УзыщапIугъэм шIукIэ ущашIэныр, уилъэпкъ ыцIэ дунаим щыпIэтыныр зымыуасэ щыIэп.

Урысыем и Къэралыгъо Думэ идепутатэу, дунаим самбэмкIэ гъогогъу 11 дышъэр къыщызыхьыгъэу, дунаим и Кубок гъогогъуи 8 къыдэзыхыгъэу, Европэм дышъэр гъогогъуи 7 къыщызыхьыгъэу Хьасанэкъо Мурат Урысыем спортымкIэ изаслуженнэ мастер, самбэмкIэ 18, дзюдомкIэ 1 Урысыем апэрэ чIыпIэхэр къыщихьыгъэх. Республикэм итын анахь лъапIэу медалэу «Адыгеим и Щытхъузехьэр» къыфагъэшъошагъ.

…Адыгэ къэралыгъо университетым физкультурэмрэ дзюдомрэкIэ икIэлэегъаджэу, шIэныгъэлэжьэу, профессорэу Хьакъунэ Нурбый Еджэркъуае кIуагъэу щагум дэт нарт шъаом пхъэр зэрикъу­тэрэр ылъэгъугъ. КIуачIэр зэригъэфедэрэм, иIэбакIэ уасэ афишIи, кIалэм еушъыигъ спортым ишъыпкъэу пы­лъынэу.

Н. Хьакъунэм Мыекъуапэ къызегъэзэжьым, Еджэркъуае зэдэгущыIэгъоу щыриIагъэр спорт еджапIэм ипащэу, СССР-м изаслуженнэ тренерэу Кобл Якъубэ къыфиIотагъ. Бэ темышIэу унэгъо хъызмэтыр щагум дэгъоу щызыгъэ­цэкIэрэ Хьасанэкъо Мурат бэнэпIэ еджапIэм аштагъ.

Дунаим самбэмкIэ тIогъогогъо ды­шъэр къыщызыхьыгъэу, СССР-м изаслуженнэ тренерэу Хьэпэе Арамбый ипащэу М. Хьасанэкъор дунаим цIэрыIо щыхъугъ.

Адыгэ Республикэм иапэрэ Президентэу, спортымкIэ дунэе класс зиIэ мастерэу Джарымэ Аслъан, Мыекъопэ бэнэпIэ еджапIэм СССР-м спортымкIэ иапэрэ мастерэу, Европэм самбэмкIэ текIоныгъэр къыщыдэзыхыгъэ Гостэкъо Хьумэр Еджэркъуае щыщых. Хьасанэкъо Мурат къызэрэтиIуагъэу, узыщапIугъэ къуаджэм ицIыфхэм яшIушIагъэ щыIэныгъэм къыщыотэжьы.

ГукIэ къыхэпхыгъэ Iофым псэр хаплъхьэзэ гъэхъагъэхэм уафэкIоныр IэшIэхэп. Хьасанэкъо Мурат мэшэлахь, дышъэу зэнэкъокъухэм къащихьыгъэм фэдиз медаль зимыIэ хэгъэгу пчъагъэ дунаим тет. Алырэгъум текIоныгъэр илъэс 19-м къыщыпхьыным фэшI зыпкъ уитэу спортышхом упылъын зэрэфаер М. Хьасанэкъом дэгъоу ышIэщтыгъ. Ыблыпкъ шъобж хьылъэр къытыращэу, «спортышхом ухэкIыжьыныр нахьышIу» къыраIоу зэп къызэрэхэкIыгъэр. Сэнаущыгъэм гуетыныгъэр, спорт лIыгъэр игъусэхэу банэщтыгъ.

Адыгэмэ зэраIоу, лIыгъэ зыхэлъыр къиным пэшIуекIо. ПкIантIэ къемыхэу зы медали къыхьыгъэп. Хэбзэ къулыкъухэр ыгъэцакIэхэу зыфежьэм, Урысыем и Къэралыгъо Думэ идепутатэу хадзыгъ. Спорт псэуалъэхэм ягъэпсын, физкультурэм зегъэушъомбгъугъэным, цIыфхэм япсауныгъэ гъэпытэгъэным, нэмыкI Iофхэм депутатыр агъэгумэкIы.

Зэкъош республикэхэм, адыгэу дунаим тетхэм язэлъыIэсыкIэ амалхэр спорты­шхом нахьышIоу щыгъэфедэгъэнхэмкIэ Хьасанэкъо Мурат егъэжьэпIэшIухэу ышIыгъэхэр зэрэлъигъэкIотэщтхэм тицыхьэ телъэу игухэлъышIухэр къыдэ­хъунхэу фэтэIо.

Сурэтыр итыр: Хьасанэкъо Мурат.