Лъэпкъ баиныгъэм зы налъэу хэуцуагъ
«Черкес ФМ» зыфиIорэ лъэпкъ радиоу адыгэхэм осэшхо зыфашIырэр непэ ылъэ теуцуагъ. IэкIыб къэралыгъо зэфэшъхьафхэм арыс тилъэпкъэгъухэр зэзыпхыжьырэ, адыгабзэм иIэшIугъэ зэхязыгъашIэрэ, адыгэ хабзэм икупкI тфызэпкъырызыхырэ, лъэпкъ мэкъэмэ дахэм тыкIэзыгъэдэIукIырэ радиор тищыIэныгъэ щыщ Iахь хъугъэ.
ШэкIогъум и 6-м радиом Iоф зишIэрэр илъэс хъугъэ. А охътэ кIэкIым ащ цIыф мин пчъагъэхэр дихьыхыгъэх, къэралыгъуабэмэ ащашIэ хъугъэ.Адыгэ радиом изэхэщэн кIэщакIо фэхъугъэр, ащ Iоф ышIэу езыгъэублагъэр Къэбэртэе-Бэлъкъарымрэ Ингуш Республикэмрэ язаслуженнэ артистэу, режиссерэу, продюсер цIэрыIоу Хьэцей Тимур.
Iофым пэублэ фэхъугъэм, непэ зызэриужьыгъэм атедгъэгущыIэнэу Тимур упчIэ заулэкIэ зыфэдгъэзагъ, зипэщэ радиом гъогуонэ кIыхьэ къыкIунэу тыфэлъэIуагъ.
— Тимур, «Черкес ФМ-р» апэрэ дунэе адыгэ радиоу, къэралыгъуабэмэ ащыпхыращырэ медиа-проектышхоу щыт. Илъэсым къыкIоцI ар цIыфыбэмэ агу рихьыгъ. Лъэпкъ культурэм хэхъоныгъэ езыгъэшIырэ лъэбэкъушхоу ар плъытэмэ хъущт. Ащ фэдэ радио зэхэпщэнэу сыдигъуа угу къызыкIыгъэр?
— Ятэжъ пIашъэхэм яхэку пэIапчъэу цIыфыр псэу зыхъукIэ, лъэпкъ зэхашIэр нахь лъэш мэхъу. Хэкум упэчыжьэми, лъэпкъым итарихъ, икультурэ, ихабзэхэр, ыбзэ IэкIыб зэрэмышIыщтхэм упылъ.
Сэ джыдэдэм Москва сыщэпсэу ыкIи сыщэлажьэ. Ау хэкупсэу сызэрэщытым елъытыгъэу зигугъу къэсшIыгъэхэр зыкIи IэкIыб сшIыщтыгъэхэп. Спортзалым сыщыIэу адыгэ радио зэхэсщэнэу сыгу къэкIыгъ. ЕтIанэ IофшIапIэм сызынэсым ащ сыдэлажьэу сыублагъ. Бэ темышIэу къыздэлэжьэщт купыр зэзгъэуIуи, сигухэлъ нэфапIэ хъугъэ.
Радио зэхэпщэныр Iоф къызэрыкIоп. ИлъэскIэ проектыр дгъэхьазыри, джырэ радиомкIэ шапхъэу щыIэхэм адиштэу ар зэтедгъэпсыхьагъ.
— Тилъэхъан Iофхэр зэрагъэцакIэхэрэри, къэралыгъор зэрэзэрагъакIорэри пчъагъэхэр зылъэпсэ (Digital) амалхэмкIэ ары. Лъэпкъыр уахътэм зэрэдэбакъорэр лъэшэу тигуап. Сотовэ телефоным тет радиом Iоф зэришIэрэ шIыкIэр, ащ паекIэ уасэ зыкIатын фаер бэмэ къагурыIорэп. «Радио Черкес ФМ-м» ипшъэрылъхэм нахь игъэкIотыгъэу уакъытегущыIэ сшIоигъуагъ.
— ШъыпкъэмкIэ, радиом пае пкIэ атэу ыпэкIэ щытыгъэп. Ау тэ тызыщыпсэурэ лъэхъаным къекIурэ радио бгъэлэжьэным, телефоным тырябгъатхэу, узыщыфаем дэжь къызэIупхэу ащ уедэIужьыным мылъку апэIохьэ. Радиостанциер техникэкIэ зэтебгъэпсыхьаным, мафэ къэс ащ икъэтынхэр бгъэхьазырынхэм пае уахъти мылъкушхуи уиIэн фае.
НепэкIэ дгъэфедэрэ телефонхэм пкIэ зылъатырэ ащ фэдэ программабэ яI. Тирадио пае ыпкIэ атыныр уахътэм къыгъэуцугъэ шапхъэхэм зэу ащыщ. Тэ ахъщэ къэдлэжьынымкIэ гъуни-нэзи зимыIэ рекламэхэр дгъэфедэхэрэп. ЦIыфхэр гупсэфэу адыгэ радиом едэIунхэм пай арэущтэу тызкIэзекIорэр. Чэщи, мафи Iоф зышIэрэ адыгэ радиом пае мазэм долларитIу имыкъу ытыныр хэти къехьылъэкIынэу сыгугъэрэп.
— Тимур, радиом икъэтынхэм нахь игъэкIотыгъэу уакъытегущыIагъэмэ дэгъугъэ. Ащ едэIухэрэм сыда анахьэу зэхахымэ ашIоигъор?
— Нахь пасэу щыIэгъэ орэдыIохэми, джырэ орэдыIохэми къаIохэрэр «Черкес ФМ-м» иэфир къехьэх. Орэдхэм уахътэу къафыхэдгъэкIырэр нахьыб. Къэбэртэе-Бэлъкъарым, Къэрэщэе-Щэрджэсым, Адыгеим, нэмыкI къэралыгъохэм ащыпсэурэ адыгэ орэдыIохэм ятворчествэ тэ тылъэIэсы. Радиом едэIурэ пэпчъ ыгу рихьырэ мэкъамэ щызэхихын, икIэсэ орэдыIом «щыIукIэн» фай.
«Адыгэ хабз» зыфиIорэ рубрикэр зиIэ къэтынхэр бэмэ агу рехьы. Лъэпкъ хабзэхэм афэгъэхьыгъэ къэтынхэр кIэкIых, гум иубытэгъошIух. Джащ фэдэ къабзэу гъэпсыгъэ «Адыгэ гущыIэжъхэр» зыфиIорэри. Лъэпкъым ижъ-ижъыжькIэ къыдекIокIырэ адыгэ гущыIэжъхэмрэ гущыIэ щэрыохэмрэ мафэм пчъагъэрэ зэхэпхынхэр лыеп.
КIэлэцIыкIухэм апае радиом адыгэ пшысэхэр пчыхьэрэ къетых. Адыгэхэм афэгъэхьыгъэ къэбарыкIэхэри, сэмэркъэухэри мыщ щызэхахын алъэкIыщт.
— Адыгэ орэд дэхабэ къешъогъаIо, хэта ахэр къыхэзыхрэр?
— Орэдхэр къыхэзыхрэр сэры. Радиор къызэIутхыным ыпэкIэ орэд мини 3 фэдизмэ сядэIуи, орэд 300 ахэм къахэсхыгъ. МэкъамэмкIи, зэрэтетхагъэмкIи щыкIагъэ зимыIэхэр ары ахэм ахэзгъэхьагъэр. Радиом непэ къытыхэрэр тиорэдыIохэм япроизведение анахьышIухэр ары.
— Москва щылажьэу езыгъэжьэгъэ радиор непэ къэралыгъуабэмэ анэсыгъ, дунэе мэхьанэ иIэ хъугъэ. Урысыем нэмыкIэу сыд фэдэ хэгъэгухэр ара ащ икъэтынхэм зыщядэIухэрэр?
— Радиом изэхэщэн ыуж сызехьэм зэрэдунаеу ар щызэхахыным тезгъэпсыхьэу сыублагъ. Апэдэдэ 2019-рэ илъэсым шэкIогъум и 6-м Урысыем щылажьэу ащ ригъэжьагъ, 2020-рэ илъэсым игъэмафэ Тыркуемрэ Иорданиемрэ Iофыр ащызэпыуцуагъ.
НепэкIэ а къэралыгъуищмэ арысхэр ары нахьыбэрэмкIэ тирадиокъэтынхэм ядэIухэрэр. Ау Германиеми, Америкэми, Израили, нэмыкI чIыпIэхэми къарыгущыIыкIырэр бэ, ятелефонхэм атырарагъэтхагъэу ядэIоу ахэм къаIо. Зэрэдунаеу зэлъызыгъэIэсрэ Инстаграмым нэкIубгъоу щытиIэмкIи, нэмыкI амалхэмкIи къэбархэр къытагъашIэ, яеплъыкIэхэр къытаIо. Лъэшэу тигуап радиор зыгу рихьырэ нэбгырабэ зэрэщыIэр, лъэпкъыпсэхэу, хэкупсэхэу IэкIыб къэралыгъохэм арысхэр зэрэзэрипхыхэрэр. Радиом едэIухэрэм япчъагъэ мафэ къэс хэхъо, тапэкIи ахэр нахьыбэ хъунэу тэгугъэ.
— Тимур, илъэс гъогууанэ къызэшъунэкIыгъ. А уахътэм къыкIоцI бэ шъуфызэшIокIыгъэр, джыри сыд фэдэ лъэныкъохэр ара шъузыдэлажьэмэ шъушIоигъор?
— ЛъэныкъуабэхэмкIэ радиом иIофшIэн зебгъэушъомбгъун плъэкIыщт. Ау ар мылъкушхо зытекIодэрэ Iоф.
ЫпшъэкIэ къызэрэщысIогъагъэу, типроект дунэе мэхьанэ иI. НэмыкI къэралыгъохэм радиор тыркубзэкIи, арабыбзэкIи къащэгущыIэ. Ау сыдигъуи ахэм адыгабзэр акIыгъу. Джыри гухэлъыбэ тиI, ар радиом епхыгъэ техническэ Iофыгъохэр ары. Хэхъоныгъэ емыгъэшIмэ, сыд фэдэрэ Iофи къызэтеуцощт. Тэ Iофэу етхьыжьагъэр нахьышIу зэрэтшIыщтым сыдигъуи тыпылъыщт.
— Дэгъоу тшIэрэ актерхэм, цIыф цIэрыIохэм амакъэ радиом щызэхэтэхы. Ащ щылажьэхэрэр узэрэфаеу уугъоигъэха?
— Радиом Iоф ышIэу зеублэм адыгабзэкIэ радиокъэтынхэр зезыщэщт цIыфхэр зэрэмакIэхэр къэнэфагъ. Ащ хэкIыпIэ къыфэдгъотыгъ, Къэбэртэе драматическэ театрэу ШэуджэнцIыкIу Алый ыцIэ зыхьырэм иактерхэр Iофым къыхэтщагъэх. КIэлэцIыкIухэм афэгъэхьыгъэ пшысэхэм ахэр IупкIэу къяджэх.
Рубрикэ шъхьаIэхэм якъэтын фэгъэзагъэхэр дахэу пчэгум щыгущыIэшъухэрэ, адыгэбзэ жэбзэ къабзэ зыIулъ, хэкум щызэлъашIэхэрэ Гумэ Маринэрэ Нэфышъ Тимуррэ. НэмыкI лъэпкъхэм къахэкIыгъэ специалистхэри чанэу къыддэлажьэх.
— «Черкес ФМ» радиор къызежьагъэм къыщыублагъэу сэ сшъхьэкIэ Apple Music гуадзэр шIагъоу къызэIусхыжьырэп. Сыда пIомэ, адыгэ мэкъамэхэм, орэдхэм, къэбарыкIэхэм шъуирадио сащедэIуныр нахь къыхэсэхы. Лъэпкъ баиныгъэм зы налъэу хэуцогъэ радиом мэхьанэу иIэм тапэкIи нахь зыкъежъугъэIэтын шъуимурада?
— Радиор цIыфхэм къашъхьапэмэ, агу къеIэтымэ сигуап. Джащ пай ар къызкIызэIутхыгъэри. НэмыкI чIыпIэхэм адыгэ орэдхэм уащылъымыхъоу, ащ уахътэ темыгъэкIуадэу, «Черкес ФМ-р» къызэIухи, сыдигъуи орэд дэхабэ ащ щызэхэпхыщт. ЦIыфхэм ар агу рехьымэ, типшъэрылъ дгъэцэкIагъэу тлъытэзэ, ыпэкIэ тылъыкIотэщт.
Джырэ лъэхъаным къыгъэуцурэ пшъэрылъхэм адиштэу маркетингымкIэ, рекламэмкIэ, нэмыкI лъэныкъохэмкIэ узыдэлэжьэн фаеу радиом иIэр джыри бэ. 2020-рэ илъэсым зэшIотхын фэегъэ Iофыгъохэм ащыщ пчъагъэ COVID-19-м къызэтыриIэжагъ. Типшъэрылъ шъхьаIэр радиом уасэу иIэм зыкъегъэIэтыгъэныр, ащ едэIухэрэм агу къыIэтыныр, къашъхьапэщт горэхэр щызэхахыныр ары.
Непэ цIыфыбэмэ «Черкес ФМ-м» игугъу шIукIэ ашIы. Ащ едэIухэрэм япчъагъэ хэхъо зэпытынэу сэгугъэ. Ар нахь кIэщыгъо, купкIышIо, гъэшIэгъон шIыгъэнымкIэ зи тфызэшIокI къэдгъэнэщтэп.
— Опсэу, Тимур, уигухэлъхэр Тхьэм къыбдегъэхъу. Илъэсэу къызэшъунэкIыгъэр гъогуонэ кIыхьэм иублапIэ орэхъу.
ДэгущыIагъэр НэкIэпыджэ Замир. Налщык.