Унэшъо хэхыгъэхэр агъэцакIэх
Адыгеим культурэмкIэ и Министерствэ иколлегие изичэзыу зэхэсыгъо республикэм и Къэралыгъо филармоние тыгъуасэ щыкIуагъ.Коллегием ипащэу, республикэм культурэмкIэ иминистрэу Аулъэ Юрэ зэхахьэр зэрищагъ. Ащ зэрэхигъэунэфыкIыгъэу, 2020-рэ илъэсым телъытэгъэ Iофыгъохэр коллегием ыгъэунэфыгъэх, унэшъо хэхыгъэхэр егъэцакIэх.
Лъэпкъ проектэу «Культурэр» щыIэныгъэм зэрэщыпхыращырэм республикэм культурэмкIэ иминистрэ иапэрэ гуадзэу Ольга Гавшинам тыщигъэгъозагъ.
Адыгеир къэралыгъо гъэпсыкIэ иIэу зыпсэурэр илъэси 100 зэрэхъурэм фэгъэхьыгъэу республикэм культурэмкIэ иминистрэ игуадзэу ШъэуапцIэкъо Аминэт къэгущыIагъ. Iофтхьабзэхэр агъэцакIэхэзэ, дунэе фестивальхэр, зэнэкъокъухэр, зэIукIэгъу гъэшIэгъонхэр зэрэзэхащэхэрэм къытегущыIагъ.
Адыгеим и ЛIышъхьэу КъумпIыл Мурат ынаIэ зытыридзэгъэ Iофыгъохэр культурэмкIэ Министерствэм къыдилъытэхэзэ, щыIэныгъэм диштэрэ мэфэкI зэхахьэхэр нахьыбэу зэрэзэхащэщтхэр зэхэсыгъом къыщаIуагъ.
Сэнаущыгъэ зыхэлъ кIэлэеджакIохэм, студентхэм Тхьабысымэ Умарэ ыцIэкIэ агъэнэфэгъэ стипендиехэр аратыщтых. Министерствэм иотдел ипащэу Шэуджэн Бэлэ Iофхэр зэрэзэхащэхэрэм къатегущыIагъ.
Урысые Федерацием иапшъэрэ еджапIэхэм Адыгеим щыщ ныбжьыкIэхэр ачIэхьагъэхэу зэращеджэхэрэр, республикэм ищыкIэгъэ кадрэхэм ягъэхьазырын гъэцэкIагъэ зэрэхъурэр ШъэуапцIэкъо Аминэт зэхахьэм къыщиIотагъ.
ТхылъеджапIэхэм, культурэм иунэхэм язытет, театрэхэм яIофшIэн, искусствэхэмкIэ еджапIэхэм зэхъокIыныгъэу афэхъухэрэм, цIыфхэм IэпыIэгъу ятыгъэнымкIэ зэлъыIэсыкIэ амалхэр зэрагъэфедэхэрэм, къэралыгъо ыкIи чIыпIэ щытхъуцIэхэр зыфаусыщтэу къыхахыгъэхэм, нэмыкIхэм атегущыIагъэх. Зэхахьэм унэшъо хэхыгъэхэр щаштагъэх.
ЕмтIылъ Нурбый.