Урысыем ушу-саньдамкIэ изэнэкъокъу къалэу Владимир щыкIуагъ.

Къыблэм ихэшыпыкIыгъэ командэ хэтхэу Адыгэ Республикэм испорт еджапIэу N 2-м зыщызыгъасэхэрэр зэIукIэгъухэм ахэлэжьагъэх. Урысыем ишъолъыр­хэм ябэнэкIо 300-м нахьыбэ зэнэкъокъугъ.

Дунаим, Европэм язэIукIэгъу­хэм хагъэунэфыкIырэ чIыпIэхэр къащыдэзыхыгъэ Кристина Морозовам пэшIорыгъэшъ едзыгъо­хэм текIоныгъэр къащихьыгъ. Дышъэм фэгъэхьыгъэ зэIукIэгъур Волгоград хэкум къикIыгъэ пшъа­шъэм нэгъэупIэпIэгъу 43-кIэ къышIуихьыгъ.

Адыгэ къэралыгъо университетым физкультурэмрэ дзюдомрэ­кIэ и Институт ия 5-рэ курс К. Моро­зовар щеджэ. Урысыем изэнэ­къокъу зэкIэлъыкIоу яблэ­нэрэ дышъэ медалыр къыщихьыгъ. Пшъашъэр апшъэрэ еджапIэм ще­джэзэ, иIэпэIэсэныгъэ хегъа­хъо.

2002 — 2003-рэ илъэсхэм къэ­хъугъэхэм якуп Виктория Чугреевар хэтыгъ. Урысыем иныб­жьыкIэхэм язэнэкъокъу ящэнэрэу дышъэр къыщыдихыгъ.

Бзылъфыгъэхэм язэнэкъокъу­шхо апэрэу хэлэжьэгъэ Вилена Парамоновам тигъэгушIуагъ. Джэрзыр къыдихи, тренерхэр къыщытхъугъэх.

Заур Магомедовыри хэгъэгум ихъулъфыгъэхэм язэнэкъокъу апэрэу хэлэжьагъ, джэрзыр къы­фа­гъэшъошагъ. З. Магомедовым шапхъэхэр ригъэкъугъэх Уры­сыем спортымкIэ имастер хъуным фэшI.

Урысыем ушу-саньдамкIэ итренер шъхьаIэу Ачало Магомедаминовыр Адыгеим испорт­смен къыщытхъугъ, спортымкIэ мастер зэрэхъугъэм фэшI къыфэгу­шIуагъ. Адыгэ Респуб­ликэм испорт еджа­пIэу N 2-м ипащэу, Урысыем, Адыгеим язаслуженнэ тренерэу Хъот Юныс къызэрэтиIуагъэу, Владимир щыкIогъэ зэнэкъокъум хэлэжьэгъэ бэнакIохэм гуетыныгъэ ахэлъэу зэIукIэгъухэм зафагъэ­хьазырыгъ. Адыгэ Республикэм изаслуженнэ тренерэу НэмытIэ­къо Аскэр япащэу яIэпэIэсэныгъэ хагъахъо.

Республикэм физкультурэмкIэ ыкIи спортымкIэ и Комитет, Адыгеим испорт еджапIэу N 2-м япащэхэм тиспортсменхэр, тренерхэр афэразэх. НэмытIэкъо Аскэр зэрэхигъэунэфыкIыгъэу, зэпахырэ узым къыхэкIэу зэхэщэн Iофыгъуабэ спортымкIэ пащэхэм агъэцэкIагъ.

Урысыем идышъэ медаль яблэнэрэу къэзыхьыгъэ Кристина Морозовам тренерхэр, кIэлэегъаджэхэр, спортым пылъхэр къыфэгушIуагъэх.

— Тиспортсменхэм ягъэхъагъэхэр Адыгэ Республикэм имэфэкI фагъэхьых, — къытиIуагъ Адыгеим изаслуженнэ тренерэу НэмытIэкъо Аскэр.