«Астраханочка-2» Астрахань — «АГУ-Адыиф-2» Мыекъуапэ — 32:26 (16:14). Iоныгъом и 19-м Астрахань щызэдешIагъэх.

«Адыиф-2-м» къыхэщыгъэхэр: Кожубекова — 8, Куцевалова — 6, Казанджан — 3, Провоторова — 2, Кобж — 2, Логвиненко — 2. «Астраханочка-2-р» ятIонэрэ едзыгъом нахь дэгъоу щешIагъ, текIоныгъэм икъыдэхын фэхьазырыгъ.

ЯтIонэрэ зэIукIэгъур

«Астраханочка-2» — «АГУ- Адыиф-2» — 31:27 (16:12). Iоныгъом и 20-м Астрахань щызэдешIагъэх.

«Адыиф-2»: Куцевалова — 12, Морозова — 6, Кожубекова — 4, Казанджан — 2, Кобж —1, Горохова — 1, Коваленко — 1.

– Урысыем иныбжьыкIэ хэшыпыкIыгъэ гандбол командэ щешIэрэ нэбгыри 9 «Астраханочка-2-м» хэт, — къытиIуагъ «Адыиф-2-м» итренер шъхьаIэу, Урысыем изаслуженнэ тренерэу Александр Реввэ. — ЕшIэгъум ия 53-рэ такъикъ нэс пчъагъэр зэфэдагъ, «Астраханочка-2-м» Iэгоуи 3 — 4-кIэ ыпэ титэу зэнэкъокъум къыщыхэкIыгъ. Юлия Кожубековам шъобж къытыращи ешIапIэм къызекIыжьым, тикомандэ изэдегъэштэныгъэ къе­Iыхыгъ.

«Адыиф-2-м» иешIакIэ зэрэхигъахъорэр зэIукIэгъум къыушы­хьатыгъ.

Хэгъэгум ихэшыпыкIыгъэ ныбжьыкIэ командэ дунэе зэIукIэгъу­хэм зафегъэхьазыры. Ащ фэшI апшъэрэ купым хэт командэхэм язэнэкъокъу зэпагъэущт.

ШэкIогъу мазэм и 2 — 3-м «Адыиф-2-р» Волгоград щыIу­кIэщт «Динамо-2-м».

КъэлэпчъэIутэу Екатерина Пив­невар Астрахань дэгъоу щешIагъ. Ангелина Куцеваловар, Юлия Кожубековар, нэмыкIхэри яIэпэIэсэныгъэкIэ къахэщыгъэх. Типшъашъэхэм ащыщхэр Урысыем ихэшыпыкIыгъэ ныбжьыкIэ командэ рагъэблэгъагъэх.