Хэгъэгум футболымкIэ иапшъэрэ куп щыкIорэ зэнэкъокъум хэлэжьэрэ командэхэм я 10-рэ ешIэгъухэр яIагъэх.

КIэуххэр зэтэгъапшэх

«Уфа» — «Ротор» — 0:0, «Урал» — ЦСКА — 0:2, «Тамбов» — «Арсенал» — 1:1, «Спартак» — «Зенит» — 1:1, «Шъачэ» — «Ростов» — 4:2, «Рубин» — «Ахмат» — 1:1, «Локомотив» — «Химки» — 2:1, «Динамо» — «Краснодар» — 2:0.

«Спартак» ыкIи «Зенит» язэдешIэгъоу Москва щыкIуагъэр нахь къахэтэгъэщы. Апэрэ та­къикъхэм «Спартак» къэлапчъэм Iэгуаор дидзэнэу амалхэр иIа­гъэх, ау ыгъэфедэнхэ ылъэкIыгъэп. «Зенит» хэпшIыкIэу нахь дэгъоу ешIагъэми, текIоныгъэр къыдихыным фэшI шIыкIэшIухэм икъоу алъыхъугъэп.

Дзюбэ къытыгъэ Iэгуаом Ерохиныр лъычъи, хъагъэм Iэ­гуаор дидзагъ. «Зенит» итренер шъхьа­Iэу С. Семак къызэриIуагъэу, я 65-рэ такъикъым пчъагъэр 1:0 хъугъэ. «Санкт-Петербург» иешIа­кIохэм пчъагъэм хагъэхъуагъэп. Я 86-рэ такъи­къым «Спартак» иешIакIоу Понсе хъагъэм Iэгуаор дидзагъ, 1:1-у зэнэкъокъур аухыгъ. Ижъырэ адыгэ къалэу Шъачэ икомандэ текIоныгъэр 2:1-у къы­хьызэ «Ростов» иешIакIоу Полоз хъагъэм Iэгуаор дидзагъ – 2:2, я 74-рэ такъикъыр кIощтыгъэ.

Антон Заболотнэм я 78-рэ такъикъым къэлапчъэм ыкIыб фэ­гъэзагъэу ешIапIэм тефэзэ хъагъэм Iэгуаор дидзагъ — 3:2 пчъагъэр хъугъэ. Я 83-рэ такъи­къым А. Заболотнэм къэлапчъэм Iэгуаор дидзи, текIоныгъэр «Шъа­чэм» къызэрэдихыщтымкIэ упчIэ щымыIэжьы хъугъэ.

Я 10-рэ ешIэгъухэр зэхэщакIо­хэм зэфахьысыжьыгъэх, А. За­бо­лотнэм зэкIэми анахь дахэу къэлапчъэм Iэгуаор дидзагъэу къыхахыгъ.

ЦСКА-м, «Локомотив» текIоныгъэр къызэрэдахыгъэм гъэшIэгъонышхо хэтлъагъорэп. «Краснодар» Москва зыщешIэм, 0:2-у «Динамэм» зэрэшIуихьыгъэм уигъэгумэкIынэу щыт. Ухъума­кIохэм зэгурыIоныгъэ ахэлъэп, апэкIэ елъыхэшъ, къызэкIэ­кIо­жьынхэу игъо ифэхэрэп.

«Краснодар» Европэм ичемпионхэм я Кубок фэбанэ. Грецием икомандэу «Паокым» тIогъогогъо текIуагъ шъхьае, тапэкIи тигъэгушIощтмэ тшIэрэп.

Хэт тыдэ щыIа?

1. «Зенит» — 21 2. «Спартак» — 21 3. ЦСКА – 19 4. «Шъачэ» — 19 5. «Локомотив» — 18 6. «Динамо» — 17 7. «Ростов» — 17 8. «Краснодар» — 15 9. «Рубин» — 15 10. «Ахмат» — 14 11. «Урал» — 10 12. «Арсенал» — 9 13. «Тамбов» — 8 14. «Химки» — 6 15. «Уфа» — 6 16. «Ротор» — 3.

Урысыем футболымкIэ ихэ­шыпыкIыгъэ командэ зичэзыу ешIэгъухэр иIэщтых. Хэгъэгум изэнэкъокъу хэлэжьэрэ командэхэм язэIукIэгъухэм зэпыугъо афэхъущт.

Я 11-рэ ешIэгъухэр

17.10 «Арсенал» — «Урал» «Зенит» — «Шъачэ» «Краснодар» — «Рубин» «Локомотив» — «Уфа» «Ростов» — «Ахмат» «Ротор» — «Тамбов» «Химки» — «Спартак» ЦСКА — «Динамо».

ШъунаIэ тешъудз: ешIэгъухэр зыщыIэщтхэ мафэхэр зэбла­хъунхэ алъэкIыщт.