ГъашIэм ыуас а зы нэгъэупIэпIэгъур

Бэ cлъэгъугъэр, чIыгухъыер, хъыеныри Iофа?

Слъэгъугъ чIыгусысыр, Сиатэ кIэныжъэу тиунэжъ зэхэкъутагъэу ЛъэгонджэмышъхьэкIэ сытIысыгъэу гъучIыIунэхэр сIэхэм къахаоу …

Сигупсэу зыпсэ хэкIыгъэу сшIошIырэ сабыим и «ыыхъ» макъэ тхьакIумэнэIусым еогъэ нэгъэупIэпIэгъур, ГъашIэм ыуас а зы нэгъэупIэпIэгъур.

Мы нэ мыгъохэм зэо мэхъаджэри алъэгъугъ.

Синыбджэгъу ыпшъэтыкъ, ыпсэ хихынэу зимурад псэхэхым зэриIыгъыщтыгъэм фэдэу, Ыпсэ хэсымгъэкIын симурадэу УIагъэр «е сымытхьалэмэ» сIоу, Сыгу кIодыгъэу пытэ-пытэу сIыгъэу, нэбэ-набэу къысэплъэу зыпсэ хэкIыгъэу сшIошIырэ синыбджэгъум И «ыыхъ» макъэ тхьакIумэнэIусым Еогъэ нэгъэупIэпIэгъур, ГъашIэм ыуас а зы нэгъэупIэпIэгъур.

Хьадэхэр хьэдамэхэр сыбгыныгъэ сызэрыкIогъэ, сакIыб хъугъэ гъогухэм ателъхэу, Хы Iушъом скIокI сипкIэнтIэпс ыгъэулъыигъэ сишхонч илъэу къэсщэгъэ жьыр…. Джы игъоп, ау, шъошIа, Фитыныгъэм ымэ хым хэлъэу къысшIошIы. Джары, тыгъэр къохьажьы. Къохьажьыми, къыкъокIы. КIорэр, кIодырэр, егъашIэми къэзымыгъэзэжьыщтыр тыгъэр арэп, а зы мафэр ары.

Джары, а зы мафэр, сакIыб хъугъэ гъогухэм хьадэхэр ателъэу, хьэдамэхэр къеоу сIупэ, Сыхъум ихы Iушъо сыIутэу, А нэгъэупIэпIэгъум зэхэсхыгъэ, сызэпэмыгъэ хым хэлъ фитыныгъэм ымэ, ГъашIэм ыуас а зы нэгъэупIэпIэгъур

Джары, мафэ къэс тыгъэр къохьажьы мэфэ къэс тыгъэр къыкъокIы, Къэзымыгъэзэжьырэр а мафэхэр ары. Илъэсыбэ блэкIыгъ, къымыгъэзэжьэу. Мы нэхэм алъэгъугъэр бэкIэ нахьыб, Iаджи къышъосымыIоми…

Джы сиунэ сис, зэкIэри кIым-сым, сшIэрэп, егъашIэми джы мы кIым-сымыгъэм сызэрэщыщынэрэм фэдэу сыщынагъэу КъыхэкIыгъэп.

Iистидрадж зыфаIорэр сыд, ШъошIа? Шъубыслъымэнмэ, шъушIэнба! ШъумышIэрэми зэжъугъэшIэнба! Тхьэм итхьагъэпцIыгъэр ары Iистидраджыр.

Мы мафэхэр кIым-сымых. Джыри тыгъэр къохьажьы, джыри къыкъокIыщт. Къэзымыгъэзэжьыщтыр ГъашIэ псау зыосэ нэгъэупIэпIэгъухэр ары.

Сихэку шIу слъэгъуныр сипшъэрылъ

Сихэку исхэм «Лениныр синур» аIощтыгъ Джа нурэр, сэ къысфэнурэщтыгъэп. «Партиер синэф» аIощтыгъ, Джа партиер сэ къысфэнэфыщтыгъэп. Коммунизмэм орэд фаIощтыгъ, Джа орэдыми сэ сыдежъыущтыгъэп.

Джащыгъуми адыгэ хэкур, Спсэ хэтIэгъэ чIыгур, ШIу слъэгъоу, сырицIыфынэу СССР-м лъэIу тхылъ естыгъагъ.

СыIиманцызэп, шыкур, Сыбыслъымэн Тхьэм Iомэ, Хэку кIасэр, убыслъымэнмэ, Iиманым изы Iахь.

СшIэрэп джэуапи, Хъуни, мыхъуни КъысфамыIонэу Схэлъыгъэр, Джэуапынчъэу Сыкъагъэнэгъагъ.

Сылъэпсэнчъэп, шыкур, Сыадыг, Тхьэм Iомэ, Хэку кIасэр, уадыгэмэ, Адыгагъэм изы Iахь.

Псыхъопсыр мычъэу, Уахътэри блэмыкIэу Хъурэп….

Коммунистхэм яорэд Дежъыухэрэм Капитализмэм джы фаусы орэд…

Сэ хьау сиIэп, Орэкоммунист, Орэкапиталист, Сихэку ШIу слъэгъуныр, Шыкур, сыадыг, Сыбыслъымэнышъ, СынатIэ тетхагъ…

ОрэтхьамыкI, Орэбай, Шыкур, сыадыг, Сыбыслъымэнышъ СынатIэ тетхагъ. Сихэку ШIу слъэгъуныр, Сипшъэрылъ.

Сыд шIу узкIэслъэгъурэр, силъэпкъ?

ИIэкIыб себэунэу, ЫIэгу сынапэ щысфэнэу СызфалIэрэ Сянэ хыкIыбым щыI.

О силъэпкъ, Себэунэу, сынапэ щысфэнэу Iэгуи, лъэгуи уиIэп, СшIэрэп ШIу узкIэслъэгъурэр!

Чъыгы жьаум тычIэсэу, Мэкъу теуагъэу, Тутыныбжъэ сыздешъо сшIоигъо СшынахьыкIи километрэ Мин пчъагъэкIэ Къыспэчыжь.

О силъэпкъ, Къаштэ тутыныбжъэ, КъэсымыIошъоу СшIэрэп ШIу узкIэслъэгъурэр!

Сынэ къыкIаплъэу, Ынэ сыкIаплъэу СыздэгущыIэшъущт Сшыпхъуи Лъэс гъогукIэ Сынэмысышъунэу Хымэ чIыгум ис.

О силъэпкъ, СыкIэплъэнэу Нэ уимыIэу, СшIэрэп ШIу узкIэслъэгъурэр.

ИкъэнэтIэхэс мыжъо Сшъхьэ фэсыусэеу, Сыгу илъхэр ЕсIон фалIэ сылIэзэ, Сятэ ыкъашъхьэ Сымылъэгъузэ Илъэсыбэ блэкIыгъ.

О силъэпкъ, Упсэ хэкIыгъ СIонти, КъэнэтIэхэс уиIэп. СшIэрэп ШIу узкIэслъэгъурэр.

О силъэпкъ, Тхьэм тырихьакI. Непэ-неущэу Спсэ хэкIымэ, ХьадрыхэмкIэ «О уадыга?» АIоу къыскIэупчIэщтхэп. СшIэрэп, ШIу узкIэслъэгъурэр.

О силъэпкъ, Тиунэ исым «О Шапсыгъэр, УинэкIмэ, хьазыр Iанэр» ЗыфиIорэм фэдэу Укъысэмыджэщтмэ, СшIэрэп ШIу узкIэслъэгъурэр.

О силъэпкъ, Сикуко цIыкIум «Тат, жъуагъохэм Ошъогум ЗышIуагъэнэнэу къопс яIа?» ЗыфиIорэм фэдэу, УпчIэ гохьхэр уимыIэмэ, СшIэрэп ШIу узкIэслъэгъурэр.

О силъэпкъ Шъэожъыем «ЕджапIэм мыкIорэр ЦIыф мыгъасэ Хъущт» зыIон Хабзэ щыIэпи!» КъыIорэм фэдэу СымыгъэгушIощтмэ СшIэрэп ШIу узкIэслъэгъурэр!

Сыхъум «сыкъэухъум» ыIоу къеджэгъагъ

Аджалыщэр Мышъхьаусыгъэнчъэу Фитыныгъэм хэдэгъэ ПсэшIум Нэсымэ, «Я си алахь, Лааилахьэ иллаллахь!»

Узхэдагъэр Хьэдагъэ дахэ. Адзыгъэ-Iудзыгъэ АмышIэу Къошэу къытпэгъокIыгъэ Азгъэхэм СакIэхъопсы.

Яшъо Ашъо кIэдзагъэхэм, Азгъэхэм яIуакIэу, Афырхацэхэм СакIэхъопсы.

Пчэдыжьыпэ осэпсэу, Хыбзыу тэмашъхьэу, УимыгъэукIытэжьэу УнэкIушъхьэ Нэпсыр тырилъхьэзэ БлэкIыгъэ Илъэс тIокIырэ блырэм Тхыдэжъ-пшысэ хъугъэ Ныбджэгъуныгъэм СыкIэхъопсы.

Къушъхьэ чапэм, Къэлэ стыгъэм Пыурэ Iугъамэм Тепэмызэ, Лъыпсым ЫтхьакIыгъэ Хы Iушъом Тынэсынба зыщытIощтыгъэ Сыхъум СыкIэхъопсы.

БлэкIыгъэм КъыкIэлъыкIуагъэм итхыдэ къэсIонэу Сыфаеп. Джы бэкIэ Джа мафэ стырэу, МэфэшIухэм Сапэчыжь.

КIо, сшIэрэп, ЗэзгъэшIэгъэ Къодыер — Тхьэм ыIуагъэр Хъун. Ари хъун.