Тыгъэнэбзый
Адыгеим ибжыхьэ дышъ
Илъэсым иуахътэхэр зэфэшъхьафхэми, ахэбдзын ахэмытэу, гур зыгъэшIу закIэх. Ауми, ибэрэчэтыгъэкIэ, игъомылэ IанэкIэ, идышъэшъо теплъэкIэ, итыгъэпс фэбэ гоIукIэ пстэуми къахэщы бжыхьэр.
ЗэплъэкIыгъо тимыфагъэу, тызэсэгъэ апэрэ Iоныгъо мазэр дгъокIотагъэу, чъэпыогъум — ятIонэрэ гурыт бжыхьэ мазэм тыдэIорышIэ.
Адыгеим бжыхьэр щыфаб, щыгъушъ, щытыгъэпс. Iоныгъом чъыг тхьапэхэр, гъэмафэр гум къагъэкIэу, шхъонтIагъэх, зыгъэпсэфыпIэ гупчэхэм, паркхэм къэгъэгъэ дахэхэр — розэхэр, хризантемэхэр, астрэхэр, георгинэхэр, нэмыкIхэр къащэкIых. Бжыхьэ мафэхэм губгъохэм лэжьыгъэр — тыгъэгъазэр, натрыфыр, чIыплъэр ащыIуахыжьы. Чъыг хатэхэм мыIэрысэхэр, къужъхэр, къыцэр, сэнашъхьэр къащаугъои.
Чъэпыогъу мазэри итеплъэ-IуплъэкIэ Iоныгъом джыри пэблагъ, аужыпкъэм, фабэр дэкIуаешъ, гъэмафэм фэд. Ауми чъэпыогъур итеплъэкIэ Iоныгъом текIо: къумбыл ыкIи нэмыкI чъыг тхьапэхэм гуфаплъэу уяплъымэ, гъожьышэ-плъыжьышъох, пкIэшъэ такъор къежьагъэшъ, ошэкурэу чIыгум телъ, чэрэгъузэ тыдэкIи щызэрехьэ. Джары тиреспубликэ ибжыхьэ «дышъэкIэ» цIыфхэр зыкIеджэхэрэр.
Мы мазэм чIыгухэр ажъох, коцыр, хьэр апхъых. МэкIэ-макIэзэ мафэхэр нахь кIако мэхъух, чэщхэр — кIыхьэх. Мафэхэр джыри фабэхэми, чэщхэр чъыIэтагъэх, хэпшIыкIэу нахь къэучъыIы. Аузэ пчэдыжьыпэри нахь къыкIигъэщтыхьэ хъущт. ШэкIогъум икъихьагъум бзыухэм яорэд жъынч макъэ нахь макIэ мэхъу, уашъор къегъолъэхы, жьыр зыбгырыоу къежьэ, ощххэр къефых. Къушъхьэхэм апэрэ осыр къащесы, чIыопсым зэрэщытэу кIымафэм зытырегъэпсыхьэ. Ау Адыгеим ибжыхьэ идэхэгъэ гоIугъэ, ухэтми, угу хэмыпкIэн плъэкIырэп.
Тиреспубликэ хэхъо, зеIэты
Адыгэ Республикэр загъэпсыгъэр бэмышIэу илъэс 29-рэ хъугъэ.
Зэгорэм шIункIым, мышIэныгъэм ахэтыгъэ адыгэ лъэпкъым, шыкур, зиузэнкIыжьыгъ. Совет хабзэм ихьатыркIэ адыгэхэм автономиер бэдзэогъум и 27-м 1922-рэ илъэсым, ВЦИК-м и Унэшъо гъэнэфагъэкIэ, зэрагъэгъотыгъагъ. ИлъэсипшI пчъагъэхэм ащ фэдэ гъэпсыкIэм рыпсэугъэх — яполитикэ, мэкъумэщ, промышленнэ ыкIи культурнэ щыIэкIэ-псэукIэм лъэпсэ пытэашIыгъ.
Тызэрэщыгъуазэу, Адыгэ автоном хэкур, игъо къэси, республикэ хъугъэ.
Джырэ мафэхэм хэпшIыкIэу Адыгэ Республикэм хэхъо, зеушху, зеIэты. Ар гушIуагъо ыкIи насыпыгъ!
Адыгэ тхакIохэу чъэпыогъум къэхъугъэхэр
Ягупшысэ – гъозапIэ
Хьаткъо Ахьмэд (1901 — 1937)
Адыгэ лъэпкъ литературэм икъежьэпIэ-уцупIэ Iутыгъэу, зиакъыл, зишIэныгъэ, зигупшысэ адыгабзэм, адыгэ гущыIэм яухъумэн, адыгэхэм ящыIэкIэ-псэукIэ нахьышIу шIыгъэным, адыгэ литературэм пкъырэ-шъхьэрэ ыгъотыным зышъхьамысыжьэу дэлэжьагъ Хьаткъо Ахьмэд Джанхъот ыкъор. Къуаджэу Хьатыгъужъыкъуае чъэпыогъум и 24-м 1901-рэ илъэсым ар къыщыхъугъ. Ахьмэд ятэ анахь дингъэсэныгъэшхо иIэу хэкум исхэм ащыщыгъ, илъфыгъэхэми шIошъхъуныгъэ пытэ, гъэсэныгъэ ыкIи цIыфыгъэ аригъэгъотымэ шIоигъуагъ.
Хьаткъо Ахьмэд еджэгъэ-гъэсэгъагъ, щыIэкIакIэу къакIорэм игъэпсэкIо чаныгъ. Совет хабзэр агъэуцуи, еджапIэхэр адыгэ къуаджэхэм къазыщызэIуахыхэм, кIэлэегъаджэу Гъобэкъуае Iоф щишIагъ. Мы илъэсхэр ары лъэпкъ поэтическэ творчествэм нахь пэблагъэ зыхъугъэр. Иапэрэ усэхэр 1923-рэ илъэсым гъэзетэу «Адыгэ макъэм» къыщыхиутыгъэх.
1923 — 1926-рэ илъэсхэм Хьаткъор КутВ-м (Коммунистическэ университет трудящихся Востока) Москва щеджагъ.
Ар къызеухым, зыщыщым къыгъэзэжьи, хэку гъэзетым иредактор игуадзэу, иредакторэу, гъэсэныгъэмкIэ хэку исполкомым иотдел, Адыгэ тхылъ тедзапIэм яIофышIэу щытыгъ. 1934-рэ илъэсым къыщегъэжьагъэу, щэIэфэ, Хьаткъо Ахьмэд Адыгэ тхэкIо организацием пшъэдэкIыжь зыхьырэ исекретарыгъ.
Ытхыхэрэр 1923-рэ илъэсым къыщегъэжьагъэу къыхиутыщтыгъэх. Рассказэу «Былым фэкIод» (1927), пьесэхэр дэтхэу «КIэр», усэ-орэдхэр зыдэт сборникэу «Пщыналъ», «Часовой», «ЦIыфыр щэрэI», «Стиххэр» къыдигъэкIыгъэх. Хьаткъо Ахьмэд илъэс 36-рэ ныIэп къыгъэшIагъэр, ау акъыллэжьыгъэшхо илъэпкъ къыфигъэнагъ. СССР-м итхакIохэм я Союз 1934-рэ илъэсым щегъэжьагъэу хэтыгъ. Лъэпкъ поэзием илъэпсэгъэуцугъ.
Пэнэшъу Сэфэр
ЛIэшIэгъуныкъом къехъугъэу адыгэ литературэм дахэу щэлажьэ Пэнэшъу Сэфэр Иляс ыкъор. Тхылъеджэхэм лъэшэу якIэсэ тхакIу. ИсэнэхьаткIэ агрономэу, ау ыгукIэ тхэкIо-гупшысакIоу къэхъугъ. Теуцожь районымкIэ къуаджэу Къэзэныкъуае (хычIэгъ хъугъэхэм ащыщ) чъэпыогъум и 29-м 1930-рэ илъэсым къыщыхъугъ.
Сэфэр гъэсэныгъэ-шIэныгъи, тхэн къулайныгъи бэшIагъэу ыгъотыгъ, IэнэтIэ зэфэшъхьафхэри ыгъэцэкIагъэх: хэку гъэзетэу «Социалистическэ Адыгеим» иIофышIэу ригъажьи, мэкъу-мэщымкIэ отделым ипащэу, редактор шъхьаIэм игуадзэу Iоф ышIагъ. 1998-рэ илъэсым къыщыублагъэу, илъэс 20-м, республикэ кIэлэцIыкIу журналэу «Жъогъобын» зыфиIорэм иредакторыгъ. Сэфэр ытхыхэрэр 1965-рэ илъэсым щегъэжьагъэу хеутых.
Сэмэркъэу жанрэмкIэ ригъэжьагъ тхэныр — «УпыкIын ащ, сиблагъэ» (1968), ащ къыкIэлъыкIуагъэх иповестхэр, ирассказхэр зыдэт тхылъхэр, ироманхэр адыгабзэкIи урысыбзэкIи къыдэкIыгъэх. Джырэ щыIакIэм идэгъуи идыджи къыбгуригъаIоу матхэ. Пэнэшъу Сэфэр Адыгэ Республикэм инароднэ тхакIу, Урысые Федерацием ыкIи Адыгэ Республикэм культурэмкIэ язаслуженнэ IофышI, медалэу «Адыгеим и Щытхъузехь» зыфиIорэр къыфагъэшъошагъ, Урысыем итхакIохэм я Союз 1977-рэ илъэсым щегъэжьагъэу хэт.
Мэхъош Руслъан (1940-2018)
Мэхъош Руслъан Ибрахьимэ ыкъор Тэхъутэмыкъое районымкIэ къуаджэу Козэт къыщыхъугъ. КIэлэегъэджэ училищыр, Адыгэ къэралыгъо кIэлэегъэджэ институтыр къыухыгъэх. Козэт еджапIэм икIэлэегъаджэу, изавучэу, ипащэу Iоф ышIагъ. Козэт къоджэ кой администрацием ипэщагъ.
Руслъан ытхыхэрэр 1975-рэ илъэсым щегъэжьагъэу хиутыщтыгъэх. ТхэкIо купым ятхыгъэ зыдэт сборникэу «КIочIэ зэикIым» апэ иусэхэмрэ ипоэмэхэмрэ къыдэхьагъэх. Ащ ыужым ежь итхылъхэр шъхьафэу къыдэкIыхэ хъугъэ: «Ахьырэри мэгугъэ», «Заор, заор!», «Сы Сыда, сы Хэта?», «Гугъэм инэфшъагъу», «Гугъэм инэфылъэ фаб», нэмыкIхэри къыдэкIыгъэх. Мэхъош Руслъан АР-м лъэпкъ гъэсэныгъэмкIэ изаслуженнэ IофышIагъ, егъэджэн программэхэмрэ методическэ IэпыIэгъухэмрэ ягъэхьазырын хэлажьэщтыгъ, текIоныгъэр къащыдихэуи къыхэкIыгъ. Урысыем итхакIохэм я Союз 1998-рэ илъэсым щегъэжьагъэу хэтыгъ.
НэкIубгъор зыгъэхьазырыгъэр Мамырыкъо Нуриет.