Урысыем атлетикэ псынкIэмкIэ изэнэкъокъу Шъачэ щыкIуагъ. Командэхэр апэрэ чIыпIэхэм афэбэнагъэх.

Адыгэ Республикэм ихэшыпыкIыгъэ командэ хагъэунэфыкIырэ чIыпIэхэм ащыщ къыдихыгъэп. Арэу щытми, нэбгырэ зырызхэм тагъэгушIуагъ.

Виктория Алакян метрэ 3000-р къызечъым тыжьыныр къыдихыгъ. Олеся Буфаловам зэлъыпытэу гъогогъуи 3 къэлъэнымкIэ джэрзыр къыфагъэшъошагъ.

Апэрэу джэрзыр къыдахыгъ

Урысые Федерацием атлетикэ псынкIэмкIэ изэнэкъокъу Адлер щызэхащагъ. Командэхэр зэхэпхъэгъэ едзыгъохэм ахэлэжьагъэх.

«Многоборье» зыфиIорэм едзы­гъуи 7 хэхьэ. Метри 100-р, 200-р, 800-р къачъы, ядрор, пчыр адзы, къэлъэным гъогогъуи 2 яIэпэIэсэныгъэ къыщагъэлъагъо.

Адыгэ Республикэм ихэшыпыкIыгъэ командэ хэтхэу Елена Ермолинам, Евгения Пичуевам, Светлана Шевченкэм, Оксана Каширинам, Алина Спиринам едзыгъохэм IэпэIэсэныгъэ дэгъу къащагъэлъэгъуагъ, джэрзыр Урысыем изэнэ­къокъу къыщыдахыгъ. Елена Ер­мо­линам шъхьэзэкъо зэIукIэ­гъухэм тыжьыныр къащи­-хьыгъ.

— Хэгъэгум изэ­нэкъокъу апэрэу ящэ­нэрэ чIыпIэр къы­щы­дэтхыгъ, — къыти­Iуагъ Адыгэ Рес­публикэм атлетикэ псынкIэмкIэ испорт еджапIэ ипащэу Сергей Сухановым. — Спортышхом гъэ­хъагъэу щытшIы­гъэр Адыгэ Респуб­ликэм имэфэкI мафэ фэтэгъэ­хьы. Урысыем и Къэралыгъо Думэ идепутатэу Хьаса­нэ­къо Мурат Адлер джэрзыр къызэрэщытхьыгъэм фэшI телефонкIэ къытфытеуи къызэрэтфэ­гушIуа­гъэр лъэшэу гуа­пэ тщы­хъугъ.

Кемеровэ хэкум икомандэ апэрэ чIыпIэр Урысыем къыщыдихыгъ. Ростов хэкум тыжьыныр ыхьыгъ. Къырым я 4-рэ хъугъэ.

Адыгэ Республи­кэм фэгъэхьыгъ

Сергей Сухановым къытиIуагъ тиспортсменхэм загъэпсэфынэу уахътэ зэрямыIэр. Чъэпыогъум и 2 — 3-м Адыгэ Республикэм и Мафэ фэгъэхьыгъэ зэнэкъокъухэр Мые­къуапэ щыкIощтых. Респуб­ликэм испортсменхэм атлетикэ псынкIэм яIэпэIэсэныгъэ къыщагъэлъэгъощт.