгъагъ Анзорыкъо Чеслав.
— Кавказ изакъоп, нахь чыжьэу уIэбэн фае ащ фэдэ макъэ зиIэ артист уIукIэным фэшI, — къытиIогъагъ И. Кобзон.
— Иосиф Кобзон сыригъусэу концертхэр Москва, Ленинград, нэмыкI къалэхэм къащыттыгъэх, — игукъэкIыжьхэм тащегъэгъуазэ Ч. Анзорыкъом.
Ихэку къыгъэзэжьыгъ
СССР хэгъэгушхом ишъолъыр пчъагъэхэм арагъэбла-гъэщтыгъэ Анзорыкъо Чеслав еджэныр Ленинград къызыщеухым, Адыгэ хэкум къыгъэзэжьыгъ. Къэралыгъо ансамблэм, филармонием яорэдыIоу искусствэм фэлэжьагъ. 1972-рэ илъэсым щегъэжьагъэу Адыгэ къэралыгъо университетым искусствэхэмкIэ и Институт кIэлэегъаджэу, деканэу Iоф щишIагъ, орэдым пыщагъэхэр ыгъасэхэзэ, ищыIэныгъэ нахь гъэшIэгъон хъугъэ. Ригъэджагъэхэм, гущыIэ фабэ зэриIуагъэхэм, артист цIэрыIо хъугъэхэм Ч. Анзорыкъор ащыгъупшэрэп, «тхьауегъэпсэу» къыраIожьы.
ИIофшIагъэ хэхъо
Искусствэм зыкъыщыбгъотыныр, гъэхъагъэ щыпшIыныр IэшIэхэп. Гуетыныгъэ зыхэлъыр къиным пэшIуекIон елъэкIы. Адыгэмэ ятарихъ гъогоу къакIугъэр музыкальнэ искусствэм куоу къыщызыгъэлъэгъуагъэмэ Анзорыкъо Чеслав зэу ахэтэлъытэ.
Кавказ заом хэкIодагъэхэм афэгъэхьыгъэ симфоническэ поэмэр гум къегущыIыкIы.
МэщбэшIэ Исхьакъ «Убыххэр» зыфиIоу ытхыгъэм техыгъэ произведениеу Ч. Анзорыкъом ыусыгъэр Адыгэ Республикэм и Правительствэ иконцерт хэхыгъэхэм ащэIу.
Лъэпкъ театрэу Цэй Ибрахьимэ ыцIэ зыхьырэм Шъхьаплъэкъо Хьисэ ипьесэу Шэуджэн Мосэ фэгъэхьыгъэр зыщагъэуцум, орэдышъор Ч. Анзорыкъом ыусыгъ. Симфоническэ поэмэу «Си Адыгеир», лъэпкъ шIэжьым, зэкъошныгъэм игъэпытэн яхьылIэгъэ произведениехэр иIофшIагъэхэм къахэхъуагъэх.
КIэлэцIыкIу музыкальнэ искусствэм зиушъомбгъуным фэшI фортепианэм къырагъэIорэ орэдышъоу ыусыгъэр макIэп. Адыгеим итхакIомэ яусэхэм атехыгъэ орэди 100 фэдиз икъэлэмыпэ къычIэкIыгъ.
Лъэхъаным диштэрэ орэдхэу «Си Адыгей», «Адыгэ шъуаш», «Адыгэ быракъ», «Джэныкъо машIу», нэмыкIхэри композиторым ыусыгъэх.
Сэмэркъэу-кIэнэкIэлъэ орэдэу Бэгъ Нурбый игущыIэхэм атехыгъэм цIэ зэфэшъхьафхэр иIэх. «Тэ укIорэ, си Гуаго?» зыфиIорэр ары зигугъу къэтшIырэр. Орэдыр Чеслав концертхэм бэрэ къащиIуагъ.
— Сэри а орэдыр сигуапэу къэсэIо, — игупшысэхэм тащегъэгъуазэ Адыгэ Республикэм изаслуженнэ артистэу Быщтэкъо Азэмат. — Орэдым хэлъ гущыIэхэр сшIогъэшIэгъоных, зыми фэдэхэп. Композиторым мэкъамэу къыхихыгъэр сшIодах.
Тамэ ритыгъ
Республикэ общественнэ движениеу «Адыгэ Хасэм» иIофыгъохэм Ч. Анзорыкъор чанэу ахэлажьэщтыгъ. Адыгэ шъуашэм и Мафэ апэрэу агъэмэфэкIынэу 2011-рэ илъэсым зырахъухьэм, Чеслав гушIуагъэ, иIахьэу хилъхьащтым егупшысагъ.
«Адыгэ шъуашэм» имэкъамэхэр ыусыгъэх, орэдыр мэфэкIым къыщиIуагъ. ЯтIонэрэ орэдэу «Адыгэ быракъыр» ащ къыкIэлъыкIуагъ. Лъэпкъ гупшысэу ащыпхырищыгъэр щыIэныгъэм щылъэкIуатэ.
— Анзорыкъо Чеслав ишIуагъэкIэ искусствэм нахь пэблагъэ сыхъугъ. Ащ иорэдхэу лъэпкъ шъуашэм, быракъым афэгъэхьыгъэхэр сигуапэу мэфэкIхэм, концертхэм къащысэIох. Орэдхэр зэзгъашIэхэ зэхъум, Чеслав нэплъэгъукIи, гущыIэ фабэхэмкIи IэпыIэгъу къызэрэсфэхъугъэр сщыгъупшэрэп, — игупшысэхэм тащегъэгъуазэ Къэралыгъо телерадиокомпаниеу «Адыгеим» ижурналистэу Беданыкъо Замирэ.
Оркестрэм фагъадэ
Республикэм инароднэ артистэу, орэдусэу, пщынаоу Лъэцэрыкъо Кимэрэ Анзорыкъо Чеславрэ зэгъусэхэу IэкIыб къэралхэм ащыIагъэх, концертхэм, дунэе фестивальхэм ахэлэжьагъэх.
— Кимэ пщынэр зэкIищызэ, нэгушIоу къызэрэсэплъэу гушхоныгъэ къысхилъхьэщтыгъ, — къеIуатэ Ч. Анзорыкъом. — Кимэ ипщынэ оркестрэм фагъадэщтыгъ. Ащ сыготэу орэд къасIо зыхъукIэ, тилъэпкъ искусствэ лъэшэу зэрэбаир нахьышIоу къыспкъырыхьэщтыгъ.
Адыгэ Республикэм инароднэ артистэу, композиторэу Гъонэжьыкъо Аскэри Чеслав игъусэу лъэпкъ зэхахьэхэм бэрэ ахэлэжьагъ. Язэпхыныгъэхэр искусствэм щыпытагъэх.
Адыгэ культурэм и Дунэе фестивалэу Тыркуем щыкIуагъэм щыIэхэу нэбгырабэмэ нэIуасэ афэхъугъэх. Къэбэр-тэе-Бэлъкъарым, Къэрэщэе-Щэрджэсым, Краснодар краим, Адыгеим, фэшъхьафхэм къарыкIыгъэхэр Тыркуем зыщызэIокIэхэм, зэлъэпкъэгъухэм зэдэгущыIэгъоу зэдыряIагъэр ашIогъэшIэгъоныгъ.
Адыгэхэр итэкъухьагъэхэу хэгъэгухэм, шъолъырхэм ащэпсэухэми, зы бзэ яI. Якультурэ, яшэн-хабзэхэр къаухъумэх, искусствэм зэфещэх.
Анзорыкъо Чеслав хэкум къэзыгъэзэжьырэ тилъэпкъэгъухэр ыдэжь къыригъэблагъэхэу, апэрэ уахътэм иунэ ригъэсыхэу къыхэкIыгъ.
Израиль щыпсэурэ тилъэпкъэгъухэр Мыекъуапэ къэкIуагъэхэу «Адыгэ макъэм» иредакцие тащыIукIагъ. Кфар-Камэ щыщ Ацумыжъ Налщык икъоджэгъухэр къелъэIугъэхэу къытиIуагъ.
— Анзорыкъо Чеслав ымакъэ зытетхэгъэ дискыр тыдэ щысщэфын слъэкIыщт?
Ацумыжъ Налщык илъэIу фэдгъэцэкIагъ. Анзорыкъо Чеслав зыIутэгъакIэм дунаир фэмыхъужьэу гушIуагъэ.
Мамыр псэукIэр
Тыркуем къикIыжьыгъэ тилъэпкъэгъоу, Дунэе Адыгэ Хасэм иIофшIэн хэлэжьэрэ МэщфэшIу Нэдждэтрэ Анзорыкъо Чеславрэ шIэжьым нэIуасэ зэфишIыгъэх, язэпхыныгъэхэр щыIэныгъэм щэпытэх.
Кавказ заом тхьамыкIагъоу къыпкъырыкIыгъэм, адыгэхэм къинэу зэпачыгъэм афэгъэхьыгъэ тхыгъэхэр Н. МэщфэшIум иIэх. Хэгъэгу зэошхоми гукIэ зыфигъазэмэ, заом цIыфыбэ зэрэхэкIуадэрэр, ар машIоу зэрэщытыр, заом шъузабэ ышIыгъэ бзылъфыгъэхэм ягумэкI-гупшысэхэр къыхегъэщых.
Усэу МэщфэшIу Нэдждэт ытхыгъэм техыгъэ произведениеу Анзорыкъо Чеслав симфоническэ оркестрэм пае ыусыгъэм уедэIу зыхъукIэ, гур «зэредзэ», нэпсыр къырегъэхы. Зэфэхьысыжьхэр цIыфым ищыIакIэ, мамыр псэукIэм яопхых.
— Кавказ заом, адыгэ шъуашэм, адыгэ быракъым, нэмыкIхэм афэгъэхьыгъэу Анзорыкъо Чеслав ыусыгъэхэм уядэIу зыхъукIэ, тилъэпкъ итарихъ, икультурэ нахьышIоу зэбгъашIэхэ пшIоигъо охъу искусствэм лIэужхэр зэрэзэфищэхэрэм ехьылIэгъэ IофшIагъэхэр сыгу къагъэкIых, — къытиIуагъ сурэтышI-модельер цIэрыIоу СтIашъу Юрэ.
ЛъэпсэшIур мэбагъо
Анзорыкъохэм яунагъо искусствэр щагъэлъапIэ. Чеслав янэжъ изакъоп лъэпсэшIур зыгъэпытагъэр. Чеслав ишъхьэгъусэу Светланэ Адыгэ кIэлэегъэджэ колледжэу Андырхъое Хъусенэ ыцIэ зыхьырэм илъэсыбэрэ адыгабзэмкIэ щыригъэджагъэх. Ащ игущыIэхэм атехыгъэ орэдхэри аусыгъэх.
Зэшъхьэгъусэхэм апхъоу Марзыет Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэм ипащ. Долэт Санкт-Петербург щеджагъ, Ленинград хэкум, Германием, Мыекъуапэ, фэшъхьафхэм иконцертхэр ащыкIуагъэх. Композиторэу Анзорыкъо Долэт музыкальнэ Iэмэ-псымэхэмкIи орэдышъохэр къырегъаIох. Чеслав ипхъорэлъфи искусствэм пыщагъ.
Къыдэмыхъугъэр
Республикэ Къэралыгъо филармонием и Къэралыгъо оркестрэу «Русская удалым» Анзорыкъо Чеслав хэтэу Адыгеим культурэмкIэ имафэхэу Москва щыкIуагъэхэм, нэмыкI шъолъырхэм ащызэхащэгъэ концертхэм ахэлэжьагъ. УрысыбзэкIи, адыгабзэкIи, нэмыкIыбзэхэмкIи классикэм хэхьэгъэ орэдхэр къащиIуагъэх.
— «Русская удалым» хэпшIыкIэу ситворчествэ къыгъэбаигъ, — тиупчIэхэм джэуап къаретыжьы Анзорыкъо Чеслав. — Республикэм, хэгъэгум ащыпсэурэ лъэпкъхэм язэпхыныгъэхэр гъэпытэгъэнхэм оркестрэр чанэу ахэлэжьагъ.
Чеслав интернационалистэу ищыIэныгъэ гъогу къыхьыгъэу елъытэ. ИшIушIагъэ тэри тырэгушхо, ау игумэкIхэр, къыдэмыхъугъэхэр шъхьэихыгъэу къэтIонхэ фаеу елъытэ.
Адыгэ лъэпкъ музыкальнэ Iэмэ-псымэхэм яоркестрэ республикэм щызэхэщэгъэным илъэс пчъагъэ хъугъэу тытегущыIэ. Ащ фэгъэхьыгъэ тхыгъэхэр гъэзетэу «Адыгэ макъэм» къызэрэщыхэтыутыгъэхэм Анзорыкъо Чеслав ащыгъуаз.
«Ащ фэдэ оркестрэ Адыгеим щызэхащэмэ, сигуапэу Iоф щысшIэщт», — къытиIогъагъ Ч. Анзорыкъом.
Iофым тытегущыIэ, ау лъыкIуатэрэп. Оркестрэр зэхащэмэ, республикэм имузыкальнэ искусствэ хэпшIыкIэу хэхъоныгъэхэр ышIыщтых. Адыгабзэм изэгъэшIэн, игъэфедэн лъэпкъ оркестрэр зэрэфэIорышIэщтым Анзорыкъо Чеслав ицыхьэ телъ.
Урысыем икоммунистическэ партие хэтэу Анзорыкъо Чеслав непэ имэфэкI, илъэс 81-рэ мэхъу. ТилъапIэу Чеслав! Лъэпкъэу узыщыщым, республикэм шIоу афэпшIагъэр Тхьэм къыуегъэтэжь. УиIофшIэн насыпэу хэбгъотагъэр пфэбэгъонэу тыпфэлъаIо. Тыгъэр тшъхьащытэу, чIыр къекIокIыфэ уиорэдхэр дунаим щыжъынчыщтых. Опсэу, Чеслав!
ЕмтIылъ Нурбый.