Джэрзыр къыдихыгъ
Урысые Федерацием кушъхьэфэчъэ спортымкIэ изэнэкъокъу Санкт-Петербург щыкIуагъ.
Чъэпыогъум и 30-м рагъажьи, шэкIогъум и 4-м нэс спортсменхэм трекым яIэпэIэсэныгъэ къыщагъэлъэгъуагъ.
Адыгэ Республикэм кушъхьэфэчъэ спортымкIэ иеджапIэ зыщызыгъэсэрэ хъулъфыгъэхэр, бзылъфыгъэхэр зэIукIэгъухэм ахэлэжьагъэх.
Хэгъэгум изэнэкъокъу иапэрэ мафэхэм Адыгэ Республикэм щапIугъэ Александр Евтушенкэр километри 4 трекым къыщызыкIугъэхэм янэкъокъугъ, джэрз медалыр къыдихыгъ.
Александр Евтушенкэр Урысыем кушъхьэфэчъэ спортымкIэ ихэшыпыкIыгъэ командэ хэт. Тренерэу А. Войновыр ипащэу зэнэкъокъухэм зафигъэхьазырыгъ.
Адыгеим кушъхьэфэчъэ спортымкIэ и Федерацие итхьаматэу Анатолий Лелюк къытиIуагъ СтIашъу Мамыр, Елизавета Ошурковар, нэмыкIхэу тиреспубликэ щыщхэр Санкт-Петербург щыкIогъэ хэгъэгу зэнэкъокъум зэрэхэлэжьагъэхэр. Гъэзетеджэхэр кIэуххэм ащыдгъэгъозэщтых.
Сурэтым итхэр: Александр Евтушенкэмрэ СтIашъу Мамыррэ.