Апшъэрэ купым хэт футбол командэхэу Уры­сыем изэнэкъокъу хэлажьэхэрэм чъэпыогъум и 24 — 26-м я 12-рэ ешIэгъухэр яIагъэх.

ЗэIукIэгъухэм якIэуххэр

«Ахмат» — «Уфа» — 3:1, «Зенит» — «Рубин» — 1:2, «Краснодар» — «Спартак» — 1:3, «Локомотив» — «Ротор» — 1:2, «Ростов» — «Химки» — 0:2, «Урал» — «Тамбов» — 0:0, ЦСКА — «Арсенал» — 5:1.

Хэта зышIэщтыгъэр?

Футбол ешIэгъум къырыкIощтыр, кIэухэу фэхъущтыр къэ­шIэгъуае. Арэу щытми, «Зенит» Санкт-Петербург щешIэзэ, «Рубин» зэIукIэгъур ыхьыщтмэ хэта пэшIорыгъэшъэу къэзышIэщтыр? Ащ нахь гъэшIэгъон Европэм и Кубок фэбэнэрэ «Локомотив» Москва истадион щешIэзэ, Урысыем изэнэкъокъу аужырэ чIыпIэр щызыIыгъ «Ротор» Волгоград къызэрэтекIуагъэр.

Ростов-на-Дону, Краснодар, нэмыкI къалэхэм ащыкIогъэ ешIэ­гъухэм якIэуххэри тэгъэшIагъох. Хэгъэгум изэнэкъокъу нахь чы­жьэу зылъыкIуатэкIэ, «Химки», «Ротор», нэмыкIхэр чIыпIэу непэ зыдэщыIэхэр зэблахъущтхэу тэгугъэ.

Пчъагъэр зэфэдэми, ешIакIэр…

«Ахмат», «Динамэм», «Спартак» яешIэгъухэр 3:1-у къахьыгъэх. «Динамэм» итренер шъхьа­Iэу Сандро Шварц агъэнэфагъ. Германием ар къыращыгъ, командэ зэфэшъхьафхэм Iоф адишIагъ.

«Динамэм» иешIакIоу Лесовоим Шъачэ икомандэ икъэлапчъэ Iэгуаор я 11-рэ такъикъым ди­дзагъ — 1:0. «Шъачэм» хэтэу Мевле я 21-рэ такъикъым «Динамэм» икъэлапчъэ Iэгуаор дидзагъ. «Динамэр» нахь псынкIэу зэрешIэрэм ишIуагъэкIэ текIо­ныгъэр къыдихыгъ.

«Спартак» Краснодар зыще­шIэм, судьяу В. Безбородовым зэIукIэгъур зэрищэзэ хэукъоныгъэхэр ышIыгъэхэу зылъытэхэрэм ащыщых «Зенит» икъэлэпчъэIутэу Михаил Кержаковыр, журнали­стэу Константин Генич, ФИФА-м исудьяу Алексей Николаевыр, нэмыкIхэри.

«Спартак» иешIакIоу Понсе «Краснодар» иухъумакIо IэкIэ еIункIи ешIапIэм тыригъэфагъ. Понсе ащ лъыпытэу къэлапчъэм дауи, хъагъэм Iэгуаор дидзагъ. Ащ фэшъхьафхэу судьям къы­химыгъэщыгъэхэр зэIукIэгъум еплъыгъэхэм алъэгъугъэх.

«Зенит» къызэкIэкIощта?

Пчъагъэм изакъоп «Зенит» иешIэгъу къыхэдгъэщырэр. «Рубин» футбол дахэ къыгъэлъэ­гъуагъ. Къэлэпчъэпкъым гъогогъуи 3 Iэгуаор зэрэтыригъэфагъэр къызыдэплъытэкIэ, текIоныгъэм нахь пэблэгъагъэр къэошIэ. «Зенит» итренер шъхьаIэу Сергей Семак къыIуагъэми мэхьанэ етэты.

Командэр бэрэ ыпэкIэ илъыгъ, дэгъоу ешIагъ, ау хъагъэм Iэ­гуаор дидзэн ылъэкIыгъэп.

«Спартак» ащ ебгъапшэмэ, узэрэщытхъун щыI. ЫпэкIэ зилъы­кIэ шъуамбгъоу, псынкIэу ешIэ, ухъумакIохэр егъэгумэкIых.

Дышъэм фэбэнэрэ командэхэм япчъагъэ зэрэхэхъуагъэм тегъэгушIо. Хэгъэгум изэнэкъокъу нахь гъэшIэгъон хъущт.

Мырзэ Резыуан къахэщы

«Ростов» апэ итхэм ащыщ хъуным фэбанэ, «Химки» апшъэ­рэ купым къызэрэхэнэжьыщтым пылъэу хэкIыпIэмэ алъэхъу.

ЕшIэгъу уахътэр аухыгъэу судь­ям къафыхигъэхъогъэ та­къикъ­хэр кIохэзэ, «Химки» иешIа­кIоу Мырзэ Резыуан «Ростов» иухъумэкIуи 4-мэ аIэкIэкIи, хъагъэм Iэгуаор дидзагъ. ЗэIукIэ­гъур зыщаухыщт уахътэм Р. Мырзэм ыпэкIэ ытыгъэ Iэгуаом Б. Идову лъычъи, къэлапчъэм дахэу ди­дзагъ.

Къэбэртэе-Бэлъкъарым ща­пIугъэ Мырзэ Резыуан иешIакIэ бэ­мэ ашIогъэшIэгъон, ягуапэу лъэплъэх.

ЦСКА-р «Арсенал» зэрэтекIуа­гъэм къыхэдгъэщырэр Н. Влашич къэлапчъэм гъогогъуитIо Iэгуаор зэрэдидзагъэр ары. Европэм иешIэкIо анахь дэгъухэм арагъа­пшэ зэрэхъугъэр шIукIэ фэтэ­лъэгъу. Я 86-рэ ыкIи я 87-рэ такъикъхэм Сигурдссонрэ Обляковымрэ «Арсенал» икъэлапчъэ Iэгуаор зырызэ дадзагъ. Ащ ыпэкIэ «Арсенал» пчъагъэм хигъэхъонэу амалхэр зэриIагъэхэр футболым пыщагъэхэм къызэрэхагъэщырэм узэгупшысэн хэлъ.

«Спартак» апэрэ чIыпIэм щыI. Илъэс ешIэгъум икIэух зыфэдэщтым джырэ уахътэ утегущыIэныр нахьышIу. «Спартак» иешIэгъуи 10 фэдиз Москва щыкIощт. ЗэIукIэгъухэм зафигъэхьазырыным фэшI уахътэу иIэр нахьыб.

«Зенит», «Краснодар», «Локомотив» Европэм ичемпионхэм я Кубок фэбэнэщтых. ЦСКА-р УЕФА-м и Кубок хэлажьэ.

ЧIыпIэхэр

Командэ пэпчъ ешIэгъу 12 иIагъ. 1. «Спартак» — 27 2. ЦСКА — 25 3. «Зенит» — 24 4. «Локомотив» — 21 5. «Динамо» — 20 6, «Ростов» — 20 7. «Шъачэ» — 19 8. «Краснодар» — 18 9. «Рубин» — 18 10. «Ахмат» — 17 11. «Тамбов» — 12 12. Арсенал» — 12 13. «Урал» — 11 14. «Химки» — 9 15. «Ротор» — 6 16. «Уфа» — 6.

Я 13-рэ ешIэгъухэр

31.10-м рагъажьэх «Ахмат» — «Краснодар» «Ротор» — ЦСКА «Рубин» — «Арсенал» «Шъачэ» — «Локомотив» «Спартак» — «Ростов» «Тамбов» — «Динамо» «Уфа» — «Урал» «Химки» — «Зенит.