Урысые Федерацием кушъхьэфэчъэ спортымкIэ изэнэкъокъу чъэпыогъум и 30-м Санкт-Петер­бург щырагъэжьэщт.

— Адыгеим испортсменхэр купы­шхо хъухэу трекым щыкIощт зэIукIэгъухэм ахэлэжьэщтых, — къытиIуагъ республикэм кушъхьэ­фэчъэ спортымкIэ и Федерацие итхьаматэу Анатолий Лелюк. — ПэшIорыгъэшъэу зэнэкъо­къухэм, егъэджэн зэIукIэгъухэм яIэпэIэсэныгъэ къащагъэлъэ­гъуагъ.

Хэгъэгум изэнэкъокъоу Омскэ щыкIуагъэм Валерий Исламовым едзыгъохэм ащыщ ятIонэрэ чIыпIэр къыщыдихыгъ. Тыркуем щызэхащэгъэ Дунэе зэIукIэгъухэм типшъашъэхэри, кIалэ­хэри ахэлэжьагъэх. СтIашъу Ма­мыр апэрэ чIыпIэр къыфагъэ­шъошагъ.

Александр Евтушенкэр, Елизавета Ошурковар, СтIашъу Ма­мыр, нэмыкIхэри Урысыем ихэ­шыпыкIыгъэ командэ хэтых. Ва­лерий Исламовыр, Марк Дикий, Ольга Дейко, Елизавета Арчибасовар, Алена Рыцевар бэкIэ тызыгъэгугъэхэрэм ахэтэлъытэх.

— Мыекъопэ районым икъу­шъхьэхэм, гъогухэм, Лэгъо-Накъэ мэфэ пчъагъэм къыкIоцI егъэ­джэн зэхахьэ ащытиIагъ, — къе­Iуатэ СтIашъу Мамыр. — Гъо- гу зэщызым кушъхьэфачъэмкIэ ущызекIонымрэ къушъхьэ шыгум удэкIоенымрэ зэрэзэфэшъхьафхэр титренерхэм дэгъоу ашIэ. Спортым илъэныкъуабэ къыдалъытэзэ, Анатолий Лелюк, тренерэу Алексей Войновым тиегъэджэн Мыекъопэ районым гъэшIэгъонэу щызэхащагъ.

Елизавета Ошурковам зэри­лъытэрэмкIэ, Мыекъопэ районым икъушъхьэхэр зэрэдахэхэм да­кIоу, жьыр щыкъабз. Спортсменхэм кIуачIэр агъэпытэнымкIэ, якъулайныгъэ хагъэхъонымкIэ амалышIухэр яIагъэх.

Тренерэу Алексей Войновым изэфэхьысыжьхэм къащыхигъэщыгъ нэбгырэ пэпчъ гуетыныгъэ хэлъэу зызэригъэхьазырыгъэр.

— Тиспортсменхэм яIэпэIэ­сэныгъэ хагъэхъонымкIэ IэпыIэгъу зэфэхъужьых, спортышхом икъэбарыкIэхэр къызэфаIуатэх, — тизэдэгущыIэгъу лъегъэкIуатэ Анатолий Лелюк. — Санкт-Петербург мэфэ заулэрэ хэгъэгум изэнэкъокъу щыкIощт. Хагъэу­нэфыкIырэ чIыпIэхэр къыдэзы­хыщтхэм, дунэе зэIукIэгъухэм ахэ­лэжьэщтхэм Адыгеир ащыщ зэрэхъущтым тыфэбэнэщт.