Урысыем и Къыблэ шъолъыр дзюдомкIэ изэIукIэгъухэр Ермэлхьаблэ зэрэщыкIуагъэхэр зэфэтэхьысыжьых.

Аныбжьхэм ялъытыгъэу бэна­кIохэр купищэу гощыгъагъэх. ХагъэунэфыкIырэ чIыпIэхэр къы­дэзыхыгъэхэр Урысыем икIэух зэнэкъокъухэу Барнаул, Мурманскэ, Кемеровэ, Хабаровскэ ащы­кIощтхэм ахэлэжьэщтых.

Адыгэ Республикэм зыщызыгъасэхэу илъэс 18-м нэс зы­ныбжь­хэм хагъэунэфыкIырэ чIыпIи 10 Ермэлхьаблэ къыща­хьыгъ. Ты­гъэгъазэм и 14 — 17-м Барнаул тиныбжьыкIэхэр щыбэнэщтых.

Илъэс 21-м нэс зыныбжьхэм язэIукIэгъухэм тибэнэкIо 11 къа­хэщыгъ. Ахэр тыгъэгъазэм и 7 — 12-м Мурманскэ щызэхащэщт зэнэкъокъум хэлэжьэщтых.

Зыныбжь икъугъэхэр Ермэлхьаблэ зыщэбанэхэм, Адыгеим щыщ нэбгырэ 12-мэ медальхэр къафагъэшъошагъэх. Тибатырхэм шэкIогъум и 5 — 11-м Хабаровскэ яIэпэIэсэныгъэ къыщагъэлъэ­гъощт.

Урысыем и Кубок къыдэхыгъэ­ным фэгъэхьыгъэ зэнэкъокъур тыгъэгъазэм и 20 — 24-м Кемеровэ щыкIощт. Хабаровскэ щыбэнагъэхэр арых Кемеровэ щы­кIощт зэнэкъокъум хэлэжьэщтхэр.

Зэфэхьысыжьхэр

Яонтэгъугъэхэм ялъытыгъэу апэрэ чIыпIэхэр къыдэзыхыгъэ­хэм гъэзетеджэхэр ащытэгъэгъуа­зэх. ХьакIэко Данэрэ Екатерина Соловьевамрэ илъэс 18 зыныбжь­хэм якуп апэрэ чIыпIэхэр къыщахьыгъэх.

Илъэс 21-м нэс зыныбжьхэм ЦIыкIушъо Асхьад, Юрий Балоян, Анна Лодневар, Бэгъ Аслъан къахэщыгъэх, дышъэр къыдахыгъ.

Зыныбжь икъугъэхэм язэхэпхъэгъэ зэнэкъокъу Ульяна Тка­ченкэм, Мерэм Дамир, Датхъужъ Алый апэрэ чIыпIэхэр къыщахьыгъэх, яIэпэIэсэныгъэ зэрэхагъа­хъорэр къаушыхьатыгъ.

— ТибэнакIохэм ягъэхъагъэ тегъэгушIо, — къытиIуагъ Адыгэ Республикэм дзюдомкIэ ихэшыпыкIыгъэ командэ итренер шъхьа­Iэу, республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу Бастэ Сэлымэ. — Зэпахырэ узым къыхэкIэу бэнакIохэм икъоу загъэхьазырын алъэкIыгъэп. Арэу щытми, якъулай, кIуачIэм ахагъэхъон алъэ­кIыгъ. Неущрэ мафэр нахьышIу зэрэхъущтым сицыхьэ телъэу егъэджэн-зыгъэсэн зэIукIэгъухэр зэхэтэщэх.

ХэшыпыкIыгъэ купым хэтых

Мыекъопэ бэнэпIэ-еджапIэм дзюдомкIэ зыщызыгъасэхэрэр хэгъэгум щашIэх. Урысыем ихэшыпыкIыгъэ командэ хэтых Ме­рэм Дамир, Ордэн Андзаур, Датхъужъ Алый, Татьяна Шаталовар.

Урысыем дзюдомкIэ ихэшыпы­кIыгъэ командэ итренер шъхьаIэу Тао Хьасанбый къызэрэтиIуа­гъэу, тибэнакIохэм пэшIорыгъэшъ зэ­IукIэгъухэр яIагъэх. Егъэджэн-зыгъэсэн Iофтхьабзэхэм дэгъоу закъыщагъэлъэгъуагъ. Хэгъэгум ихэшыпыкIыгъэ командэ хэтхэу дунэе зэнэкъокъухэм зафагъэ­хьазыры.

Мыекъуапэ щыкIощт

2021-рэ илъэсым, Iоныгъо мазэм и 23 — 27-м Урысыем дзюдомкIэ изэнэкъокъу Мые­къуапэ щыкIощт. Хэгъэгум ибэ­нэкIо анахь лъэшхэр Адыгэ Респуб­ликэм щызэIукIэщтых. Зэнэкъо­къум зэрэхэлэжьэщтхэм дакIоу, спортсменхэм, тренерхэм, зэхэщакIохэм Адыгеим ичIыпIэ да­хэхэр зэрагъэлъэгъущтых.

Культурэм, искусствэм яIофышIэхэм, зекIохэр зэхэзыщэ­хэрэм, лъэпкъ IэпэIасэхэм Адыгэ Республикэм ихэхъоныгъэ­хэр зэхахьэхэм къащагъэлъэгъо­щтых.

Мыекъопэ бэнэпIэ-еджапIэм зыщызыгъасэхэрэм яшъыпкъэу зэнэкъокъум зыфагъэхьазыры.

Алырэгъум текIоныгъэу къыщыдахырэмкIэ тибэнакIохэм тагъэгушIонэу, Адыгэ Респуб­ликэм ищытхъу спортышхом лъагэу щаIэтынэу, тибыракъ щагъэбыбэтэнэу афэтэIо.