ЛIышъхьэм ишIухьафтынхэм афэбэнэщтых
Адыгэ Республикэм и ЛIышъхьэ ишIухьафтынхэм якъыдэхын афэгъэхьыгъэ зэIукIэгъухэр Iоныгъом и 27-м Мыекъуапэ щыкIощтых.
Республикэм физкультурэмкIэ ыкIи спортымкIэ и Комитет кIэщакIо зыфэхъугъэ зэнэкъокъоу «Локодзюдо» зыфиIорэм 2007 — 2008-рэ ыкIи 2009 — 2010-рэ илъэсхэм къэхъугъэ кIэлэцIыкIухэр хэлэжьэщтых.
— ДзюдомкIэ бэнэрэ кIэлэцIыкIухэм кIуачIэр апсыхьанымкIэ, яIэпэIэсэныгъэ хагъэхъонымкIэ, псауныгъэр агъэпытэнымкIэ зэнэкъокъум мэхьэнэ ин иI, — къытиIуагъ Адыгэ Республикэм физкультурэмкIэ ыкIи спортымкIэ и Комитет икъулыкъушIэу Елена Ткаченкэм. — КIэлэцIыкIу командэхэр зэнэкъокъущтых, республикэм идзюдо ехьылIэгъэ къэбархэр къафаIотэщтых, спортым иветеранхэм, тренерхэм аIуагъэкIэщтых.
Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ибэнапIэу Олимпиадэ джэгунхэм дышъэр къащызыхьыгъэ Владимир Невзоровым ыцIэ зыхьырэм кIэлэцIыкIухэм язэнэкъокъу щызэхащэщт.
— БэнэпIэ алырэгъур зэтегъэпсыхьагъ, кIэлэцIыкIухэм язэнэкъокъоу «Локодзюдом» тыфэхьазыр, — къеIуатэ республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгэ Республикэм дзюдомкIэ ихэшыпыкIыгъэ командэ итренер шъхьаIэу Бастэ Сэлымэ. — КIэлэцIыкIухэр спортышхом хэщэгъэнхэмкIэ, пIуныгъэ дэгъу ятыгъэнымкIэ ащ фэдэ зэIукIэгъухэр лъэшэу тищыкIагъэх.