«Зенит» — «Брюгге» — 1:2. Чъэпыогъум и 20-м Санкт-Петербург щызэдешIагъэх. «Ренн» — «Краснодар» — 1:1.

Чемпионхэм якуп хэт футбол командэхэр Европэм и Кубок къыдэхыгъэным фэбанэх. Урысыем икомандищ зэнэкъокъум хэлажьэ.

Бельгием икомандэу «Брюгге» Европэм щыцIэрыIу. «Зенит» ащ ебгъапшэмэ, тиешIа­кIохэм текIоныгъэр къыдахыщтэу тлъытэщтыгъэ. Пчъагъэр 1:1-у Дзюбэ, Мостовоим, нэмыкIхэм «Брюгге» икъэлапчъэ Iэгуаор дадзэнэу чIыпIэшIу итыгъэх, ау янасып къыхьыгъэп. ЕшIэгъум иаужырэ такъикъ Бельгием иешIакIохэм нахьышIоу агъэфедагъ. Тиклуб икъэлапчъэ благъэу къекIугъэх, хъагъэм Iэгуаор дадзагъ — 1:2.

Чъэпыогъум и 28-м «Зенит» Германием щешIэщт, «Боруссием» енэкъокъущт.

«Краснодар» Францием ще­шIагъ. «Ренн» зыфиIорэр командэ лъэшхэм ащыщ. Пчъагъэр 1:0-у французхэм зэIукIэгъур ахьызэ, «Краснодар» иешIакIоу Рамирес ухъумакIохэм аIэкIэкIи, я 59-рэ такъикъым къэлапчъэу зыпэчыжьэм дахэу Iэгуаор ди­дзагъ.

Аужырэ такъикъхэм Францием иешIакIохэр бэрэ апэкIэ къилъы­гъэх. ТиухъумакIохэр, анахьэу къэлэпчъэIутэу Матвей Сафоновыр, цыхьэшIэгъоу ешIагъэх.

Чъэпыогъум и 28-м «Краснодар» дунаим щызэлъашIэрэ «Челси» IукIэщт, зэнэкъокъур Краснодар щыкIощт. Англием икомандэ апэрэу гъунэгъу краим икъэлэ шъхьаIэ щешIэщт.

Дунэе футболыр Краснодар къылъыIэсыгъ. Футболыр зышIогъэшIэгъонхэр Адыгеим икIыхэзэ, Краснодар щыкIорэ зэIукIэгъухэм ягуапэу яплъых.

«Зальцбург» — «Локомотив» — 2:2.

Чъэпыогъум и 21-м зэIукIэ­-гъур Австрием щыкIуагъ. «Локомотив» иешIакIохэу къэлапчъэм Iэгуаор дэзыдзагъэхэр: Эдер, Лисакович.

КIэуххэр

Европэм икъалэхэм ащыкIогъэ ешIэгъухэм якIэуххэр зэтэ­гъапшэх.

«Челси» — «Севилья» — 0:0, «Лацио» — «Боруссия» Д — 3:1, «Барселона» — «Ференцварош» — 5:1, ПСЖ – «Манчестер Юнайтед» — 1:2, «Лейпциг» — «Истанбул» — 2:0, «Реал» — «Шахтер» — 2:3, «Бавария» — «Атлетико» — 4:0, «Интер» — «Боруссия» М — 2:2, «Аякс» — «Ливерпуль» — 0:1, «Манчестер Сити» — «Порту» — 3:1, «Олимпиакос» — «Марсель» — 1:0, «Митьюлланд» — «Аталанта» — 0:4. ЯтIонэрэ ешIэгъухэр чъэпыогъум и 27 – 28-м Европэм щыкIощтых.