Мыекъопэ районым ипсэупIэу Дахъом Iоныгъо мазэм и 13-м щы­кIо­гъэ зэхахьэр тарихъым инэкIубгъохэм япхыгъ.

1920-рэ илъэсым, Граждан заом илъэхъан, Дахъо пэмы­чыжьэу къэзэкъи 120-рэ уIэшыгъэ купым хэт дзэкIолIхэм якIодылIагъэх. Къэзэкъэу Ва­силий Савранскэр кIэщакIо фэхъуи, 2014-рэ илъэсым къыщыублагъэу шIэжь зэхахьэр зэхащэ.

Къэзэкъхэр зыщаукIыгъэхэ чIыпIэм саугъэтэу щагъэуцугъэм ыпашъхьэ къыщыгущыIагъэх Мыекъопэ къэзэкъ отделым идинлэжьхэу Борис Малинкэ, Роман Малинкэ, нэмыкIхэри. Илъэси 100-кIэ узэкIэIэбэжьмэ, мамыр цIыфхэри, зыныбжь хэ­кIотагъэхэри, кIэлэцIыкIухэри «Террор плъыжь» зыфиIорэм екIодылIагъэх. Къэзэкъхэм яхэгъэгу, ячIыгу къаухъумэнхэр япшъэрылъ шъхьаIэу алъытэщтыгъ.

Граждан заом илъэхъан дунэееплъыкIэ зэфэшъхьаф зи­Iэхэр зэгурымыIохэу, IашэкIи зэпэуцухэу, плъыр-стыр Iофыгъохэм цIыфхэр ахэкIуадэхэу къыхэкIыщтыгъ.

ШIэжь тиIэным, мамыр щы­IакIэр къэухъумэгъэным, ныбжьыкIэхэм пIуныгъэ дэгъу яты­гъэным афэгъэхьыгъэу къэзэкъхэм я Мыекъопэ отдел ипащэу Александр Даниловыр къэгущыIагъ. ЗыщищыкIагъэм лIыгъэ зезыхьэгъэ лIыхъужъхэм щысэ атетхыным, зэгурыIоныгъэ лъэпкъхэм ахэлъэу зэдэ­псэунхэм ямэхьанэ зыкъызэриIэтырэр А. Даниловым хи­гъэунэфыкIыгъэх.

Дахъо ишъоф щаукIыгъэхэ къэзэкъхэм ацIэхэр зэхахьэм къыщыраIуагъэх, шъхьащэ афа­шIыгъ. Саугъэтым къэгъагъэхэр кIэлъыралъхьагъэх.

Екатерина Загорулько.