ТилIыхъужъхэу монголыдзэм езэуагъэхэр
Лъэпкъ щыIэп икIэныжъи илIыхъужъхэри ымыгъэлъапIэхэу. ЗимыIэм къеугупшысы, амышIагъэр хъишъэу зэхалъхьэшъ зыпатхэ, саугъэтхэр зыфагъэуцух.
Тэ, адыгэхэм, сыдрэ лIэужыгъоу тиIэмкIэ лъэпкъ горэм ыкъогъу тыкъохьажьыщтэп. Нарт чIыпIэхэр, Iуашъхьэхэр тиIэх, лIыхъужъ пчъагъэмэ лъэхъэнэ зэфэшъхьафхэм тичIыгу къагъэгъунэзэ фэхыгъэх. Нэбгырэ зытIу ныIэп ахэм ащыщэу зыцIэ къыраIоу саугъэтхэр зыфагъэуцугъэхэр. Адрэхэм якъэбархэр ашIэхэрэп, ау тилIыхъужъхэм ягъэхъагъэхэр, зы лIэужым адрэм фиIотэжьызэ, къытэнэсыжьыгъэх, якъэ Iуашъхьэхэр агъэгъощагъэхэп.
Ахэм ащыщых зэолI гушхохэу монголыдзэм пэгъокIыхи, шъхьас фамышIэу езаохэзэ фэхыгъэхэ Асран, Джэдыгужъ Ушъуашъу, Щэгъэшъуй Нэджэшъу. Мы нэбгырищымэ якъэ Iуашъхьэхэр КъэзэныкъоякIэ чIыгум итыгъэх. ТIур псыIэрышъэм ыгъэкIодыгъэх, Асран икъэгъэсэй 2010-рэ илъэсым етIэгъагъэх. Мыщ епхыгъэу гущыIэгъу тыфэхъугъ зэлъашIэрэ археологэу Тэу Аслъан.
Мэрэтыкъо Къасимэ и «Адыгэ чIыпIэцIэ гущыIалъэ» мары итхагъэр: «Асран Iуашъхь. КъэзэныкъоякIэм икъокIыпIэкIэ хэгъуашъхьэм ит Iошъхьэшхом «Асран Iуашъхь» раIо. Хъишъэм къызэрэщиIорэмкIэ, мыщ щагъэтIылъыжьыгъэх зэолI-батыр цIэрыIохэр. Ахэр монгол-тэтархэм пхъашэу язаозэ фэхыгъэхэ Джэдыгужъ Ушъуашъо, Щэгъэшъуй Нэджэшъу, Асран ыкIи Адэхъун».
КъызэраIотэжьырэмкIэ, узышIомыкIын зэолI пхъашэхэу Асран, Щэгъэшъуй Нэджэшъу, Джэдыгужъ Ушъуашъо цыбгъо пшъэдэлъхэмрэ упкIэ джэнэ Iужъухэмрэ зыщалъэхи, ашъоджанэхэр тыралъашъохи, шыухэу, монголыдзэм хахьэхи, бгъуитIумкIэ аупкIатэхэзэ пхырыкIыгъэх. Къытырагъэзэжьи къапхырыкIыжьынхэу къызежьэхэм, зэрафыримыкъущтхэр къагурыIуи, лIыхъужъищымэ шыхэр акIаутыхи аулъэгугъэх. Фэхыгъэ нэбгырищымэ Iошъхьэ зырыз КъэзэныкъоякIэр зыдэщысыщтыгъэм икъыблэкIэ ащафашIыгъ.
— ПсыIыгъыпIэм ипсыорхэу илъэс пчъагъэм шъхьафитэу уалъэмэ нэпкъхэр гуагъэухэзэ шъофым итыгъэ Асран Iуашъхьэ ылъапэ къынэси, тIэкIу пигъэугъагъ. Елбэтэу тIыгъэн зэрэфаер къэнэфагъэти, шэкIогъу мазэм 2010-рэ илъэсым иуплъэкIун тафежьэгъагъ ыкIи мэфипшIыкIэ саугъэтыр зэтетхыгъагъ, — еIо Аслъан. — Асран зыдалъхьажьыгъагъэ пхъэмбаим, къупшъхьэ псау, ыцэхэм анэмыкI, къыдэкIыжьыгъэп. Сэшхо кIыхьэ, къамэ, щэбзалъэм илъыгъэхэ щэбзэщэ пшIы заулэ, тыжьын къашыкъ, къошын кIэракIэ ыкIи пкъыгъожъыехэр пхъэмбаим къыдэкIыгъэх.
КъызэрэтIуагъэу, лъэпкъым ыпсэ фэзытыгъэ Асран изакъоу Iуашъхьэ фашIыгъагъ, ау, тызетIэм, икъэ дгъэкIодынэу хъугъагъэ, арыти, лIыхъужъым икIэрыкIэу къэгъэсэй фэтшIыжьынэу зэдэтштэгъагъ.
Хьэдэкъупшъхьэ псау къэдгъотыжьыгъэпти, жъгъэеу тэкъогъэ къупшъхьэхэр зэхэтыугъуаехи зы пакет итлъхьагъэх, Очэпщые хасэм итхьаматэу Кушъу Ибрахьимрэ чылэм щыщ лIыжъхэмрэ тызэгъусэхэу Очэпщые къэхалъэм зэдатщи, бгъагъэу дэтым чIэтлъхьэгъагъ.
Мэзэ заулэрэ Асран икъупшъхьэхэр зыщыдгъэтIылъыжьыщт чIыпIэр къыхэтхышъугъэп. Пэнэжьыкъуаехэми, очэпщыехэми, Адыгэ къалэ щыщхэми якъэхалъэхэм ахарамыгъэлъхьанэу къаIуагъ. Ар тэрэз: лIыхъужъым лъытэныгъэ фашIэу, хэушъхьафыкIыгъэу, изакъоу Iуашъхьэм чIалъхьажьыгъагъ. Къэгъэсэеу фашIыгъагъэм пэмычыжьэу зыщыдгъэтIылъыжьыщтым тылъыхъузэ, КъэзэныкъоякIэмэ ябригадэ зыдэщытыгъэ чIыпIэу чъыг дахэхэр зытетыр тыгу рихьыгъ.
Адыгэ общественнэ движениеу Адыгэ Хасэмрэ чылэ хасэхэм ахэтхэмрэ тызэгъусэу Асран икъупшъхьэхэр ипхъэмбай цIыкIум далъхьэхи, а чIыпIэм етщэлIэжьыгъэх. Ижъырэ хабзэм елъытыгъэу хъулъфыгъэ лIыхъужъым шъэжъые дычIэтлъхьажьыгъ. ЗычIэлъыгъэ Iуашъхьэм къытетхыгъэ ятIэм щыщ теттэкъожьи, къэгъэсэй цIыкIу фэтшIыжьыгъ.
ЗыдгъэтIылъыжьыгъэм илъэс зытешIэм, Iуашъхьэм текIуалIи, тхьэлъэIу щытшIыгъ, тхьаркъоф Iанэхэр щызэдгъэфагъэх.
Ащыгъум тызэбгырымыкIыжьызэ Асран зыщыдгъэтIылъыжьыгъэр хэтымыгъэгъощэнэу зэдэтштэгъагъ ыкIи ятIэ джыри теттэкъонышъ, нахь лъагэ тшIынэу тызэзэгъыгъагъ, … ау непэ къызнэсыгъэм — тыкъызэрэIукIыжьыгъагъ! ТичIыгу монголыдзэр пыеу къызехьэм зэмыблэжьыхэу езаохэзэ Асрани, Щэгъэшъуй Нэджэшъуи, Джэдыгужъ Ушъуашъуи фэхыгъэх. Ахэм яшIэжь дгъэлъапIэу хэушъхьафыкIыгъэу саугъэт афэшIыгъэныр атефэ, ау ащ къидгъэкIырэп гъэкIэрэкIагъэу, лъэпIэшхоу гъэшIэгъонышхо афэдгъэуцунэу. Анахь шъхьаIэр — саугъэтыр къызэрыкIоми, зылъэгъурэм а лIыхъужъхэр тилъэпкъ ицIыф пэрытхэу зэриIагъэхэр ашIэнэу, янэпэеплъ хъунэу ары.
НэкIубгъор зыгъэхьазырыгъэр ЕмтIылъ Нурбый.