Федеральнэ къэралыгъо IофшIапIэу «Урысые лъэпкъ тхылъеджапIэм» ипащэу А. П. Вершининыр зыкIэтхэжьыгъэ рэзэныгъэ тхылъым тигуапэу зыщыдгъэгъозагъ.

Чъэпыогъум и 5-м къыщыублагъэу и 10-м нэс Урысыем ия ХIII-рэ шIэныгъэ— IофшIэн конференцие Мыекъуапэ щыкIуагъ. ТхылъеджапIэхэм яфондхэм яIо­фыгъохэм, ахэр зэрагъэцакIэхэрэм афэгъэхьыгъэ зэхахьэр шэпхъэ лъагэхэм адиштэу Адыгэ Республикэм и Лъэпкъ тхылъеджапIэ зэрэщызэхащагъэм А. П. Вершининым мэхьэнэ ин иIэу елъытэ.

Конференцием нэбгырэ 485-рэ хэлэжьагъ. Урысые Федерацием ишъо­лъыр 67-мэ ахэр къарыкIыгъэх.

Хэгъэгум иреспубликэ 16-мэ, хэку 38-мэ, крайхэм, автоном шъолъырхэм, Москва, Санкт-Петербург, Севастополь ялIыкIохэр Адыгэ Республикэм зэрэщыIагъэхэр шIукIэ агу къэкIыжьы. Абхъазым, Узбекистан къарыкIыгъэхэри зэхахьэм хэлэжьагъэх.

Адыгэ Республикэм итхылъеджапIэхэм яIофышIэ 88-рэ конференцием хэлэ­жьагъ. Егъэджэн зэхэхьи 5 зэхащагъ. Ясэнэхьат рылажьэхэрэм IофшIэкIэшIум иамалхэр къаIотагъэх.

Онлайн шIыкIэм тетэу конференциер кIуагъэ, нэбгырэ мини 5 еплъыгъ.

А. П. Вершининыр Адыгэ Республикэм культурэмкIэ иминистрэу Аулъэ Юрэ лъэшэу фэраз, «Тхьауегъэпсэу» зэрэриIожьырэр тхыгъэм къыщыхегъэщы. Республикэм культурэмкIэ иминистрэ игуадзэу ШъэуапцIэкъо Аминэт, респуб­ликэ тхылъеджапIэм ипащэу Къыкъ Бэллэ, нэмыкI тхылъеджапIэхэм яшIушIагъэ А. П. Вершининым къыхигъэщыгъ.

Кощхьэблэ районым культурэмкIэ и ГъэIорышIапIэ ипащэу Хъурые Рауф зэхэщэн Iофыгъохэу Кощхьэблэ тхылъеджапIэхэм ащызэрахьагъэхэр конференцием хэлэжьагъэхэм лъэшэу ашIогъэшIэгъоныгъ. Хьакъунэ Фатимэ, Хьам­дэхъу Замырэт, Къушъхьэ Муслъымэт, нэмыкIхэу районым итхылъеджапIэхэм аIутхэу пшъэрылъ хэхыгъэхэр зыгъэцакIэхэрэм яшIэныгъи, ягуетыныгъи зэхэщакIохэм къыхагъэщыгъэх.

Адыгэ Республикэм культурэмкIэ иминистрэу Аулъэ Юрэ ыцIэкIэ Мыекъуа­пэ къагъэхьыгъэ рэзэныгъэ тхылъым къыщеIо къалэхэм, районхэм ятхылъ­еджапIэхэм яIофшIакIэ Урысыем ишъо­лъырхэм зэрашIогъэшIэгъоныр.

ТхылъеджапIэхэм яIофышIэхэм хьа­кIэхэр нэIуасэ афэхъугъэх, упчIэжьэгъу ашIыгъэх. Язэпхыныгъэхэр IофшIэным щылъагъэкIотэным фэшI ятелефонхэм акIэупчIагъэх.

— Адыгэ Республикэр Урысыешхом шIукIэ щашIэ, — къытиIуагъ культурэмкIэ министрэу Аулъэ Юрэ. — Тхылъ­еджапIэхэм ащедгъэжьэгъэ IофшIэнэу цIыфхэр зыгъэгъуазэрэр лъыдгъэкIуатэзэ нэры­лъэгъу IэпыIэгъухэр, зэлъыIэсыкIэ амалхэр дгъэфедэщтых.