Республикэм и Лъэпкъ музей илъэс 95-рэ зэрэхъугъэм ехьылIэгъэ къэгъэлъэгъонэу Мыекъуапэ къыщызэIуахыгъэр едзыгъуищэу гощыгъэ.

Сурэт къэгъэлъэгъуапIэм ипащэу, Адыгэ Республикэмрэ Къэ­рэщэе-Щэрджэсымрэ язаслуженнэ сурэтышIэу Бырсыр Абдулахь тизэдэгущыIэгъу къыщыхигъэщыгъэ гупшысэр тшIогъэшIэгъон. Лъэпкъ шIэжьымрэ искусствэмрэ зэпхыгъэхэу сурэтышIхэм яIоф­шIагъэ къагъэлъагъо.

Лъэпкъ музеим, республикэм культурэмкIэ и Министерствэ икъэгъэлъэгъуапIэ яфондхэм къахахыгъэ сурэтхэр графикэ шIыкIэм тетэу гъэпсыгъэх.

Музеим ыныбжь илъэс 95-рэ зэрэхъугъэм ехьылIагъэу «Адыгеим играфик» зыфиIорэ едзыгъом щыIэныгъэм нахь куоу ухещэ, уегъэгъуазэ. Ф. ПэтIыуащэм, А. Къуанэм, Ю. Кириченкэм, А. Резюкиным, нэмыкI сурэтышIхэм яхудожественнэ IофшIагъэ уасэ фэпшIызэ, тарихъыр, шэн-хабзэхэр дэгъоу къазэрэгурыIорэр къэлъагъо.

Урысыем изаслуженнэ сурэтышIэу ПэтIыощэ Феликс, Адыгеим изаслуженнэ сурэтышIэу Тыгъужъ Мыхьамодэ, фэшъхьаф­хэм ясурэтхэу шэн-хабзэхэр къэ­зыIуатэхэрэм лIэужхэр зэфащэх.

Сурэтхэм «уадэгущыIэ»

ЗэлъашIэрэ тхакIоу, Урысыем инароднэ сурэтышIэу Къат Теуцожь иIофшIагъэ гум къегущыIыкIы. Къоджэ щыIакIэр, шэн-хабзэхэр сурэтхэмкIэ къегъэлъагъох. «Ныдэлъф мэкъамэхэм» уяплъы­гъэу «ШакIохэр» зыфиIорэм укIэлъырыхьэмэ, хъугъэ-шIагъэхэр IупкIэу къыриIотыкIыхэу олъытэ.

«Джэныкъо машIом дэжь» — ар сурэт къодыеп

Адыгэ унагъом къуаджэм щыIакIэу щыриIэр 1970-рэ илъэсым сурэтэу ышIыгъ. Джэныкъо машIор зыщыблэрэ унэм гушIуа­гъо илъ. Онджэкъыр, адыгэ къуа­ер, пщэрыхьапIэр — ахэр сурэтым хэплъагъохэ пшIоигъоу ухэщэтыкIы.

Тыгъужъ Мыхьамодэ «Нысащэр», «Нысэр къызэращэрэр», «Шыгъачъэхэр» гукIэ зэфищэхэ зэрэшIоигъор къыхэщэу исурэтхэр ышIыгъагъэхэу тэлъытэ.

Шэн-хабзэхэр

Урысыем культурэмкIэ изаслуженнэ IофышIэу Бырсыр Абдулахь щыIэныгъэм къыхихыгъэ гупшысэхэр сурэтхэм аригъэкIугъэх. ГъашIэм лъапсэр зэрэщыпытэрэм еплъыкIэу фыриIэр къегъэлъагъо.

АIофтэгъэ цIыфым икъэгъэлъэ­гъон А. Бырсырым гъэшIэгъонэу ыгъэпсыгъ. Шыур мэгуIэ, быбрэм фэдэу пэрыохъухэм ялъэ, чIым зытыреIэтыкIы. СурэтышIым етIани шIушIагъэу фэтлъэгъурэр плъыжьышъор, нэмыкIхэр зэригъэфедагъэхэр ары.

Урысыем изаслуженнэ сурэтышIэу Юрий Кириченкэр Азербайджан къыщыхъугъ, щеджагъ. Лъэпкъ шэн-хабзэхэр щагум теплъэу иIэмкIэ, пкъыгъохэмкIэ къегъэлъагъох.

Республикэм изаслуженнэ сурэтышIэу Умэрэ СултIан Шап­сыгъэ шъолъырым, рэхьатныгъэм, фэшъхьафхэм афэгъэхьыгъэу ышIыгъэхэр щыIэныгъэм, шIэжьым япхыгъэх.

Тыкъэзыуцухьэрэ дунаир сурэт­хэмкIэ къэгъэлъэгъогъэныр IофшIэгъэ дэгъоу зэхэщакIохэм алъытэ.

— Республикэм и Лъэпкъ му­зей илъэс 95-рэ зэрэхъугъэр хэдгъэунэфыкIызэ, къэгъэлъэгъо­ныр зэрэзэхащагъэм тегъэгушIо, — къытиIуагъ Адыгэ Респуб­ликэм культурэмкIэ изаслуженнэ IофышIэу, Урысыем ижурналистхэм я Союз хэтэу, зэлъа­шIэрэ археологэу Тэу Аслъан. — Едзыгъуи 3-у гощыгъэ къэгъэлъэгъоным, республикэм икъэралыгъо гъэ­псыкIэ нахь пытэ зэрэхъурэр, сурэтышIхэр щыIэныгъэм игупчэ итхэу искусствэм хэхъоныгъэ зэрэфашIырэр къыхэщых. ЗэхэщакIохэм лъэшэу тафэраз.

Лъэпкъ музеим гъэцэкIэжьын Iофхэр щэкIох. Республикэм ищыIакIэ, итарихъ сурэтхэмкIэ защызыгъэгъуазэ зышIоигъохэр къэгъэлъэгъоным рагъэблагъэх. ШэкIогъу мазэм и 1-м нэс еплъын­хэ алъэкIыщт.