Адыгеим икъушъхьэхэр дахэх
Адыгеим икъушъхьэхэм афэгъэхьыгъэ къэгъэлъэгъонэу республикэм щыкIуагъэм Къыблэ шъолъырым, Темыр Кавказым, Москва ясурэтышIхэр хэлэжьагъэх.
Республикэм культурэмкIэ и Министерствэ, Адыгеим культурэмкIэ и Министерствэ исурэт къэгъэлъэгъуапIэ Iофтхьабзэр зэхащагъ.
Адыгэ Республикэм икъэралыгъо программэу культурэм хэхъоныгъэхэр ышIынхэм къыхиубытэрэ Iофыгъохэр щыIэныгъэм щыпхыращых. Адыгеим икъушъхьэхэм яхьылIэгъэ къэгъэлъэгъоныр Адыгеим икъэралыгъо гъэпсыкIэ илъэси 100 зэрэхъурэм фэгъэхьыгъ.
Сурэтым икъежьапI
Тыкъызэуцухьэрэ дунаим идэхагъэ тхакIохэм сыд фэдизырэ къыраIотыкIыгъэми, ягупшысэхэр жъы хъухэрэп. СурэтышIхэр тхакIохэм янэкъокъухэу къатIорэп, ау яIофшIагъэ уеплъы зыхъукIэ, зэгъэпшэнхэр пшIыхэ пшIоигъоу ухэщэтыкIы.
Мыекъопэ районым ит къушъхьэхэм яплъыхэзэ, сурэтхэр ашIыгъэх. Гъозэрыплъэ, Лэгъо-Накъэ, зекIо-зыгъэпсэфыпIэу «Ошъутенэм», нэмыкIхэм сурэтышIхэр ащыIагъэх. «Пленэр» зыфиIорэ шIыкIэм тетэу тыкъэзыуцухьэрэ дунаим щыщ чIыпIэхэр сурэтышIхэм яIэпэIэсэныгъэкIэ къагъэлъэгъуагъэх.
Зэхахьэр
Сурэт къэгъэлъэгъуапIэу Мыекъуапэ дэтым щыкIогъэ зэхахьэр Адыгэ Республикэм исурэтышIхэм я Союз итхьаматэу Елена Абакумовам пэублэ гущыIэкIэ къызэIуихыгъ. Краснодар краим, Къэрэщэе-Щэрджэсым, Адыгеим, нэмыкIхэм ясурэтышIхэр Мыекъопэ районым щыкIогъэ Iофтхьабзэм чанэу зэрэхэлэжьагъэхэр, ягуетныгъэкIэ щысэшIу къызэрагъэлъэгъуагъэр Е. Абакумовам къыIуагъ, къэгъэлъэгъоным изэхэщакIохэм зэрафэразэр къыхигъэщыгъ.
Адыгэ Республикэм культурэмкIэ иминистрэ игуадзэу, Урысыем, Адыгеим, Ингушетием культурэмкIэ язаслуженнэ IофышIэу ШъэуапцIэкъо Аминэт зэхахьэм къыщиIуагъ къэгъэлъэгъоным лIэужхэр зэрэзэфищэхэрэр.
— СурэтышIхэм нэкIубгъохэр кIэу искусствэм къыщызэIуахых, яIэпэIэсэныгъэ тегъэгушIо, — хигъэунэфыкIыгъ А. ШъэуапцIэкъом.
СурэтышIхэм яIофшIэнэу Мыекъопэ районым щыкIуагъэм пэщэныгъэ дызэрихьагъ Адыгэ Республикэм культурэмкIэ и Министерствэ иотдел ипащэу, Адыгеим культурэмкIэ изаслуженнэ IофышIэу Шэуджэн Бэлэ.
— Сурэт дахэхэр шъушIыгъэх, щыIэныгъэр зэрэшъулъэгъурэ шIыкIэр искусствэм къыщыжъугъэлъэгъуагъ. Шъолъырхэм къарыкIыгъэхэм тафэраз. Ядэжьхэм агъэзэжьмэ, Адыгеим щалъэгъугъэр искусствэр зышIогъэшIэгъонхэм, яныбджэгъухэм къафаIотэжьы тшIоигъу, — къыIуагъ Шэуджэн Бэлэ.
Сурэт къэгъэлъэгъуапIэм ипащэу, культурэм щыцIэрыIоу Бырсыр Абдулахь псэ зыпыт зэIукIэгъухэм мэхьэнэ ин аритыгъ. СурэтышIхэм яшIэныгъэ хагъэхъонымкIэ къэгъэлъэгъоныр зыгъэсапIэ афэхъугъэу ылъытагъ.
СурэтышIхэу Дугъ Айтэч, Шыко Лейлэ, Сергей Шульгиныр, нэмыкIхэри зэхахьэм къыщыгущыIагъэх.
— Адыгеим икъушъхьэхэр дахэх, сурэтхэри дахэ хъугъэх, культурэмкIэ Министерствэм «тхьашъуегъэпсэу» есIожьы сшIоигъу, — игупшысэхэм тащигъэгъозагъ Къэрэщэе-Щэрджэсым къикIыгъэ пшъашъэу Шыко Лейлэ. — Тыкъырагъэблагъэмэ, сигуапэу джыри Адыгеим сыкъэкIощт.
АшIогъэшIэгъон
ЗэлъашIэрэ археологэу Тэу Аслъан, Дунэе Адыгэ Хасэм хэтэу МэщфэшIу Нэдждэт, сурэтышI цIэрыIохэу Эдуард Овчаренкэм, Хъуажъ Рэмэзан, нэмыкIхэм къэгъэлъэгъоныр ашIогъэшIэгъонэу къэбархэр къаIотагъэх. СурэтышIхэм шъо зэфэшъхьафхэр зэрагъэфедэхэрэм Э. Овчаренкэр лъыплъагъ. Хъуажъ Рэмэзан анахьэу къыхигъэщыгъэр къушъхьэхэм жьыр къащэзэ, псэ зыпыт чъыгхэм ятеплъэ сурэтышIхэм IупкIэу къагъэлъэгъон зэралъэкIыгъэр ары.
Къушъхьэм удэкIоеным фэшI ныбджэгъу шъыпкъэхэр уигъусэнхэ зэрэфаери сурэтышIхэм язэфэхьысыжьхэм къащыхагъэщыгъ.
Адыгэ Республикэм искусствэхэмкIэ иколледж иеджакIо- хэр ашIогъэшIэгъонэу къэгъэлъэгъоным еплъыгъэх, сурэтышIхэм гущыIэгъу афэхъугъэх.
Тикъушъхьэхэм ятеплъэ, щыIэныгъэм чIыпIэу щыряIэм афэгъэхьыгъэ сурэтхэр лъэгъупхъэх, тарихъым шIукIэ къыхэнэжьыщтых. Ащ фэдэ Iофтхьабзэхэр зэхэщакIохэм лъагъэкIотэнхэу афэтэIо.
ЕмтIылъ Нурбый. Сурэтхэр зэхахьэм къыщытетхыгъэх.