Урысыем илъэпкъхэм языкIыныгъэ и Мафэ фэгъэхьыгъэу сурэтхэм якъэгъэлъэгъон Мыекъуапэ къыщызэIуахыгъ.

Адыгэ Республикэм культурэмкIэ и Министерствэ, республикэм исурэт къэгъэлъэгъуапIэ, купэу «Регионыр», Урысыем хэутын IофхэмкIэ ыкIи коммуникацие жъугъэм иамалхэмкIэ и ГъэIоры­шIапIэ зэхахьэм кIэщакIо фэхъугъэх.

Республикэм исурэт къэгъэлъэ­гъуапIэ ипащэу, сурэтышI ыкIи архитектор цIэрыIоу Бырсыр Абдулахь пэублэ гущыIэкIэ зэIукIэгъур къызэIуихыгъ.

— Хэгъэгум ишъолъыр 85-мэ мыщ фэдэ къэгъэлъэгъонхэр непэ сыхьатыр 12-м къащызэIуахых, — къыщиIуагъ зэхахьэм Адыгэ Республикэм культурэмкIэ иминистрэу Аулъэ Юрэ. — Урысыем илъэпкъхэм языкIыныгъэ и Мафэ хэдгъэунэфыкIызэ, фотосурэтышIхэм яIофшIагъэхэр хэгъэгум къыщытэгъэлъагъох. — Сурэтэу тэ къыхэтхыгъэхэр Москва дгъэхьыгъэх. ЗэхэщэкIо купым хэтхэр тиIофшIагъэ хэп­лъагъэх, хэгъэгум ишъолъырхэм тисурэтхэр ахагощагъэх, — къы­Iуагъ Адыгэ Республикэм исурэттеххэм я Союз итхьаматэу, Адыгэ Республикэм изаслуженнэ журналистэу Аркадий Кирнос. Адыгеим ехьылIэгъэ сурэтхэм шъолъырхэм щяплъыщтых.

Урысые Федерацием исурэттеххэм яIофшIэгъэ 48-рэ Мые­къуапэ къыщагъэлъагъо. Адыгеим щыпсэухэрэ Аркадий Кирнос, Наиль Батталовым, Дмитрий Войновым тырахыгъэ сурэтхэр рес­публикэм икъэлэ шъхьаIэ щытлъэ­гъугъэх.

Дмитрий Войновым Дунэе фестивалым апэрэ чIыпIэр къы­щыдихыгъ. Сурэтыр дахэм идэхэжь. Шыур пшъашъэ, адыгэ шъуашэр щыгъ. Шыр ыужырэ лъэкъуитIумэ атетэу лъагэу зиIэтыгъ, огум ибыбэщтым фэдэу къэлъагъо. Шыум шыр зэригъэIорышIэрэр сурэттехым игъом къы­хигъэщыгъ. Аферым, Дмитрий.

Сурэт къэгъэлъэгъуапIэм узэ­рэчIэхьагъэм лъыпытэу Урысыем, Адыгеим янароднэ артистэу Кукэнэ Мурат исурэт олъэгъу. Адыгэ шъуашэр къекIоу щыгъ, артистыр нэгушIоу къыоплъы, кIэлэцIыкIур ыIыгъ. Ащ фэдэ сурэтэу щыIэныгъэм къыхэхыгъэм ыпашъхьэ ущытэу удэгущыIэ пшIоигъоу уахътэр огъакIо.

Сурэтхэр тезыхыгъэхэм алъэ­къуацIэхэр кIэтхагъэхэп. ЗэхэщакIохэм ар шIыкIэшIоу алъытэми, IофшIагъэр зиер цIыфхэм ашIэмэ нахьышIоу тэлъытэ.

— Сурэтхэм тяплъызэ, Урысыем ишъолъырхэм ящыIакIэ зыщытэгъэгъуазэ, — къыщиIуагъ зэхахьэм Адыгэ Республикэм исурэтышIхэм я Союз ипащэу Елена Абакумовам.

Татарстан икъалэхэм ащыщ иурам итеплъэ, цIыфхэр ащ зэрэщызекIохэрэр, хышхом хэт къу­хьэу «Ямалыр», Иркутскэ хэкум ихыкъумэу «Байкал» сурэтым къызэрэщылъагъорэр, тыкъэзыуцухьэрэ дунаим идэхагъэ ехьы­лIагъэхэр, нэмыкIхэри гъэшIэ­гъоных.

Урысыем лъэпкъи 195-рэ щэпсэу. Лъэпкъ пэпчъ шэн-хабзэхэр иIэх. ЯшъуашэхэмкIэ псынкIэу къахэогъэщых Кавказ ис лъэпкъхэр, къэндзалхэр, фэшъхьафхэр. Урысхэм ящыIакIэ къизыIотыкIыхэрэр шъолъыр зэфэшъхьафхэм къащытырахыгъэ сурэтхэм ащыолъэгъух.

Хэгъэгу зэошхом илъэхъан, цIыф цIэрыIохэм афэгъэхьыгъэ сурэтхэр гъэшIэгъоных. Дагъыстан ищыIэкIэ-псэукIэ щыщ сурэтым псэ пытым фэд. ЩыIэныгъэр зытетым тетэу олъэгъу.

Спортым ехьылIэгъэ сурэтыр зымыуасэ щыIэп. Дунаим футболымкIэ изэнэкъокъу Урысыем щэкIо. Хэгъэгум ихэшыпыкIыгъэ командэ икъэлэпчъэIутэу Игорь Акинфеевым Iэгуаор къызэкIе­дзэжьы. «Акинфеевым ылъакъу» зыфиIорэ сурэтэу пенальтикIэ тикомандэ икъэлапчъэ къызэ­рэ­дэуагъэхэм сурэтыр фэгъэхьыгъ.

Кавказ икъушъхьэхэм, Сахалин, Урысыем игупчэ, нэмыкIхэм ящыIакIэ яхьылIэгъэ сурэтхэр, фэшъхьафхэри хэгъэгушхоу тызы­щы­псэурэм и Мафэ фэгъэхьы­гъэх.

Къэгъэлъэгъоныр тыгъэгъазэм и 6-м нэс Мыекъуапэ щыкIощт.