Европэм футболымкIэ и Кубок къыдэхыгъэным фэгъэхьыгъэ зэнэкъокъоу чемпионхэм якуп щыкIорэм Урысыем икоманди 3 хэлажьэ.

Гугъэр чIэтымынэу я 3-рэ зэIукIэгъухэм талъыплъагъ. «Локо­мотив» Москва Испанием икомандэ цIэрыIоу «Атлетикэм» дешIагъ. ЗэIукIэгъур 1:1-у аухыгъ.

«Зенит» Санкт-Петербург зыщешIэм, текIоныгъэр къыдихыным пэблэгъагъ. Италием икомандэ лъэшэу «Лацио» дэгъоу де­шIагъ. Артем Дзюбэ шъхьэкIэ ытыгъэ Iэгуаом Александр Ерохиныр лъычъи, хъагъэм дахэу дидзагъ — 1:0. ЗэIукIэгъур кIэухым фэ­кIуагъэу «Лацио» ыпэкIэ къилъи, «Зенит» икъэлапчъэ Iэгуаор дидзагъ — 1:1.

Гъунэгъу краим икомандэу «Краснодар» Испанием щыIу­кIагъ зэлъашIэрэ «Севильем». Тазырыр ыгъэцакIэзэ, «Краснодар» иешIэкIо ныбжьыкIэу Магомед Сулеймановым IэпэIэсэныгъэ ин къыгъэлъэгъуагъ. Метрэ 20 фэдизкIэ зыпэчыжьэ къэлапчъэм зыдаом, Iэгуаор чэрэгъузэ быби, пкъэум щахъощтым фэдэу хъагъэм ифагъ.

«Краснодар» 1:0-у къызэрихьырэм емызэгъэу ыпэкIэ лъыкIуа­тэщтыгъ, «Севильем» иухъума­кIохэр чIыпIэ къин ридзэщтыгъэх. «Севильем» иешIакIохэм ащыщ шапхъэр къэлапчъэм дэжь зыщеукъом, судьям пенальтир ыгъэнэфагъ. М. Берг пенальтир дэгъоу ыгъэцэкIагъ, Iэгуаор къэ­лэпчъэ къогъум къуигъэфагъ. «Краснодар» 2:0-у «Севильем» текIозэ, инасып къыхьыгъэп. «Севильем» гъогогъуищэ «Краснодар» икъэлапчъэ Iэгуаор къыдидзагъ, 3:2-у текIоныгъэр ыгъэ­мэфэкIыгъ.

Я 2-рэ едзыгъом «Севильем» иешIакIохэм ащыщ дысэу зэрэзекIуагъэм, «Краснодар» иешIакIо къызэригъэуцугъэм фэшI судьям Испанием иешIакIо тамыгъэ плъыжьыр ригъэлъэгъуи, ешIапIэм ригъэкIыгъ.

«Севильем» зы нэбгырэ щэкIэми зэнэкъокъум къыхэмыщыгъэу къытщыхъугъ. Арэу щытми, «Краснодар» дэеу ешIагъэу тлъы­тэрэп. Опыт иIэ зыхъукIэ, тигъэ­гушIощтэу тэгугъэ.

ЧIыпIэхэр Апэрэ купыр

1. «Бавария» — 9 2. «Атлетико» — 4 3. «Локомотив» — 2 4. «Зальцбург» — 1. Ятфэнэрэ купыр 1. «Челси» — 7 2. «Севилья» — 7 3. «Краснодар» — 1 4. «Ренн» — 1.

Яхэнэрэ купыр

1. «Боруссия» — 6 2. «Лацио» — 5 3. «Брюгге» — 4 4. «Зенит» — 1. Сыдигъо ешIэщтха? 24.11 «Краснодар» — «Севилья» «Лацио» — «Зенит» 25.11 «Атлетико» — «Локомотив» 01.12 «Локомотив» — «Зальцбург» 02.12 «Краснодар» — «Ренн» «Брюгге» — «Зенит» 08.12 «Зенит» — «Боруссия» «Челси» — «Краснодар» 09.12 «Бавария» — «Локомотив»

ШъунаIэ тешъудз: апэу зыцIэ къетIогъэ командэхэм якъалэхэм ешIэгъухэр ащыкIощтых.

Купхэм апэрэ чIыпIи 2-р къа­щы­дэзыхырэ командэхэр зэнэ­къокъум щылъыкIотэщтых. Я 3-рэ чIыпIэр зыхьыгъэхэр УЕФА-м и Кубок къыдэхыгъэным хэлэжьэщтых.

Германием икомандэхэу «Баварием», «Боруссия» М, «Боруссия» Д купэу зыхэтхэм апэрэ чIыпIэхэр ащаIыгъых. Англием иклубхэу «Манчестер Сити», «Манчестер Юнайтед», «Ливерпуль», «Челси» якупхэм апэрэ чIыпIэр ащаIыгъхэу ешIэкIэ дэгъу къагъэлъагъо.

Испанием иклуб цIэрыIоу «Барселонэр» апэрэ чIыпIэм щыI. Германиемрэ Англиемрэ якоманди 7 апэ итых. Ащ къеушыхьаты футбол клуб лъэшхэр зиIэ хэгъэгухэм нахь къахэщыхэрэр.

Урысыем футболымкIэ иап­шъэрэ куп командэ 16 хэтыр. Англием, Германием, Италием, Испанием, Францием, нэмыкI хэгъэгухэм яапшъэрэ купхэм командэ 18 – 20 ащызэнэкъокъу, нахьыбэ зыщешIэрэ хэгъэгухэри щыIэх. Урысыем ифутбол зэхъо­кIыныгъэхэр ищыкIагъэх.