Европэм ирекорд ыгъэуцугъ
Урысые Федерацием иныбжьыкIэхэм атлетикэ онтэгъумкIэ язэнэкъокъу къалэу Владимир гъэшIэгъонэу щыкIуагъ.
Адыгэ Республикэм ихэшыпыкIыгъэ командэ хэтхэм тагъэгушIуагъ. Кощхьаблэ щапIугъэ Бзэсэжъ Аслъан кг 67-рэ къэзыщэчыхэрэм якуп иIэпэIэсэныгъэ къыщигъэлъэгъуагъ.
Нарт шъаом тIоштэгъукIэ щылыч килограмм 266-рэ къыIэти, джэрзыр къыфагъэшъошагъ. Кощхьэблэ батырым иапэрэ тренерыр Сэнащэкъо Адам. СпортымкIэ дунэе класс зиIэ мастерэу, республикэм атлетикэ онтэгъумкIэ испорт еджапIэ итренерэу Сихъу Аслъан ипащэу А. Бзэсэжъым иухьазырыныгъэ хегъахъо.
Адыгэ къэралыгъо университетым физкультурэмрэ дзюдомрэкIэ и Институт Бзэсэжъ Аслъан щеджэ, джырэ уахътэ дзэм къулыкъур щехьы.
Тэхъутэмыкъое районым ипсэупIэу Инэм игурыт еджапIэу N 25-м щеджэрэ Артем Горловыр кг 73-м нэс къэзыщэчырэмэ янэкъокъугъ. ЗэIукIэгъум иапэрэ едзыгъо килограмми 133-рэ къыщиIэтыгъ. ЯтIонэрэ едзыгъоу «Толчок» зыфиIорэм кг 163-рэ А. Горловым къыщиIэтыгъ, зэнэкъокъум тыжьыныр къыщыфагъэшъошагъ.
Едзыгъо пэпчъ шъхьафэу батырхэр зэнэкъокъух. А. Горловым толчокым дышъэр къыщыдихыгъ.
— Илъэс 17 нахь тиспортсмен ыныбжьэп, — къытиIуагъ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. — Европэм ирекордэу агъэуцугъэм Артем Горловым килограмми 2 толчокым къыщыригъэхъугъ. Европэм ирекорд зэригъэуцугъэм фэшI батырэу Артем Горловым, ащ итренерэу Александр Горловым тафэгушIуагъ.
Бзэсэжъ Аслъанрэ Артем Горловымрэ Урысыем атлетикэ онтэгъумкIэ ихэшыпыкIыгъэ командэ хэтых, хэгъэгу ыкIи дунэе зэIукIэгъухэм зафагъэхьазыры. Урысыем ихэшыпыкIыгъэ командэ хэтэу Адыгеим зыщызыгъэсэрэ Родион Бочковыр зэнэкъокъум еплъыгъ, тибатырхэм Iэгу къафытеуагъ.
Сурэтым итхэр: Александр Горловыр, Артем Горловыр, Родион Бочковыр.