Апэрэу зэхащагъ
Республикэм изэIухыгъэ зэнэкъокъу адыгэ лъэпкъ бэнакIэмкIэ спорт Унэшхоу «Ошъутенэм» щыкIуагъ.
Адыгэ Республикэм испорт еджапIэу N 2-р зэIукIэгъухэм кIэщакIо афэхъугъ. Адыгеим физкультурэмкIэ ыкIи спортымкIэ и Комитет, республикэ общественнэ движениеу «Адыгэ Хасэр» зэхэщэн Iофыгъохэм ахэлэжьагъэх.
Республикэ спорт еджапIэу N 2-м ипащэу, Урысыем, Адыгеим язаслуженнэ тренерэу Хъот Юныс, Адыгэ Хасэм итхьаматэу, самбэмкIи, дзюдомкIи СССР-м спортымкIэ имастерэу ЛIымыщэкъо Рэмэзан зэхэщэкIо купым ыцIэкIэ зэнэкъокъум хэлажьэхэрэм къафэгушIуагъэх, бэнэпIэ алырэгъум гъэхъагъэ щашIынэу афаIуагъ.
Лъэпкъ ансамблэу «Абрекхэр» зэнэкъокъур зыщырагъэжьэщт уахътэм тефэу пчэгум щыуджыгъ, адыгэ къашъохэр къышIыгъэх. Ансамблэм ихудожественнэ пащэу ТхьакIумэщэ Налбек зэхэщакIохэм «тхьауегъэпсэу» раIожьыгъ.
Лабинскэ щыпсэоу, спорт еджапIэм икъулыкъушIэу Нэгъой Рэмэзан, Къэрэщэе-Щэрджэсым самбэмкIи, дзюдомкIи тренерэу Iоф щызышIэрэ Байчорэ Пилял, командэ дэгъухэр Мыекъуапэ къащагъэх. Анапэ ибэнакIохэри зэнэкъокъум хэлэжьагъэх. Адыгеим дзюдомкIэ испорт еджапIэ зыщызыгъасэхэрэр, Тэхъутэмыкъое, Теуцожь районхэм, нэмыкIхэм яныбжьыкIэхэр алырэгъум щыбэнагъэх.
ТекIоныгъэм ия 75-рэ илъэс, Республикэм и Мафэ афэгъэхьыгъэ зэIукIэгъухэм апэрэ ыкIи ятIонэрэ чIыпIэхэр къащыдэзыхыгъэхэм шъуащытэгъэгъуазэ.
ЦIыкIу Рэмэзан, Мерэм Дамир, кг 60, Касаев Рэщыд, Алалэ Азэмат, кг 70-рэ, Ижаев Тимур, Хатхъохъу Байзэт, кг 80, Татаркъулэ Рэмэзан, Шъынэхъо Аслъан, кг 90-рэ, Акопян Вардкез, Гогуев СултIан, кг 90-м къехъух. БэнакIохэр алырэгъум къызытехьэхэкIэ пщынаом пщынэр ыгъэбзэрабзэзэ, адыгэ къашъор спортсменхэм къашIыщтыгъ.
ХагъэунэфыкIырэ чIыпIэхэр къыдэзыхыгъэхэм шIухьафтынхэр аратыжьыгъэх. Олимпиадэ джэгунхэм джэрзыр къащызыхьыгъэ Емыж Арамбый бэнакIохэм афэгушIуагъ, шIоу щыIэр къадэхъунэу афиIуагъ. ТекIоныгъэм икъыдэхын фэбанэзэ гуетныгъэ анахь ин къызыхэзыгъэфагъэу къахахыгъэр ЦIыкIу Рэмэзан. Адыгэ Хасэм ишIухьафтын ащ езытыжьыгъэр ЛIымыщэкъо Рэмэзан.
ЗекIо IофшIапIэу «Долина мые» зыфиIорэмрэ Мыекъуапэ иадминистрацие культурэмкIэ игъэIорышIапIэрэ яшIухьафтын бэнэгъухэм техникэ анахь дэгъу къащызыгъэлъэгъуагъэу къыхахыгъэ Тэтэркъулэ Рэмэзан фагъэшъошагъ.