Урысыем и Къыблэ дзюдомкIэ изэнэкъокъу Ермэлхьаблэ щы­кIуагъ. Илъэс I8-м нэс зыныбжь кIалэхэр, пшъашъэхэр алырэ­гъум щыбэнагъэх.

Адыгэ къэралыгъо университетым и Мые­къопэ къэралыгъо гуманитарнэ-техническэ колледж щеджэрэ ХьакIако Данэ, кг 52-рэ, апэрэ чIыпIэр къыдихыгъ. Пшъашъэр Хьащ­тыку къыщыхъугъ, иапэрэ тренерыр Шъхьэ­лэхъо Адам. Тренерэу Мерэм Саидэ ипащэу дзюдомкIэ иIэпэIэсэныгъэ хегъахъо, Мыекъуапэ щэпсэу.

Екатерина Соловьевам, кг 70-м къехъу, купэу зыхэтым дышъэр къыщихьыгъ. Тренерэу Нэныжъ Байзэт ипащэу Лъэустэн­хьаблэ зыщегъасэ.

ЛIыхъурэе Мурат, кг 46-рэ, Нэчэрэзые щыщ. БэнакIом ятIонэрэ чIыпIэр къыдихыгъ, тренерыр Гъомлэшк Алый. Кобл Рэмэзан, кг 50, тыжьыныр къыхьыгъ, тренерэу Джарымэкъо Рустам ипащэу Тэхъутэмыкъуае зыщегъасэ.

Эдуард Мирошниковым, кг 60, ящэнэрэ чIыпIэр къыдихыгъ. БэнакIор Мыекъуапэ щэпсэу, тренерыр Роман Оробцов.

Ордэн Батыр, кг 73-рэ, джэрзыр къыфагъэшъошагъ. Тренерэу Шъынэхъо Мурат ипащ, Шэуджэн районым щыщ. Ваган Григорян, кг 90-рэ, ящэнэрэ чIыпIэр къыдихыгъ, Мыекъуапэ щеджэ, тренерыр Роман Оробцов.

Мэлыщэ Аскэр, кг 90-м къехъу, джэрзыр къыдихыгъ. Батырыр Пэнэхэс щапIугъ, тренерыр Ацумыжъ Заур.

Мамхъо Астемир, кг 90-рэ, я 5-рэ чIыпIэр къыфагъэшъошагъ. Тренерэу ипащэр Ацумыжъ Заур. Пэнэхэс щыщ бэнакIом ме-далыр къыдимыхыгъэми, зэхэщакIохэм иIэпэIэсэныгъэ къыхагъэщыгъ, Барнаул кIощтхэм ащыщ.

Барнаул щыбэнэщтых

— Хэгъэгум иныбжьыкIэхэм дзюдомкIэ якIэух зэнэкъокъу 2020-рэ илъэсым, ты­гъэгъазэм и I6 — 2I-м Барнаул щыкIощт, — къытиIуагъ Адыгэ Республикэм дзю­домкIэ ихэшыпыкIыгъэ командэ итренер шъхьаIэу, республикэм дзюдомкIэ испорт еджапIэу Кобл Якъубэ ыцIэ зыхьырэм ­ипащэу Бастэ Сэлымэ. — ТибэнэкIуи 9 Барнаул щызэхащэщт зэIукIэгъум хэлэ-жьэщт. ТиныбжьыкIэмэ ясэнаущыгъэ къы­зэIуа­хызэ, спортым илъэгапIэхэм афэкIох. Ер­мэлхьаблэ щыбэнэгъэ кIалэхэм, пшъашъэхэм ягъэхъагъэ Адыгэ Республикэм имэфэкI мафэ фагъэхьы, ямедальхэм ахагъэхъон ямурад.

Сурэтым итхэр: Мерэм Саидэрэ ХьакIако Данэрэ.