ТхэкIо цIэрыIоу Еутых Аскэр Къадырбэч ыкъор къызыхъугъэр илъэси 105-рэ хъугъэ
Гупшысэ дунаим щыбысымыгъ
Адыгэ литературэм хэхъоныгъэ ышIынымкIэ анахь зишIуагъэ къэкIуагъэр тхакIохэм яадыгэ организацие щыIэ зэрэхъугъэр ары. Адыгэ тхакIохэм я Апэрэ зэфэс зыфагъэхьазырызэ, тхыгъакIэхэр ашIыщтыгъэ, кIочIакIэхэр литературэм къыхэщэгъэным дэлажьэщтыгъэх.
ЕджапIэхэм ащеджэхэу, е еджэныр къаухыгъакIэу сэнаущыгъэ зыхэлъ ныбжьыкIэхэри, тхыдэIотэ, IорIотэкIо нахьыжъхэри литературнэ-творческэ IофшIэным апэрэ мафэхэм къащегъэжьагъэу чанэу хэлажьэщтыгъэх, адыгэ тхакIохэм- рэ усакIохэмрэ я Апэрэ зэфэс гъэхъэгъэ гъэнэфагъэхэр яIэу къекIолIагъэх. Зэфэсыр 1936-рэ илъэсым тыгъэгъазэм и 11-м щегъэжьагъэу и 14-м нэс кIуагъэ, адыгэ литературэм игъэхъагъэхэмрэ щыкIагъэу фэхъухэрэмрэ щыхагъэунэфыкIыгъэх, зэшIохыгъэн фэе творческэ пшъэрылъхэр рахъухьагъэх. Мы уахътэм апэрэ творческэ лъэбэкъу пытэхэр зышIыгъэхэм ащыщыгъ Еутых Аскэр. ЩыIэкIакIэм игъэпсын, цIыфыкIэм ипIун-лэжьын хэлэжьэрэ кIочIэ лъэшэу адыгэ литературэр хъугъэ. ШIэныгъэ-гъэсэныгъэрэ гулъытэ-гупшысэрэ пIэкIэмылъэу литературэм ущылэжьэн плъэкIыщтыгъэп, ар къагурыIоу, тхэн-гупшысэныр сэнэхьат зыфэзышIыгъэхэм яшъыпкъэ щыIэныгъэм рахьылIэщтыгъ.
Еутых Аскэр Къадырбэч ыкъор Красногвардейскэ районым ит къуаджэу Хьатикъуае Iоныгъом и 25-м 1915-рэ илъэсым къыщыхъугъ.
Аскэр 1928-рэ илъэсым Адыгэ педтехникумым чIахьи, 1931-рэ илъэсым къыухыгъ. 1931 — 1935-рэ илъэсхэм Краснодар кIэлэегъэджэ институтым щеджагъ. Хэку гъэзетэу «Колхоз быракъым» иредакцие илъэситIо Iоф щишIагъ, 1936 — 1938-рэ илъэсхэм Адыгэ научнэ-ушэтын институтым щылэжьагъ. 1939 — 1941-рэ илъэсхэм театрэ искусствэхэмкIэ Къэралыгъо институтэу А. В. Луначарскэм ыцIэ зыхьырэм иадыгэ студие икIэлэегъэджэ-упчIэжьэгъугъ.
Еутых Аскэр ытхыхэрэр 1934-рэ илъэсым къыщегъэжьагъэу хиутыщтыгъэх. Еутыхым усэхэм ямызакъоу литературнэ-критическэ статьяхэр 1934 — 1938-рэ илъэсхэм хэку гъэзетэу «Колхоз быракъым» къыщыхеутых. 1938-рэ илъэсым «Адыгэ литературэмкIэ хрестоматие» ыIоу къыдигъэкIыгъэм адыгэ тхакIохэм атхыгъэхэу программэмкIэ еджапIэм щызэрагъэшIэн фаехэм ямызакъоу, а уахътэм ехъулIэу адыгэ литературэ ныбжьыкIэм хэхъоныгъэ гъогоу къыкIугъэр, тхакIохэм ятворчествэкIэ зэхэфыныр дэтыгъэх.
Еутых Аскэр ежь ихудожественнэ тхылъхэр 1939-рэ илъэсым къыдэкIхэу рагъэжьагъ: иусэ тхылъэу «Тимафэхэр», рассказхэр зыдэтэу «КIочIэшху», зы акт хъурэ пьесэу «Анахь чаныр» (зэкIэри а зы илъэсым, 1939), усэхэмрэ поэмэхэмрэ зыдэтэу «ТхыдакI» (1940), лирическэ повестэу «Сшынахьыжъ» (1941) зыфиIохэрэр къыдигъэкIыгъэх.
Адыгэ литературэм лъэбэкъу теубытагъэхэр ыдзыщтыгъэх, тхакIо пэпчъи ишъыпкъагъ. Ау Хэгъэгу зэошхор къежьи, адыгэ литературэм утын инхэр къырихыгъэх, чIэнэгъэшхохэр ригъэшIыгъэх, анахь гугъапIэ къэзытыщтыгъэхэу Андырхъое Хъусен, Уджыхъу Адылджэрый, Уджыхъу Хьамид, нэмыкIхэри заом хэкIодагъэх.
Хэгъэгу зэошхом Аскэр хэлэжьагъ, «Орден Отечественной войны II степени» зыфиIорэр ыкIи медальхэр къыфагъэшъошагъэх.
Еутых Аскэр зэо илъэсхэм Хы Флотым дзэ къулыкъур щихьыгъ, дзэ корреспондентэу гъэзетэу «Красный черноморец» зыфиIорэм щылэжьагъ. Ынэ кIэкIыгъэу, къинэу зыхэтыгъэр лъапсэ фэхъугъ гъэзет тхыгъабэу а уахътэм къыхиутыгъэм: «На строительство танков», «Возвращение в строй», «Клятва летчиков», «Суровый человек», нэмыкIхэри.
1945 — 1946-рэ илъэсхэм Адыгэ научнэ-ушэтын институтым иIофышIагъ. Зэоуж илъэсхэм адыгабзэкIи урысыбзэкIи тхылъхэр Еутых Аскэр къыдигъэкIыгъэх. АдыгабзэкIэ усэхэмрэ поэмэхэмрэ дэтэу «Насып», повестэу «IэнэтIэ дэгъу», «Тыгъэр ташъхьагъ», усэхэр, поэмэхэр дэтэу «ТищыIакI», рассказхэмрэ повестхэмрэ дэтэу «Зы бзылъфыгъэ итхыд», «ЦIыфым илъэуж». Мыхэр зэкI пIоми хъунэу урысыбзэкIэ къыдэкIыгъэх: сборникэу «Счастье», новеллэхэр зыдэт тхылъэу «Священная река (рассказы о прошлом)», усэхэр, поэмэхэр дэтэу «Наша жизнь», повестэу «Девушка из аула», романхэу «Улица во всю ее длину», «Двери открыты настежь», «Глоток родниковой воды», «Баржа» Москва илъэс зэфэшъхьафхэм къыщыдэкIыгъэх. Аскэр зыщымыIэжь ужым повеститIу зыдэт тхылъэу «Разрыв сердца» зыфиIорэр Москва къыщыхаутыгъ.
Аскэр куоу гупшысэу, чыжьэу плъэу, щыIэкIэ-псэукIэм хэлъыр рилъэгъукIэу, къыупкIэпкIэу тхэкIо иныгъ. Ишъыпкъэ сыдигъуи пытэу еубытылIэгъагъ, идунэееплъыкIэ зыгорэм хэкIокIэнэу щымытэу, гум зэхишIэрэр ипроизведениехэм къащыриIотыкIыныр фызэшIокIыгъ. ЦIыфыр ары дунаир зыгъэдунаирэр. Ар кIигъэтхъызэ тхэкIошхом повестэу «IэнэтIэ дэгъу» зыфиIорэм уцIыфыныр насыпыгъэу, шъхьафитныгъэ тхъагъоу зэрэщытыр къыщыриIотыкIыгъ. ЦIыфыр зыузэнкIэу, зыгъэлъэшэу, зыгъэгушхоу зыIэтырэр Iофыр арэу зэрэщытыр адыгэ пшъэшъэ чанэу Асыет ышъхьэ къырыкIуагъэмкIэ тхакIом тигъэшIагъ. Повестыр Iушыгъэр зишэн цIыф зэфэшъхьафхэм яобразхэмкIэ тхакIом ыгъэбаигъ: узэдыщыIэным, узэгурыIоным, узэдэлэжьэным хэтрэ цIыфкIи мэхьанэшхо зэриIэр, гур факIоу, Iэр екIоу пшIэрэ Iофым гушIуагъуи, рызыкъи, насыпи зэрэхэбгъуатэрэр повестым гупшысэ инэу пхырыщыгъ.
Еутых Аскэр ипрозэ гъэжъыугъэ-телъэшъуагъэп, щыIэныгъэм хэлъыр: дэгъуи, дэи, хъурэ-шIэрэм къешIэкIыгъэу икъоу, нафэу къыщыIотагъ. Литературэр щыIэныгъэм игъунджэмэ, щыIэныгъэм хабзэу хэлъыри, цIыфхэу ар зыгъэпсыхэрэми ягъэпсыкIэ удихьыхэу, узIэпищэу, тхэныр, гупшысэныр фызэшIокIыщтыгъ дэгъу дэдэу А. Еутыхым.
«ЦIыфым илъэуж» зыфиIорэ повестми гупшысэшхо хэлъ. Псэ зыпыт пстэоу Тхьэм къыгъэхъугъэхэм цIыфыр иакъылкIи, ишэнкIи, ыбзэкIи зэратекIорэр нафэ. Ау ежь цIыфхэри зэфэдэхэп, зэтекIых. Пстэуми анахь шъхьаIэр пшъхьэ сыдигъуи уфэсакъыжьыныр, ощ фэдэм лъэбгъу емыдзыныр, узэфэныр, шъыпкъэм тетэу упсэуныр ары. Джащыгъум хэти илъэуж къэбзэщт, дэхэщт, шъыпкъэщт. Аскэр иусэхэр, поэмэхэр пштагъэми, иповестхэм уяджэми, анахь къахэщырэр шIур зэрэбгъотыщтыр, ащ узэрэфэкIощтыр ары.
Еутых Аскэр иусэ сатырхэри, ипрозэ тхылъхэри гупшысэ закIэх, ушъагъэх. Дэгъур зыгъэдэгъурэри, дэир зымыгъэхъурэри занкIэу къащегъэлъагъо, сурэтышI IэпэIасэм фэдэу, дэир зыхэмыгъэзэу тынчэу упсэун зэрэмылъэкIыщтыр къащиIуагъ. Лъакъом хэогъэ мастэм гупсэфыгъо къызэрэуимытырэм фэдэба шэныжъхэр, ахэр сыд ишIыкIэми зэрэзыхэбгъэзыщтым уигъэгумэкIэу уемышъхьарыкIомэ, цIыфыгъэ гъогум удэхыщтэп, угъощэщтэп къытаIорэм фэд Аскэр ипроизведениехэм.
Еутых Аскэр илъэс 84-м итэу идунай ыхъожьыгъ, лIэшIэгъуныкъом адыгэ литературэр, лъэпкъ гупшысэр ылэжьыгъ, ыгъэбаигъ.
IофшIэкIошхуагъ. Жанрэ пстэумкIэ гъэзагъэу лэжьагъэ: усэхэр, поэмэхэр, рассказхэр, новеллэхэр, повестхэр, романхэр, пьесэхэр, зэдзэкIыныр, ахэм акIыIужьэу, зэхэфын-зэфэхьысыжь гупшысэхэр нэмыкI авторхэм япроизведениехэмкIэ ышIынхэр фызэшIокIыщтыгъ Аскэр. Я 30 — 50-рэ илъэсхэм адыгэ литературнэ критикэм ихьасэ мыпшъыжьэу щылэжьагъ.
ТхакIом ипьесэхэу «Ася», «Бзылъфыгъэ цIыкIу», «Зэпытхъыгъэ пшъэхъухэр» зыфиIохэрэр Адыгэ къэралыгъо драмтеатрэм исценэ щагъэуцугъэх.
М. Ю. Лермонтовым иусэхэр, Н. А. Некрасовым ипоэмэу «Кому на Руси жить хорошо» зыфиIорэр (Пэрэныкъо Мурат игъусэу) адыгабзэкIэ зэридзэкIыгъэх. Еутыхым ытхыгъэмэ ащыщхэр чехыбзэкIэ, словакыбзэкIэ, украинабзэкIэ зэрадзэкIыгъэх.
ТхакIор гупшысэ дунаим ибысымыгъ. Еутых Аскэр Адыгэ Республикэм инароднэ тхакIу. Игушъхьэлэжьыгъэ бай мыкIодыжьыщт гупшысэ-орэдэу цIыфхэм къафигъэнагъ, щыIагъэмэ, къызыхъугъэр илъэси 105-рэ хъущтыгъэ, ар сыдигъуи лъэпкъ шIэжьым ыцIэ хэтыщт.
Мамырыкъо Нуриет.