Хэгъэгум волейболымкIэ ихъулъфыгъэ командэ­хэм 2020 — 2021-рэ илъэс ешIэгъур рагъэжьагъ.

Мыекъопэ «Динамо-МГТУ-р» апшъэрэ купэу «Б-м» хэт. Апэрэ къекIокIыгъом хэхьэрэ ешIэгъу­хэу Воронеж щыкIуагъэхэм ахэлэ­жьагъ.

«Кристалл-Черкизов» Воронеж — «Динамо-МГТУ» Мыекъуапэ — 3:1; 3:1.

— ЗэIукIэгъуи 2 «Кристалл— Черкизовым» дытиIагъ, — къытиIуагъ «Динамо-МГТУ-м» итренер шъхьаIэу, Адыгэ Республикэм изаслуженнэ тренерэу Павел Зборовскэм. — ЕшIэгъуитIури 3:1-у Воронеж икомандэ тшIуихьыгъ.

ЗэIукIэгъухэм яедзыгъохэр гъэшIэгъонэу кIуагъэх. ТекIоныгъэр зыхьыщтыр къэпшIэн плъэ­кIынэу щытыгъэп. Пчъагъэр 25:23-у, 28:26-у, 25:22-у «Кристалл-Черкизовым» текIоныгъэр едзыгъохэм къащыдихыгъ.

Павел Зборовскэм зэрилъы­тэрэмкIэ, «Динамо-МГТУ-м» иешIакIохэм гуетыныгъэ къызыхагъэфагъ, яIэпэIэсэныгъэ хагъэ­хъонымкIэ зэгурыIохэу зэнэкъо­къум хэлэжьагъэх. ЗэIукIэгъухэр ушэтыпIэ афэхъугъэх.

ШэкIогъу мазэм и 17 — 21-м ятIонэрэ къекIокIыгъом хэхьэрэ ешIэгъухэр Мыекъуапэ щыкIощтых. Махачкала, Грознэм, Краснодар, Мыекъуапэ яволейбол командэхэр зэдешIэщтых.