ЕшIэгъу пэпчъ апэ ит командэхэм чIыпIэу зыдэщытхэр зэблахъух. Футболыр ащ фэдэ зэхъокIыныгъэхэм агъэдахэ, хырыхыхьэм фэдэ упчIэхэр нахьыбэ мэхъух.

Я 13-рэ ешIэгъухэр

Хэгъэгум футболымкIэ иапшъэ­рэ куп хэт командэхэм язичэзыу ешIэгъухэм якIэуххэр зэтэгъап­шэх.

«Ахмат» — «Краснодар» — 2:0, «Ротор» — ЦСКА — 0:1, «Рубин» — «Арсенал» — 3:1, «Шъачэ» — «Локомотив» — 2:1, «Спартак» — «Ростов» — 0:1 «Тамбов» — «Динамо» — 1:2, «Уфа» — «Урал» — 1:2, «Химки» — «Зенит» — 0:2.

ЦСКА-м иешIакIоу Алан Дзагоевыр «Ротор» икъэлапчъэ метрэ 20 фэдизкIэ пэчыжьэу Iэгуаор дидзагъ. «Ростов» хэтэу Павел Мамаевым шIыкIэшIу къы­гъоти, «Спартак» икъэлапчъэ Iэгуаор дахэу дидзагъ.

Алан Дзагоевымрэ Павел Мамаевымрэ псынкIэу зэрэгупшысэхэрэр зэIукIэгъум къыщагъэлъэгъуагъ. ЦСКА-р апэрэ чIыпIэм уцугъэ, «Ростов» апэ итхэм ащыщ хъугъэ.

«Зенит» иешIакIохэу А. Мос­товоимрэ А. Ерохинымрэ зырызэ «Химки» икъэлапчъэ Iэгуаор дадзагъ.

«Шъачэ» ешIэкIэ дэгъухэмкIэ тегъэгушIо. А. Заболотнэмрэ Н. Бурмистровымрэ «Локомотив» икъэлапчъэ Iэгуаор зырызэ да­дзагъ. А. Заболотнэм иешIакIэ Урысыем футболымкIэ ихэшыпыкIыгъэ командэ итренер шъхьаIэу С. Черчесовым ыгу рихьыгъ, икIэрыкIэу хэгъэгум ихэшыпыкIыгъэ командэ ригъэблэгъагъ, дунэе зэIукIэгъухэм ахигъэлэжьэн имурад.

Антон Миранчук «Локомотив» иешIэкIо анахь дэгъухэм ащыщ, «Шъачэ» икъэлапчъэ Iэгуаор дахэу зэрэдидзагъэм пчъагъэрэ уеплъы пшIоигъу.

«Динамэр» ешIэгъур кIэухым фэкIуагъэу пенальтикIэ «Тамбовым» ыпэ ишъыгъ. Аужырэ нэгъэупIэпIэгъухэм «Динамэм» иухъумакIо шапхъэхэр ыукъуа­гъэх. Пенальтир «Тамбовым» иешIакIо зегъэцакIэм, «Динамэм» ыкIи Урысыем ихэшыпыкIыгъэ командэ якъэлэпчъэIутэу Антон Шуниным Iэгуаор къызэкIидзэ­жьыгъ.

«Урал», «Рубин» яешIэгъухэм текIоныгъэр къыщыдахыгъ, щытхъур яфэшъуаш. Гъунэгъу краим икомандэу «Краснодар» «машIом хэстыхьэ» зыфаIорэм фэд. Коман­дэм иешIэкIо пчъагъэ сымадж, зэнэкъокъум фэхьазырхэп. Европэм и Кубок фэбанэ, ащ дакIоу, хэгъэгум изэнэкъокъу хэлажьэ. «Ахмат» итренер шъхьаIэу Андрей Талалаевыр къызыщытхъужьыным сыдигъуи фэхьазыр. ПэшIорыгъэшъэу зэIукIэгъум дэгъоу «Ахмат» зыфигъэхьазырыгъэу къыIуагъ. «Краснодар» иамалхэр ыгъэфедэхэу «Ахмат» икъэлапчъэ Iэгуаор апэу дидзагъэмэ, ешIэгъум нэмыкI гупшысэхэр къетIолIэнхэ фаеу хъущтыгъэ.

Зичэзыу ешIэгъухэр гъэшIэгъо­нэу зэрэкIощтхэр пэшIорыгъэ­шъэу тэшIэ, ау апэ ишъыщтыр нахь къэшIэгъуае хъугъэ.

Хэт тыдэ щыIа?

1. ЦСКА — 28 2. «Зенит» — 27 3. «Спартак» — 27 4. «Динамо» — 23 5. «Ростов» — 23 6. «Шъачэ» — 22 7. «Локомотив» — 21 8. «Рубин» — 21 9. «Ахмат» — 20 10. «Краснодар» — 18 11. «Урал» — 14 12. «Арсенал» — 12 13. «Тамбов» — 12 14. «Химки» — 9 15. «Ротор» — 6 16. «Уфа» — 6.

Я 14-рэ зэIукIэгъухэр

07.11 «Арсенал» — «Ротор» «Динамо» — «Локомотив» «Зенит» — «Краснодар» «Шъачэ» — «Уфа» «Тамбов» — «Ахмат» «Урал» — «Спартак» «Химки» — «Рубин» ЦСКА – «Ростов».