Шъолъырхэр зэфэзыщэгъэ зэхахь
Ленинград хэкум и Къэралыгъо симфоническэ оркестрэ ипчыхьэзэхахьэ Адыгэ Республикэм и Къэралыгъо филармоние щыкIуагъ.
Лъэпкъхэр зэфэзыщэрэ искусствэр зышIогъэшIэгъонхэр зэхахьэм щызэIукIагъэх. Адыгэ къэралыгъо университетым искусствэхэмкIэ и Институт, Адыгэ Республикэм искусствэхэмкIэ иколледж ащеджэхэрэр, кIэлэегъаджэхэр, Мыекъуапэ искусствэхэмкIэ икIэлэцIыкIу еджапIэхэм яIофышIэхэр, культурэм икъулыкъушIэхэр пчыхьэзэхахьэм щытлъэгъугъэх. Искусствэм гукIэ хэщагъэхэри бэ хъухэу концертым къэкIуагъэх.Тызэфэзэщыгъ
Пчыхьэзэхахьэм изэхэщакIохэм къызэрэтаIуагъэу, артистхэмрэ искусствэм пыщагъэхэмрэ зэфащагъэх. Зэпахырэ узым къыхэкIэу симфоническэ оркестрэм иконцертхэр зэпигъэугъагъэх.
Адыгэ Республикэм и Къэралыгъо филармоние ипащэу, Урысыем изаслуженнэ артистэу, Адыгэ Республикэм инароднэ артистэу Къулэ Мыхьамэт тызэрэщигъэгъозагъэу, зэлъыIэсыкIэ амалхэр тапэкIи агъэфедэщтых.
— Ленинград хэкумрэ Адыгэ Республикэмрэ творчествэм ехьылIэгъэ пчыхьэзэхахьэхэмкIэ зэхъожьыщтых, — къытиIуагъ Къулэ Мыхьамэт. — Адыгеим, Къэбэртэе-Бэлъкъарым, Къэрэщэе-Щэрджэсым якомпозиторхэм, Кавказым щыпсэурэ нэмыкI лъэпкъхэм ащыщхэм аусыгъэхэр Ленинград хэкум и Къэралыгъо симфоническэ оркестрэ къырегъаIох. Искусствэм тызэрэзэфищэрэм тыкъыпкъырыкIызэ, Адыгеим итворческэ купхэм шIэжьым ехьылIэгъэ концертхэр зэхащэнхэм Iоф дэтшIэщт.
Хэгъэгу зэошхом илъэхъан Ленинград икъэухъумэн Адыгеим щапIугъэ дзэкIолIхэр хэлэжьагъэх, лIыхъужъныгъэ зэрахьагъ. Заом ыуж мамыр псэукIэм игъогу зытехьажьхэм Адыгеим щыщ ныбжьыкIабэ Ленинград щеджагъ.
Анзэрэкъо Чеслав, Сэмэгу Гощнагъо, Шъэожъ Розэ, Хэшх Казбек, фэшъхьафхэри артист цIэрыIо хъугъэх. Лъэпкъ театрэу Цэй Ибрахьимэ ыцIэ зыхьырэм иартистхэу Зыхьэ Заурбый, Зыхьэ Мэлайчэт, Кукэнэ Мурат, Уджыхъу Марыет, Кушъу Светланэ, нэмыкIхэри искусствэм щызэлъашIагъэх.
Республикэ филармонием щыкIогъэ концертыр зезыщэгъэ артистэу Дмитрий Лаутало изэфэхьысыжьхэм ащыхигъэунэфыкIыгъ Кавказым илъэпкъхэмрэ Ленинград хэкум щыщхэмрэ зэрэзэлъыкIохэрэм шIуагъэу къытырэр щыIэныгъэм къызэрэщылъагъорэр.
Концертыр
Ленинград хэкум и Къэралыгъо симфоническэ оркестрэ ихудожественнэ пащэу ыкIи идирижер шъхьаIэу, Къэбэртэе-Бэлъкъарым инароднэ артистэу Михаил Голиковым артист нэшанэу хэлъхэм пчыхьэзэхахьэр къагъэбаигъ.
Дирижерыр оркестрэм хэтхэм инэплъэгъукIэ агурэIо. Музыкантхэм ар афэнэгушIу. Классикэм хэхьэгъэ произведениехэр зэхахьэм щызэхэтхыгъэх. Къэбэртэе-Бэлъкъарым икомпозиторэу, Урысыем, Адыгеим искусствэхэмкIэ язаслуженнэ IофышIэшхоу, тиреспубликэ иныбджэгъушIоу ХьаIупэ Джэбраилэ, Къэбэртэе-Бэлъкъарым инароднэ артистэу, композиторэу Къэбэрдэкъо Мурат, нэмыкIхэм аусыгъэхэр симфоническэ оркестрэм къырегъаIох.
«Адыгэ удж», «Къэбэртэе къашъу» зыфиIохэрэр оркестрэм ыгъэжъынчыгъэх. ЗэлъашIэрэ композиторэу Арам Хачатурян зэригъэфэгъэ мэкъамэу дунаим щашIэрэ «Лезгинкэр» оркестрэм къызыхедзэм, залым чIэсхэр Iэгу лъэшэу теуагъэх.
Орэдыр игъус
Къэбэртэе-Бэлъкъарым изаслуженнэ артистэу Бэрбэч Аскэр адыгабзэкIи, нэмыкIыбзэхэмкIи къыIогъэ орэдхэр гум екIух. Ным ехьылIагъэр тиныдэлъфыбзэкIэ зэхытигъэхыгъ. Орэдыр тынчэу, огум ит жъуагъом тыдигъэгущыIэрэм фэдэу къыIуагъ. Филармонием къыщедэIухэрэм къахахьэзэ, адэуджызэ, Бэрбэч Аскэр искусствэм нахь куоу тыхищагъэу тлъытагъэ.
ЩыIэныгъэмрэ цIыфым игъашIэрэ яхьылIэгъэ орэдыри гум къегущыIыкIы. Артистым шIукIэ фэтлъэгъурэр оркестрэмрэ залым чIэсхэмрэ искусствэм ыбзэкIэ зэфищэнхэ, зэдигъэгущыIэнхэ зэрилъэкIыгъэр ары.
Композиторэу Къэбэрдэкъо Мурат Адыгэ Республикэм шIукIэ щашIэ, иконцертхэр Мыекъуапэ щыкIуагъэх. М. Къэбэрдэкъор оркестрэм хэтэу фортепианэмкIэ произведениехэр къыригъэIуагъэх.
Бэрбэч Аскэри, Къэбэрдэкъо Мурати хэгъэгу, дунэе зэнэкъокъухэм щытхъуцIэхэр къащыдахыгъэх. Лъэпкъ гупшысэр искусствэм щыпхыращы.
Зэфэхьысыжьхэр
СыхьатитIур псынкIэу кIуагъэу къытщыхъугъ, концертри къаухыгъ. Къэбэрдэкъо Мурат пчэгум къихьи, концертым изэхэщэнкIэ IэпыIэгъу къафэхъугъэхэм «Тхьашъуегъэпсэу» къариIожьыгъ. Адыгэ Республикэм культурэмкIэ иминистрэу Аулъэ Юрэ, республикэм и Къэралыгъо филармоние ипащэу Къулэ Мыхьамэт зэрафэразэр хэушъхьафыкIыгъэу къыIуагъ.
Оркестрэм идирижер шъхьаIэу Михаил Голиковыр къытфэнэгушIоу къытэплъи, искусствэм хэшIыкI фызиIэхэр гукIи, псэкIи къызэрядэIугъэхэм зэригъэгушхуагъэр иеплъыкIэхэм къахигъэщыгъ.
Ныбджэгъу зэIукIэгъухэр
Концертыр къызаухым артистхэмрэ залым чIэсыгъэхэмрэ гущыIэгъу зэфэхъугъэх, зэхэтхэу нэпэеплъ сурэтхэр атырахыгъэх. Адыгэ Республикэм инароднэ артисткэу Нэгъой Маринэ, филармонием иоркестрэ идирижерэу СтIашъу Къэплъан, фортепианэм къезыгъэIорэ Набэкъо Бэллэ, нэмыкIхэу хьакIэхэм гущыIэгъу афэхъугъэхэм концертыр лъэшэу агу зэрэрихьыгъэр къытаIуагъ.
ЕмтIылъ Нурбый.
Сурэтыр зэхахьэм къыщытетхыгъ.