Щылычым ебэнызэ дунаим цIэрыIо щыхъугъэ Чыржьын Мухьарбый адыгэ къуаджэу Кощхьаблэ къыщыхъугъ.Уахътэм уфызэплъэкIыжьыныр шэнышIу зыфэхъугъэ батырыр икIэлэгъум къыщегъэжьагъэу атлетикэ онтэгъум пылъыгъ. Ясэнэхьат фэшъыпкъэхэм, цIыф дэгъухэм зэраIукIэрэм ишIуагъэкIэ спортышхом зыкъыщигъотыгъ

Кощхьаблэ щапIугъэ Чыржьын Мухьарбый Олимпиадэ джэгунхэм атлетикэ онтэгъумкIэ дышъэр къащыдихыгъ.

— Сэ Хэгъэгу зэошхом ыуж сыкъэ­хъугъ. СыкIэлакIэу ЦСКА-м сызаштэм, цIыф гъэшIэгъонхэм саIукIагъ. Сафэраз, IэпыIэгъу къысфэхъугъэх, хэгъэ­гум испорт лъагэу зыIэтыгъэхэр къа­хэкIыгъэх, — къеIуатэ М. Чыржьыным.

Иван Удодовыр Хэгъэгу зэошхом иилъэсхэм укIыпIэм ифэу бэрэ къыхэ­кIыгъ. Фашистхэм гъэры зашIым, ылъа­къохэм амыIэтыжьэу оды хъугъагъэ. Спортсмен-дзэкIолIым пытагъэ къызыхигъафи, пыйхэм къаIэкIэкIыжьыгъ.

— Александр Бошко, Аркадий Воро­бьевыр, фэшъхьафхэу Хэгъэгу зэо­шхом лIыгъэ щызезыхьагъэхэр упчIэ­жьэгъу сшIыщтыгъэх, — тизэдэгущыIэгъу лъегъэкIуатэ Чыржьын Мухьарбый, СССР-м спортымкIэ имастерэу Дзэгъэщтэ Хьаджэбый Кощхьаблэ къыщызэIуихыгъэ зыгъэсапIэм М. Чыржьыным апэрэ лъэбэкъухэр щишIыгъэх. Къоджэ спортым щапIугъэ нарт шъаом СССР-м щыпсэурэ лъэпкъхэм ягъэмэфэ Спартакиадэ дышъэр къыщыдихыгъ. Дунаим, Европэм язэнэкъокъухэм джэрзыр къа­щихьыгъ. Олимпиадэ джэгунхэу Мюнхен щыкIуагъэхэм нарт шъаом дышъэр къа­щихьыгъ, дунэе рекордхэр щигъэуцу­гъэх.

— Тренерэу сипэщэгъэ Владимир Стоговым дунаим 5, Европэм 6 ды­шъэр къащихьыгъ, — къеIуатэ Чыржьын Мухьарбый. — ЦСКА-м къулыкъур щысхьыщтыгъ. Спортышхом гуетыны­гъэ фысиIэу текIоныгъэхэм сафэбэнэным фэшI Владимир Стоговыр ситренер къодыеу щытыгъэп. ЦIыфыгъэу къыздызэрихьэрэмкIэ сипIущтыгъ, щыIэныгъэр къызгуригъаIощтыгъ.

Дышъэр М. Чыржьыным Мюнхен къызыщехьым, IэкIыб къэралхэм яжурналистхэм ащыщ къытхыгъагъ къоджэ цIыкIум къыдэкIыгъэ кIалэр Олимпиадэм чемпион зэрэщыхъугъэр шIогъэшIэгъо­нэу.

Спортышхом нахь куоу зыфигъэсэным фэшI Чыржьын ныбжьыкIэр Краснодар зырагъэблагъэм, трамваим иводителэу Iоф ышIэщтыгъ. МашIом мыжъор зэригъэфабэрэм фэдэу щылычым ебэнызэ батыр хъущтым кIуачIэр ыпсыхьэщтыгъ. Спортым цIэрыIо зыщэхъум, Адыгеим щытхъоу фаIорэм хигъэхъуагъ.

Чыржьын Мухьарбый пенсием зэкIом дзэм къыхэкIыжьыгъ, Мыекъуапэ унэ къыщыратыгъэу щэпсэу. Атлетикэ онтэгъум ныбжьыкIэхэр илъэс заулэрэ фигъэсагъэх.

Адыгэ Республикэм спорт псэолъэ дэгъухэр иIэх, Къыблэ шъолъырым изэнэкъокъухэр щызэхащэх. Республикэ общественнэ движениеу «Адыгэ Хасэр» кIэщакIо зыфэхъугъэ зэIухыгъэ зэIукIэгъухэр гъэшIэгъонэу Мыекъуапэ щыкIуа­гъэх. Спорт зэхахьэхэм хьэкIэ гъэшIуа­гъэу М. Чыржьыныр арагъэблагъэ, тренерхэм, ныбжьыкIэхэм гущыIэгъу афэхъу.