Апшъэрэ купым хэт футбол командэхэу хэгъэгум щызэнэкъокъухэрэм я 9–рэ ешIэгъухэр яIагъэх.

ЕшIэгъухэр

«Тамбов» — «Спартак» — 0:2, «Арсенал» — «Ростов» — 2:3, «Ахмат» — «Урал» — 2:0, «Зенит» — «Уфа» — 6:0, «Ротор» — «Рубин» — 1:3, «Шъачэ» — «Краснодар» — 1:1. «Химки» — «Динамо» — 1:0, ЦСКА – «Локомотив» — 0:1.

«Зенит» текIоныгъэр къызэрэдихыгъэм дакIоу, дышъэм зэрэфэбанэрэр къыгъэлъэгъуагъ. Командэм икапитанэу Артем Дзюбэ гъогогъуи 3 хъагъэм Iэгуаор дидзагъ. Сардар Азмун къэлапчъэм Iэгуаор дахэу ди­дзагъ. Спортсмен цIэрыIо хъу­гъэу «Зенит» зэрэхэмыкIыжьырэр тигуапэ.

«Спартак» Саранскэ зыще­шIэм, «Тамбовым» 2:0-у текIуи, апэрэ чIыпIэхэм нахь защигъэпытагъ.

«Краснодар» Шъачэ икомандэ текIон ылъэкIыщтыгъэ, ау инасып къыхьыгъэп. Шъачэ дэт стадионэу «Фыщтым» иешIапIэ изытет уигъэрэзэнэу щытэп. Апшъэрэ купым хэт командэхэм яешIапIэхэр зэбгъапшэмэ, «Фыщтым» иешIапIэ анахь дэеу зэрэщытыр гухэкI.

«Рубин» итренер шъхьаIэу Леонид Слуцкэм къыIуагъ пэщэныгъэ зыдызэрихьэрэ командэр зэнэкъокъум щылъыкIотэн зэрилъэкIыщтыр. «Ротор» ауж къызэринэрэм уигъэгумэкIынэу щыт. Хэкум футболыр шIу ща­лъэгъу, ау командэу яIэр апшъэ­рэ купым къыхэзынымкIэ чIыпIэу зэрытыр щынагъо.

ЦСКА-р «Локомотивым» дэ­гъоу дешIагъ, ау хъагъэм Iэгуаор дидзэн ылъэкIыгъэп. Антон Миранчук дахэу къытыгъэ Iэгуаом лъыбани, Федор Смоловым къэ­лапчъэм дахэу дидзагъ.

«Химки» апэрэ текIоныгъэр зэнэкъокъум къыщыдихыгъ. «Динамэм» ешIэгъур зэрэшIуахьы­гъэм къыхэкIэу тренер шъхьаIэу К. Но­виковыр иIэнатIэ IукIы­жьыгъ.

Хэт тыдэ щыIа?

1. «Зенит» — 20 2. «Спартак» — 20 3. «Ростов» — 17 4. ЦСКА – 16 5. «Шъачэ» — 16 6. «Локомотив» — 15 7. «Краснодар» — 15 8. «Рубин» — 14 9. «Динамо» — 14 10. «Ахмат» — 13 11. «Урал» — 10 12. «Арсенал» — 8 13. «Тамбов» — 7 14. «Химки» — 6 15. «Уфа» — 5 16. «Ротор» — 2.

Я 10-рэ зэIукIэ­гъухэр

03.10 «Динамо» — «Краснодар» «Локомотив» — «Химки» «Рубин» — «Ахмат» «Шъачэ» — «Ростов» «Спартак» — «Зенит» «Тамбов» — «Арсенал» «Урал» — ЦСКА «Уфа» — «Ротор».

Апэ итхэу «Спартак» ыкIи «Зенит» зэдешIэщтых. Ауж къи­нэ­хэрэ «Уфа» ыкIи «Ротор» зэнэкъокъущтых. «Шъачэрэ» «Рос­товрэ» зыдэщыт чIыпIэхэр зэпэчыжьэхэп. «Краснодар» Iоныгъом и 30-м Грецием щешIэщт, ащ ыуж «Динамэм» IукIэщт. ЕшIэгъухэр гъэшIэгъон хъущтых, тигуапэу талъыплъэщт. Ащ фэдэ зэнэкъо­къухэм футболыр къагъэдахэ.